ଦୁବାଇ,୨୫/୦୯: ଚଳିତ ଏସିଆ କପ୍ର ସୁପର-୪ ରାଉଣ୍ଡ୍ରେ ଗୁରୁବାର ପାକିସ୍ତାନ ଓ ବାଂଲାଦେଶ ସାମ୍ନା ସାମ୍ନି ହେବେ । ଏହି ମ୍ୟାଚର ବିଜେତା ଫାଇନାଲ୍କୁ ଯୋଗ୍ୟତା ଅର୍ଜନ କରିବ । ତେଣୁ ଉଭୟ ଦଳ ପାଇଁ ଏହି ମ୍ୟାଚ୍ ବେଶ୍ ଗୁରୁତ୍ୱପୂର୍ଣ୍ଣ । ମୋଟ୍ ଉପରେ କହିବାକୁ ଗଲେ ଉଭୟ ଦଳ ପାଇଁ ଏହା ସେମି ଫାଇନାଲ୍ ମୁକାବିଲା ।
ସୁପର-୪ ରାଉଣ୍ଡ୍ରେ ପାକିସ୍ତାନ ପ୍ରଥମ ମ୍ୟାଚ୍ରେ ଭାରତ ଠାରୁ ପରାଜିତ ହେବା ପରେ ଦ୍ୱିତୀୟ ମ୍ୟାଚରେ ଶ୍ରୀଲଙ୍କାକୁ ହରାଇଛି । ବାଂଲାଦେଶ ମଧ୍ୟ ଶ୍ରୀଲଙ୍କାକୁ ପରାସ୍ତ କରିଛି। ପାକିସ୍ତାନ ଅପେକ୍ଷାକୃତ ଶକ୍ତିଶାଳୀ ମନେ ହେଉଥିଲେ ହେଁ ବାଂଲାଦେଶ ମଧ୍ୟ ବିଜୟ ଦାବିଦାର । ଗତ ଜୁଲାଇ ମାସରେ ଉଭୟ ଦଳ ମଧ୍ୟରେ ଏକ ୩ମ୍ୟାଚ୍ ବିଶିଷ୍ଟ ଟି-ଟ୍ୱେଣ୍ଟି ସିରିଜ ଖେଳାଯାଇଥିଲା । ବାଂଲାଦେଶ ୨-୧ରେ ଉକ୍ତ ସିରିଜ ଜିତିଥିଲା ।
ଅଧିନାୟକ ଲିଟନ ଦାସଙ୍କ ଅନୁପସ୍ଥିତି ବାଂଲାଦେଶକୁ ପ୍ରଭାବିତ କରିବା ଏକ ପ୍ରକାର ନିଶ୍ଚିତ । ଲିଟନଙ୍କ ବିନା ବାଂଲାଦେଶର ବ୍ୟାଟିଂ ବିଭାଗ ଦୁର୍ବଳ ମନେ ହେଉଛି । ସେ ଆହତ ହୋଇ ଭାରତ ବିପକ୍ଷ ଗତ ମ୍ୟାଚ୍ ଖେଳି ପାରିନଥିଲେ । ତାଙ୍କ ସ୍ଥାନରେ ଜାକର ଅଲି ନେତୃତ୍ୱ ନେଇଥିଲେ । ଗୁରୁବାର ମଧ୍ୟ ସେ ଦଳର ନେତୃତ୍ୱ ନେବେ । ପାକିସ୍ତାନ ଗତ ଶ୍ରୀଲଙ୍କା ବିପକ୍ଷ ମ୍ୟାଚ୍ରେ ସବୁ ବିଭାଗରେ ଉନ୍ନତ ପ୍ରଦର୍ଶନ କରିଥିଲା । ସହିନ ଆଫ୍ରିଦି ଓ ହ୍ୟାରିସ ରୌଫ ଫର୍ମକୁ ଫେରିବା ଫଳରେ ଦଳ ଆସ୍ୱସ୍ତ ରହିଛି । ତଥାପି ସାଏମ ଆୟୁବଙ୍କ ନୈରାଶ୍ୟଜନକ ପ୍ରଦର୍ଶନ ଦଳକୁ ଚିନ୍ତାରେ ପକାଇଛି । ସାହିବଜାଦା ଫରହାନଙ୍କ ବିସ୍ଫୋରକ ବ୍ୟାଟିଂ ସାଙ୍ଗକୁ ହୁସେନ ତଲତ ଓ ଫହିମ ଅସ୍ରଫଙ୍କ ଅଲରାଉଣ୍ଡ ଦକ୍ଷତା ପାକିସ୍ତାନକୁ ସନ୍ତୁଳିତ କରିଛି ।
ଏହି ମ୍ୟାଚରେ ଟସ୍ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ପାକିସ୍ତାନ ପ୍ରଥମେ ବୋଲିଂ କଲେ ସହିନ ଆଫ୍ରିଦି ନୂଆ ବଲ୍ରେ ଘାତକ ସାବ୍ୟସ୍ତ ହେବେ । ବାଂଲାଦେଶର ସ୍ପିନ ବାହିନୀ ବେଶ୍ ଶକ୍ତିଶାଳୀ । ବିଶେଷ କରି ରିଶଦ ହୋସେନ ଓ ନସୁମ ଅହମ୍ମଦ ବାଂଲାଦେଶର ଭାଗ୍ୟ ନିର୍ଦ୍ଧାରଣ କରିବେ ।
ଦୁବାଇ ପିଚ୍ ମନ୍ଥର ହୋଇ ସାରିଛି । ଏଠାରେ ମଧ୍ୟ ଓଭରଗୁଡ଼ିକରେ ଦ୍ରୁତ ରନ ସଂଗ୍ରହ ହେବା କଷ୍ଟକର । ସ୍ପିନରମାନେ ପିଚ୍ର ଭରପୁର ଫାଇଦା ଉଠାଇ ପାରିବେ । ତେଣୁ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ପାକିସ୍ତାନ: ସାହିବଜାଦା ଫରହାନ, ଫଖାର ଜମାନ, ସାଏମ ଆୟୁବ, ସଲମାନ ଆଘା(ଅଧିନାୟକ), ହୁସେନ ତଲତ, ମହମ୍ମଦ ହାରିସ, ମହମ୍ମଦ ନୱାଜ, ଫହିମ ଅସ୍ରଫ, ସହିନ ଶାହ ଆଫ୍ରିଦି, ହ୍ୟାରିସ ରୌଫ, ଅବରାର ଅହମ୍ମଦ ।
ବାଂଲାଦେଶ: ସୈଫ ହାସାନ, ତନଜିଦ ହାସାନ, ପରଭେଜ ହୋସେନ ଇମୋନ, ତୋହିଦ ହୃଦୟ, ଶମିମ ହୋସେନ, ଜାକର ଅଲି(ଅଧିନାୟକ), ରିଶଦ ହୋସେନ, ନସୁମ ଅହମ୍ମଦ, ତନଜିଦ ହାସାନ ସାକିବ, ମହମ୍ମଦ ସୈଫୁଦ୍ଦିନ, ମୁସ୍ତାଫିଜୁର ରେହମାନ ।
