ନୂଆଦିଲ୍ଲୀ: ଏସିଆ କପ୍ ୨୦୨୫ ପରେ ପାକିସ୍ତାନ ମହିଳା ଟିମ୍ ବିଶ୍ୱକପରେ ମଧ୍ୟ ଅପମାନର ସମ୍ମୁଖୀନ ହୋଇଛି । ପାକିସ୍ତାନ ପୁରୁଷ ଦଳ ପରେ ପାକିସ୍ତାନ ମହିଳା ଦଳ ମଧ୍ୟ ଏକ ଶୋଚନୀୟ ପରାଜୟର ସମ୍ମୁଖୀନ ହୋଇଛି। ଭାରତ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେଉଥିବା ICC ମହିଳା ବିଶ୍ୱକପ୍ ୨୦୨୫ ର ପ୍ରଥମ ମ୍ୟାଚରେ ବାଂଲାଦେଶ ପାକିସ୍ତାନକୁ ୭ ୱିକେଟରେ ପରାସ୍ତ କରିଛି । କଲମ୍ବୋରେ ଖେଳାଯାଇଥିବା ଏହି ମ୍ୟାଚରେ ବାଂଲାଦେଶ ପାକିସ୍ତାନକୁ ମାତ୍ର ୧୨୯ ରନରେ ଅଲଆଉଟ୍ କରିଥିଲା ଏବଂ ତା’ପରେ ମାତ୍ର ୩୨ ଓଭରରେ ଏହି ଲକ୍ଷ୍ୟ ହାସଲ କରି ବିଜୟ ସହିତ ଖାତା ଖୋଲିଥିଲା ।
ପାକିସ୍ତାନୀ ଦଳର ଆରମ୍ଭ ଖରାପ ଥିଲା। ଗୁରୁବାର ଆର. ପ୍ରେମଦାସା ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଫାତିମା ସାନାଙ୍କ ଅଧିନାୟକତ୍ୱରେ ପାକିସ୍ତାନୀ ଦଳ ପ୍ରଥମେ ବ୍ୟାଟିଂ କରିଥିଲା । ପ୍ରଥମ ଓଭରରେ ହିଁ ଇନିଂସର ଭାଗ୍ୟ ସ୍ପଷ୍ଟ ହୋଇଥିଲା। ବାଂଲାଦେଶୀ ଦ୍ରୁତ ବୋଲର ମାରୁଫା ଅଖତର ପ୍ରଥମ ଓଭରର ଶେଷ ଦୁଇଟି ବଲରେ ପାକିସ୍ତାନୀ ଦଳର ଦୁଇ ଜଣ ବ୍ୟାଟରଙ୍କୁ ବୋଲ୍ଡ କରିଥିଲେ। ୨ ରନ୍ରେ ୨ ୱିକେଟ ହରାଇଥିଲା ପାକିସ୍ତାନୀ ଟିମ୍ ।
ମୁନିବା ଅଲି ଏବଂ ରମୀନ ଶାମିମଙ୍କ ମଧ୍ୟରେ ୪୨ ରନର ଦୃଢ଼ ଭାଗୀଦାରୀ ଦଳକୁ ପୁଣିଥରେ ଟ୍ରାକକୁ ଫେରାଇ ଆଣିଥିଲା, କିନ୍ତୁ ନାହିଦା ଅଖତାର ଲଗାତାର ଦୁଇଟି ଓଭରରେ ଉଭୟଙ୍କୁ ଆଉଟ୍ କରିଥିଲେ। ଏହିପରି ୫୦ ରନ ପହଞ୍ଚିବା ପୂର୍ବରୁ ୪ଟି ୱିକେଟ ହରାଇଥିଲା ଟିମ୍ । ଦଳର ଅଧା ଖେଳାଳି ୬୭ ରନରେ ଆଉଟ୍ ହୋଇଥିଲେ। ଅଧିନାୟକ ଫାତିମା ସାନା, ଆଲିଆ ରିଆଜ ଏବଂ ଡାଏନା ବେଗ ଦଳକୁ ୧୦୦ ରନ ଅତିକ୍ରମ କରିବାରେ ସାହାଯ୍ୟ କରିଥିଲେ । କିନ୍ତୁ ସମ୍ପୂର୍ଣ୍ଣ ଦଳ ୩୮.୩ ଓଭରରେ ମାତ୍ର ୧୨୯ ରନରେ ଅଲଆଉଟ୍ ହୋଇଥିଲା । ମାରୁଫା ଏବଂ ନାହିଦାଙ୍କ ବ୍ୟତୀତ ଶୋର୍ନା ଅଖତାର ବାଂଲାଦେଶ ପାଇଁ ସର୍ବାଧିକ ତିନୋଟି ୱିକେଟ ନେଇଥିଲେ ।
ବାଂଲାଦେଶର ମଧ୍ୟ ଆରମ୍ଭ ଖରାପ ଥିଲା । ଚତୁର୍ଥ ଓଭରରେ ଓପନର ଫରଗାନା ହୋଏକ ଆଉଟ ହୋଇଥିଲେ । ଶରମିନ ଅଖତର ମଧ୍ୟ ୧୨ତମ ଓଭରରେ ବିଦାୟ ନେଇଥିଲେ। ମାତ୍ର ୩୫ ରନରେ ବାଂଲାଦେଶ ଦୁଇଟି ୱିକେଟ ହରାଇବା ପରେ, ପାକିସ୍ତାନ ହୁଏତ ବିଜୟର ଆଶା ରଖିଥିଲା । କିନ୍ତୁ ତାହା ହୋଇପାରିଲା ନାହିଁ। ଓପନର ରୁବିଆ ହାଇଦର, ଅଧିନାୟିକା ନିଗାର ସୁଲତାନାଙ୍କ ସହ ମିଶି ଏକ ଚମତ୍କାର ୬୨ ରନର ଭାଗୀଦାରି କରି ପାକିସ୍ତାନର ପରାଜୟକୁ ସ୍ପଷ୍ଟ କରିଥିଲେ । ଖୁବଶୀଘ୍ର, ରୁବିଆ ତାଙ୍କର ଅର୍ଦ୍ଧଶତକ ପୂରଣ କରିଥିଲେ । ୩୨ତମ ଓଭରରେ ଶୋଭନା ମୋଷ୍ଟାରିଙ୍କ ସହ ମିଶି ଦଳକୁ ବିଜୟୀ କରାଇଥିଲେ। ରୁବିଆ ୫୪ ରନ ଏବଂ ଶୋଭନା ୨୪ ରନ କରି ଅପରାଜିତ ରହିଥିଲେ।
