ଇସ୍ଲାମାବାଦ: ପାକିସ୍ତାନର ଫିଲ୍ଡ ମାର୍ଶଲ ଏବଂ ସେନା ମୁଖ୍ୟ ଜେନେରାଲ ଅସୀମ ମୁନିର ଚୀନରେ ଗସ୍ତରେ ଅଛନ୍ତି । ଆମେରିକାରେ ଟ୍ରମ୍ପଙ୍କୁ ମନାଇବା ପରେ ଏହା ତାଙ୍କର ଦ୍ୱିତୀୟ ବିଦେଶ ଗସ୍ତ। ବିଶେଷ କଥା ହେଉଛି ଯେ , ଏହାରି ମଧ୍ୟରେ ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଉଭୟ ପୁଅ ସୁଲେମାନ ଇସା ଏବଂ କାସିମ ଖାନ ଆମେରିକାରେ ଅଛ ନ୍ତି। ଟ୍ରମ୍ପଙ୍କ ସବୁଠାରୁ ଖାସ ବ୍ୟକ୍ତିଙ୍କ ସହ ସେମାନଙ୍କର ସାକ୍ଷାତର ସମୟର ଫଟୋ ଭାଇରାଲ ହେଉଛି।
ଏସବୁ ଏପରି ସମୟରେ ଘଟୁଛି ଯେତେବେଳେ ପାକିସ୍ତାନରେ ବିଦ୍ରୋହର ସଙ୍କେତ ମିଳୁଛି । କୁହାଯାଉଛି, ଜେନେରାଲ ଅସୀମ ମୁନିର ପାକିସ୍ତାନର ରାଷ୍ଟ୍ରପତି ହେବାକୁ ଚାହୁଁଛନ୍ତି । ପାକିସ୍ତାନ ଭିତରେ କିଛି ବଡ଼ ହେବାକୁ ଯାଉଛି । ଏହାର ଏକ ଉଦାହରଣ ହେଉଛି, ଜେନେରାଲ ମୁନିରଙ୍କ ଚୀନ ଗସ୍ତ । ମୁନିର ଚୀନରେ ବୈଦେଶିକ ମନ୍ତ୍ରୀ ୱାଙ୍ଗ ୟିଙ୍କୁ ଭେଟିଛନ୍ତି । ଏହା ପରେ ସେ ଶୁକ୍ରବାର ଚୀନର ଉପରାଷ୍ଟ୍ରପତି ହାନ ଝେଙ୍ଗଙ୍କୁ ମଧ୍ୟ ଭେଟିଛନ୍ତି । ଅପରେସନ ସିନ୍ଦୁରରେ ଭାରତଠାରୁ ପରାଜୟର ସାମ୍ନା କରିବା ପରେ, ମୁନିର ପ୍ରଥମେ ଆମେରିକା ଯାଇଥିଲେ । ବର୍ତ୍ତମାନ ତାଙ୍କର ଚୀନ ଗସ୍ତ ପ୍ରଶ୍ନବାଚୀ ସୃଷ୍ଟି କରିଛି ।
ମୁନିରଙ୍କ ସହ କଥାବାର୍ତ୍ତା ପରେ ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି କହିଛନ୍ତି ଯେ, ପାକିସ୍ତାନ ଏବଂ ଚୀନ୍ ମଧ୍ୟରେ ବନ୍ଧୁତା ଦୃଢ଼। ସେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସହଯୋଗ ଜାରି ରଖିବାକୁ ଆହ୍ୱାନ କରିଛନ୍ତି। ସେ କହିଛନ୍ତି ଯେ, ଆମେ ଏପରି ଚୁକ୍ତିନାମା କାର୍ଯ୍ୟକାରୀ କରିବାକୁ ଏବଂ ରଣନୈତିକ ସହଭାଗୀତା ବଜାୟ ରଖିବାକୁ ପ୍ରସ୍ତୁତ। ଏହି ଆଲୋଚନାରେ ଆଞ୍ଚଳିକ ଶାନ୍ତି ଏବଂ ସ୍ଥିରତା ବିଷୟରେ ମଧ୍ୟ ଆଲୋଚନା ହୋଇଛି । ପୂର୍ବରୁ ଚୀନ୍ ମୁନିରଙ୍କୁ ଖୋଲାଖୋଲି ସମର୍ଥନ ମଧ୍ୟ କରିଥିଲା ଏବଂ ଆତଙ୍କବାଦ ବିରୋଧରେ ପାକିସ୍ତାନର ପ୍ରୟାସକୁ ପ୍ରଶଂସା କରିଥିଲା।
ମୁନିର ମଧ୍ୟ ଚୀନକୁ ପ୍ରଶଂସା କରିଛନ୍ତି ଏବଂ ଆଶ୍ୱାସନା ଦେଇଛନ୍ତି ଯେ, ଚୀନ୍ ସହିତ ପାକିସ୍ତାନର ସହଭାଗୀତା ଅତୁଟ । ଉଭୟ ଦେଶ ମିଳିତ ସହଯୋଗକୁ ମଜଭୁତ କରିବାକୁ ପ୍ରସ୍ତୁତ। ଏହା ପରେ ମୁନିର ଚୀନର ଉପରାଷ୍ଟ୍ରପତି ହାନ୍ ଝେଙ୍ଗଙ୍କୁ ମଧ୍ୟ ଭେଟିଛନ୍ତି ।
