ନୂଆଦିଲ୍ଲୀ,୦୯/୦୫: ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନାକୁ ନେଇ ସାରା ବିଶ୍ବରେ ଚର୍ଚ୍ଚା। ସୀମାରେ ମିଶାଇଲ ଏବଂ ଡ୍ରୋନ ଆକ୍ରମଣର ସିରିଜ୍ ବନ୍ଦ ହେବାର କୌଣସି ସଙ୍କେତ ଦେଖାଯାଉନାହିଁ। ଏହି ସମୟରେ, ପାକିସ୍ତାନର ଏପରି ଏକ କୁତ୍ସିତ ପଦକ୍ଷେପ ସାମ୍ନାକୁ ଆସିଛି, ଯେଉଁଥିରେ ପାକିସ୍ତାନ ନିଜ ନାଗରିକଙ୍କ ଜୀବନକୁ ବିପଦରେ ପକାଇଛି। ଏହି ବେଇମାନୀର ପର୍ଦ୍ଦାଫାସ କରି ଭାରତ ବିଶ୍ୱକୁ ଦେଖାଇଦେଲା ଯେ ପାକିସ୍ତାନ କେତେ ତଳ ସ୍ତରକୁ ଖସିପାରେ।
ନିଜ ନାଗରିକଙ୍କୁ ଢ଼ାଲ ବନାଉଛି ପାକିସ୍ତାନ:
ଗତକାଲି ରାତିରେ, ଯେତେବେଳେ ପାକିସ୍ତାନ ଭାରତ ବିରୁଦ୍ଧରେ ଡ୍ରୋନ୍ ଏବଂ ମିଶାଇଲ ଆକ୍ରମଣ କରୁଥିଲା, ସେତେବେଳେ ସେ ନିଜ ଆକାଶ ସୀମା ଅର୍ଥାତ୍ ଏୟାରସ୍ପେଶ୍ରେ ଯାତ୍ରୀବାହୀ ବିମାନଗୁଡ଼ିକୁ ଉଡ଼ାଣ ଭରିବାକୁ ଅନୁମତି ଦେଇଥିଲା। କରାଚୀ ଏବଂ ଲାହୋର ଭଳି ପ୍ରମୁଖ ସହର ମଧ୍ୟରେ ଯାତ୍ରୀବାହୀ ବିମାନ ଉଡ଼ୁଥିଲା ଏବଂ ସେହି ସମୟରେ ଏହାର ସାମରିକ ଯନ୍ତ୍ରାଂଶ ଭାରତ ଉପରେ ଆକ୍ରମଣ ପାଇଁ ଷଡ଼ଯନ୍ତ୍ର କରୁଥିଲା। ଯଦି ଭାରତ ଏହି ଆକ୍ରମଣର ଜବାବ ଦେଇଥାନ୍ତା, ତେବେ ପାକିସ୍ତାନର ଆକାଶ ସୀମାରେ ଉଡ଼ୁଥିବା ଏହି ବିମାନଗୁଡ଼ିକ ମଧ୍ୟ ବିପଦରେ ପଡ଼ିଥାନ୍ତେ। ଏହା ଏକ ଯୋଜନାବଦ୍ଧ ପଦକ୍ଷେପ ଥିଲା ଯେଉଁଥିରେ ପାକିସ୍ତାନ ତାର ନାଗରିକମାନଙ୍କୁ ଢାଲ କରି ଭାରତକୁ ପ୍ରତିଶୋଧ ନେବାରୁ ରୋକିବାକୁ ଚେଷ୍ଟା କରୁଥିଲା। କିନ୍ତୁ ଭାରତ ସଂଯମତା ଏବଂ ଉଚିତ ଜ୍ଞାନର ପରିଚୟ ଦେଇ ପାକିସ୍ତାନର ଏହି ଫାଶରେ ପଡ଼ିବାରୁ ନିଜକୁ ଏଡ଼ାଇ ଥିଲା।
ବେସାମରିକ ବିମାନ ଚଳାଚଳକୁ କ୍ଷତି ପହଞ୍ଚାଇବା ଭଳି କୌଣସି ଦୁର୍ଘଟଣାକୁ ରୋକିବା ପାଇଁ ଭାରତ ଏହାର ସୀମା ନିକଟରେ ଥିବା ଆକାଶପଥ ଅର୍ଥାତ୍ ଏୟାରସ୍ପେଶ୍କୁ ସମ୍ପୂର୍ଣ୍ଣ ବନ୍ଦ କରିଦେଇଛି। ଅନ୍ୟପକ୍ଷରେ, ପାକିସ୍ତାନର ଏହି କାର୍ଯ୍ୟ ପ୍ରମାଣିତ କଲା ଯେ ସେ କେବଳ ଭାରତ ବିରୁଦ୍ଧରେ ଆକ୍ରମଣାତ୍ମକ ମନୋଭାବ ଗ୍ରହଣ କରୁନାହିଁ ବରଂ ନିଜ ଲୋକଙ୍କ ଜୀବନକୁ ବାଜିରେ ଲଗାଇବାକୁ ମଧ୍ୟ ପଛଘୁଞ୍ଚା ଦେଉନାହିଁ। ଯଦି ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନରେ କୌଣସି ଯାତ୍ରୀବାହୀ ବିମାନ ଆଘାତ ପାଇଥାନ୍ତା, ତେବେ ପାକିସ୍ତାନ ସମଗ୍ର ବିଶ୍ୱକୁ ଘୋଷଣା କରିଥାନ୍ତା ଯେ ଭାରତ ତା'ର ନାଗରିକମାନଙ୍କ ଉପରେ ଆକ୍ରମଣ କରିଛି। ଏହା ପାକିସ୍ତାନର ପୁରୁଣା ଘୃଣ୍ୟ ରଣନୀତିର ଏକ ନମୁନା ମାତ୍ର, ଯେଉଁଥିରେ ସେ ତାର ନିଜ ଭୁଲ ପାଇଁ ଭାରତକୁ ଦାୟୀ କରିବାକୁ ଚେଷ୍ଟା କରିଆସୁଛି।
ଭାରତର ବୈଦେଶିକ ମନ୍ତ୍ରଣାଳୟ ଆଜି ଏକ ସାମ୍ବାଦିକ ସମ୍ମିଳନୀରେ ପାକିସ୍ତାନର ଏହି ବେଇମାନୀ କାର୍ଯ୍ୟକଳାପର ପର୍ଦ୍ଦାଫାସ କରିଛି। କର୍ଣ୍ଣେଲ ସୋଫିଆ କ୍ୟୁରେଶୀ ସ୍ପଷ୍ଟ ଭାବେ କହିଛନ୍ତି, "... ୭ ମଇ ରାତି ୦୮:୩୦ ରେ ଏକ ଡ୍ରୋନ୍ ଏବଂ ମିଶାଇଲ ଆକ୍ରମଣ କରିବା ସତ୍ତ୍ୱେ ପାକିସ୍ତାନ ତାର ବେସାମରିକ ଆକାଶ ସୀମା ବନ୍ଦ କରିନଥିଲା। ଆମର ଘୋଷିତ ମାର୍ଗଦର୍ଶିକା ସ୍ବରୁପ ଭାରତ ପକ୍ଷରୁ ଆମର ଯାତ୍ରୀମାନଙ୍କ ସୁରକ୍ଷାକୁ ନଜରରେ ରଖି ଆକାଶ ସୀମାକୁ ସମ୍ପୂର୍ଣ୍ଣ ଭାବରେ ବେସାମରିକ ବିମାନ ଯାତାୟାତରୁ ମୁକ୍ତ କରିଥିଲୁ। ତଥାପି ପାକ୍ ଆକାଶ ମାର୍ଗରେ ବେସାମରିକ ବିମାନଗୁଡ଼ିକ କରାଚୀ ଏବଂ ଲାହୋର ମଧ୍ୟରେ ଉଡ଼ାଣ କରୁଛନ୍ତି। ପାକିସ୍ତାନ ବେସାମରିକ ବିମାନକୁ ଢାଲ ଭାବରେ ବ୍ୟବହାର କରୁଛି। ପାକିସ୍ତାନ ଭଲଭାବରେ ଜାଣିଛି ଯେ, ଭାରତ ଏହାର ସମସ୍ତ ଆକ୍ରମଣର ପ୍ରତି ଜବାବ ଦେବ। କିନ୍ତୁ ଭାରତୀୟ ବାୟୁସେନା ଏହାର ପ୍ରତିକ୍ରିୟାରେ ମହାନ ସଂଯମତା ଦେଖାଇ, ଆନ୍ତର୍ଜାତୀୟ ବେସାମରିକ ବିମାନଗୁଡ଼ିକର ସୁରକ୍ଷା ସୁନିଶ୍ଚିତ କରିଥିଲା।"
