ଭୁବନେଶ୍ୱର,୧୦/୦୧: ପାରାଦୀପ ବନ୍ଦର ନିକଟରେ ସ୍ଥାପନ ହେବାକୁ ଯାଉଛି ଜାହାଜ ନିର୍ମାଣ ଓ ମରାମତି ହବ୍ । ଏ ନେଇ ରାଜ୍ୟ ସରକାର ୪ ହଜାର କୋଟିର ସହାୟତା ଯୋଗାଣ ନେଇ ଘୋଷଣା କରିଛନ୍ତି ।
ସେହିଭଳି ଘରୋଇ କ୍ଷେତ୍ରର ସହଭାଗିତାରେ ଭଦ୍ରକର ଇଞ୍ଚୁଡି ଏବଂ ଦକ୍ଷିଣ ଓଡ଼ିଶାରେ ବାହୁଡାରେ ୨ ନୂଆ ବନ୍ଦର ମଧ୍ୟ ସ୍ଥାପନା କାର୍ଯ୍ୟକୁ ତ୍ୱରାନ୍ୱିତ କରାଯିବ । ଖଣିଜ ପଦାର୍ଥ ଏବଂ କୋଇଲା ପରିବହନକୁ ତ୍ୱରାନ୍ୱିତ କରିବା ଲାଗି ରେଳ ଟ୍ରାକ ବିଛାଇବା ଲାଗି ମଧ୍ୟ ସରକାର ଆଗ୍ରହୀ ରହିଛନ୍ତି ବୋଲି ଶିଳ୍ପ ସଚିବ ହେମନ୍ତ କୁମାର ଶର୍ମା ସୂଚନା ଦେଇଛନ୍ତି ।
ଶ୍ରୀ ଶର୍ମା କହିଛନ୍ତି, ୨୦୨୬ ବେଳକୁ ରାଜ୍ୟର ଗ୍ରୀନ ହାଇଡ୍ରୋଜେନ ମାନୁଫାକଚରିଂ ଫାସିଲିଟିରୁ ଉତ୍ପାଦନ ହେବା ଆଶା ରହିଛି । ପାରାଦୀପ ବନ୍ଦର କର୍ତ୍ତୃପକ୍ଷ (ପିପିଏ) ସହ ମିଳିତ ହୋଇ ଜାହାଜ ନିର୍ମାଣ ଏବଂ ମରାମତି କେନ୍ଦ୍ର ସ୍ଥାପନ କରାଯିବ । ପ୍ରସ୍ତାବିତ ୨ ବନ୍ଦରର କ୍ଷମତା ୪୦ ନିୟୁତ ଟନ୍ ଲେଖାଏ ରହିବ ।
ସେହିଭଳି ରାଜ୍ୟରେ ଗ୍ଲୋବାଲ ଡାଟା ସେଣ୍ଟର ଏବଂ ଗ୍ଲୋବାଲ କାପାବିଲିଟି ସେଣ୍ଟର (ଜିସିସି) ସ୍ଥାପନ କରିବାକୁ କମ୍ପାନି ଗୁଡିକୁ ଉତ୍ସାହିତ କରାଯାଉଛି । ଏବେ ଜିସିସି ନୀତି ଏବଂ ଡାଟା ସେଣ୍ଟର ନୀତିକୁ ପ୍ରସ୍ତୁତ କରାଯାଉଛି । ଭୁବନେଶ୍ୱରର ଦକ୍ଷିଣ ଭାଗରେ ୨୫୦ ଏକର ସ୍ଥାନରେ ଇଲେକଟ୍ରୋନିକ ସିଟି ସ୍ଥାପନ ଲକ୍ଷ୍ୟ ରଖାଯାଇଥିବା ଶ୍ରୀ ଶର୍ମା ଉଲ୍ଲେଖ କରିଛନ୍ତି ।
କଞ୍ଚାମାଲ ପରିବହନକୁ ତ୍ୱରାନ୍ୱିତ କରିବା ଲାଗି ରାଜ୍ୟ ଅଧିକ ନିବେଶ ଲାଗି ମଧ୍ୟ କାର୍ଯ୍ୟକ୍ରମ ଗ୍ରହଣ କରୁଛି । ପ୍ରମୁଖ ପ୍ରକଳ୍ପ ଗୁଡିକୁ ଧାର୍ଯ୍ୟ ସମୟରେ ଶେଷ କରିବା ଲକ୍ଷ୍ୟ ରହିଛି । ହରିଦାସପୁର- ପାରାଦୀପ ରେଳ ଲାଇନର ଦୋହରୀକରଣ କରାଯାଉଛି ।
ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ଗଠିତ ସ୍ପେଶାଲ ପରପୋଜ ଭେଇକିଲ (ଏସ୍ପିଭି)ରେ ରାଜ୍ୟ ଇକ୍ୱିଟି ହୋଲ୍ଡର ରହିଛି । ଆବଶ୍ୟକତା ଭିତ୍ତିରେ ରାଜ୍ୟରେ ନିର୍ଦ୍ଦିଷ୍ଟ ଇକ୍ୱିଟି ଗ୍ରହଣ କରିବାକୁ ପ୍ରତିବଦ୍ଧ ରହିଛି । ବର୍ତ୍ତମାନର ରେଳ କରିଡର କୋଇଲା ପରିବହନ ଚାହିଦା ପୂରଣ ଲାଗି ପର୍ଯ୍ୟାପ୍ତ ବୋଲି ଶ୍ରୀ ଶର୍ମା ଉଲ୍ଲେଖ କରିଛନ୍ତି ।
