ଆନନ୍ଦପୁର, ୧୬ /୦୮: ଅଙ୍ଗନବାଡି କେନ୍ଦ୍ରରେ ଉଡିଲାନି ପତାକା। କେନ୍ଦ୍ରକୁ ତାଲା ପକାଇ ଅଙ୍ଗନବାଡି କର୍ମୀଙ୍କ ସ୍ଥାନାନ୍ତର ଦାବି କଲେ ଅଭିଭାବକ। ଯାହାକୁ ନେଇ ସୃଷ୍ଟି ହୋଇଛି ଅପ୍ରିତିକର ପରିସ୍ଥିତି । ତେବେ କେନ୍ଦୁଝର ଜିଲ୍ଲା ଆନନ୍ଦପୁର ପୌରପରିଷଦ ୯ନଂ ୱାର୍ଡରୁ ସାମ୍ନାକୁ ଆସିଛି ଏହି ଘଟଣା ।
ସୂଚନା ମୁତାବକ, ସମ୍ପୃକ୍ତ ଅଙ୍ଗନବାଡି କେନ୍ଦ୍ରରେ ଗତ ୧୫ ତାରିଖ ସ୍ୱାଧୀନତା ଦିବସରେ ପତାକା ଉତ୍ତୋଳନ କରାଯାଇନଥିଲା । ଏନେଇ ଅଭିଯୋଗ ପରେ ଅଙ୍ଗନବାଡି କର୍ମୀ ନିଜେ ନିଜେ ପତାକା ଉଡାଇ ପିଲାଙ୍କୁ ତିନି ପିସ ବିସ୍କୁଟ ବାଣ୍ଟି ପଳାଇଥିଲେ । ସେହି ଘଟଣାକୁ କେନ୍ଦ୍ରକରି ଶନିବାର ଅଙ୍ଗନବାଡି କେନ୍ଦ୍ରରେ ତାଲା ପକାଇ ଅଙ୍ଗନବାଡି କର୍ମୀଙ୍କ ସ୍ଥାନାନ୍ତର ଦାବି କରିଛନ୍ତି ଅଭିଭାବକ। ଏନେଇ ଘଟଣା ଜାଣିବା ପରେ ୮ ନଂ ଓ ୯ ନଂ କାଉନସିଲର ଘଟଣାସ୍ଥଳରେ ପହଞ୍ଚି ବୁଝାସୁଝା ପରେ ବି କୌଣସି ସମାଧାନ ହୋଇପାରିନଥିଲା । ଖବର ପାଇ ସମ୍ପୃକ୍ତ ୱାର୍ଡ ଦାୟିତ୍ୱରେ ଥିବା ସୁପରଭାଇଜରଙ୍କ ଅନୁପସ୍ଥିତରେ ଅନ୍ୟ ଦାୟିତ୍ୱରେ ଥିବା ସୁପରଭାଇଜର ଘଟଣସ୍ଥଳରେ ପହଞ୍ଚି ବୁଝାସୁଝା କରିଥିଲେ । ହେଲେ ସମସ୍ତ ଅଭିଭାବକ ଅଙ୍ଗନବାଡିରେ ବିଭିନ୍ନ ଅନିୟମିତତା ସମ୍ପର୍କରେ ଦୃଷ୍ଟିକୁ ଆଣିବା ସହିତ ଅଙ୍ଗନବାଡି କର୍ମୀଙ୍କ ସ୍ଥାନାନ୍ତର ଦାବି ଜିଦରେ ଅଟଳ ରହିଥିବା ଜଣାପଡ଼ିଛି।
