ନୂଆଦିଲ୍ଲୀ, ୨୨/୦୮ : ଆତଙ୍କବାଦ, ଅପରେସନ ସିନ୍ଦୂର ଓ ଅନ୍ତରୀକ୍ଷ ଭଳି ପ୍ରମୁଖ ପ୍ରସଙ୍ଗରୁ ଆରମ୍ଭ ହେଲା ଏଥର ସଂସଦର ମୌସୁମୀ ଅଧିବେଶନ। ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଅଚାନକ ଇସ୍ତଫା, ବିହାରରେ ମତଦାତା ସୂଚୀ ଏସଆଇଆରକୁ ନେଇ ହଙ୍ଗାମା, ଜଷ୍ଟିସ୍ ଯଶୋବନ୍ତ ବର୍ମାଙ୍କ ବିରୋଧରେ ମହାଭିଯୋଗ ପ୍ରସଙ୍ଗରେ ସରଗରମ ରହିଲା ଉଭୟ ଗୃହ। ହେଲେ ଲୋକଙ୍କ ସମସ୍ୟା ବିଷୟରେ ଆଲୋଚନା କରିବା ବଦଳରେ ହୋହାଲ୍ଲା କରି ୧୬୬ ଘଣ୍ଟା ବର୍ବାଦ୍ କରିଦେଲେ ନେତାଏ। ଅନ୍ତିମ ୯ କାର୍ଯ୍ୟ ଦିବସରେ ବିନା ଆଲୋଚନାରେ ଲୋକସଭାରେ ୧୨ ଓ ରାଜ୍ୟସଭାରେ ୧୫ ବିଲ୍ ପାରିତ। ଜନତାଙ୍କ ୨୦୪ କୋଟି ଟଙ୍କା ସ୍ଵାହା। 

ଜୁଲାଇ ୨୧ ରୁ ଅଗଷ୍ଟ ୨୧ ଯାଏଁ ଏଥର ମୌସୁମୀ ଅଧିବେଶନ ଚାଲିଥିଲା। ଚଳିତ ଅଧିବେଶନରେ ଲୋକସଭାରେ ୧୨୦ ଘଣ୍ଟା ଆଲୋଚନା ବଦଳରେ ୩୭ ଘଣ୍ଟା ଆଲୋଚନା ହୋଇଛି। ବାକି ୮୩ ଘଣ୍ଟା ନେତାମାନେ ହୋହାଲ୍ଲା କରି ବର୍ବାଦ୍ କରିଛନ୍ତି। ସେହିପରି ରାଜ୍ୟସଭାରେ ୪୭ ଘଣ୍ଟା ଆଲୋଚନା ହୋଇଥିବା ବେଳେ ବାକି ୭୩ ଘଣ୍ଟା ସମୟ ନଷ୍ଟ କରାଯାଇଛି। ଏଥର ଲୋକସଭାରେ ମାତ୍ର ୩୧ ପ୍ରତିଶତ କାମ ହୋଇଥିବା ବେଳେ ରାଜ୍ୟସଭାରେ ୩୮ ପ୍ରତିଶତ କାମ ହୋଇଛି।   

ଲୋକଙ୍କ କୋଟି କୋଟି ଟ୍ୟାକ୍ସ ବର୍ବାଦ୍

ଯେକୌଣସି ଗୃହରେ ଗୋଟିଏ ମିନିଟ୍ କାର୍ଯ୍ୟ ପାଇଁ ପ୍ରାୟ ଅଢେଇ ଲକ୍ଷ ଟଙ୍କା ଖର୍ଚ୍ଚ ହୁଏ। ଅର୍ଥାତ୍ ଗୋଟିଏ ଘଣ୍ଟାର ଖର୍ଚ୍ଚ ପ୍ରାୟ ଦେଢ କୋଟି ଟଙ୍କା। ଏହି କାରଣରୁ ଲୋକସଭାରେ ଏବଂ ରାଜ୍ୟସଭାରେ କୌଣସି କାର୍ଯ୍ୟ ନ ହେବା ଯୋଗୁଁ ୨୦୦ କୋଟିରୁ ଉର୍ଦ୍ଧ୍ଵ ଟଙ୍କା ନଷ୍ଟ ହୋଇଛି। ଅର୍ଥାତ୍ ଏହି ଟଙ୍କା ସିଧା ଲୋକଙ୍କ ପକେଟ୍‌ରୁ ଖର୍ଚ୍ଚ ହୋଇଛି। ତଥାପି, ଅନ୍ତିମ ୯ କାର୍ଯ୍ୟ ଦିବସରେ ଆଇନଗତ କାର୍ଯ୍ୟ ଦ୍ରୁତ ଗତିରେ କରାଯାଇଥିଲା। ବିନା ଆଲୋଚନାରେ ରାଜ୍ୟସଭାରେ ୧୫ଟି ଏବଂ ଲୋକସଭାରେ ୧୨ଟି ବିଲ୍ ପାରିତ ହୋଇଥିଲା। ଏଥର ଲୋକସଭା ଆଜେଣ୍ଡାରେ ମୋଟ ୪୧୯ ପ୍ରଶ୍ନ ତିଆରି କରାଯାଇଥିଲା। ହେଲେ ମାତ୍ର ୫୫ ପ୍ରଶ୍ନର ମୌଖିକ ଉତ୍ତର ରଖାଯାଇଥିଲା। ରାଜ୍ୟସଭା ପ୍ରଶ୍ନକାଳ ସମସୟରେ ୨୮୫ ପ୍ରଶ୍ନ ପଚରା ଯିବାର ଥିଲା। ହେଲେ ହଙ୍ଗାମା କାରଣରୁ ମାତ୍ର ୧୪ ପ୍ରଶ୍ନ ପଚରା ହେଲା। 

ଗୃହ କାର୍ଯ୍ୟ କମ୍, ରାଜନୀତି ବେଶୀ

ପୂର୍ବରୁ ସଂସଦ କାର୍ଯ୍ୟ ଅଧିକ ହେଉଥିଲା।  ହେଲେ ଏବେ ରାଜନୀତି ଅଧିକ ହେଉଛି। ବିରୋଧୀ ହଙ୍ଗାମା କରିବା ଅଭ୍ୟାସରେ ପଡିଗଲେଣି। ହୋହାଲ୍ଲା କରିବା, ପୋଡିୟମ ଉପରକୁ ଚଢିବା, ଗୃହ କାର୍ଯ୍ୟରେ ବାଧା ସୃଷ୍ଟି କରିବାକୁ ଏବେ ବିରୋଧୀଙ୍କ ଭିତରେ ପ୍ରତିଯୋଗୀତା ହେଉଛି। ଏଥିପାଇଁ ତ ସମାଜବାଦୀ ନେତା ଡକ୍ଟର ରାମ ମନୋହର ଲୋହିଆ କହିଥିଲେ, ଯଦି ସଡ଼କ ଶାନ୍ତ ହୋଇଯିବ ତାହେଲେ ସଂସଦ ଶୋଇ ପଡ଼ିବ। ତେଣୁ ଲୋକତନ୍ତ୍ରକୁ ଚେଇଁ ରଖିବା ପାଇଁ ଜନତାଙ୍କୁ ସଜାଗ ରହିବାକୁ ପଡ଼ିବ।     

ଲୋକସଭାରେ ଗୃହୀତ ହୋଇଥିବା ବିଲ୍

୧- ଗୋଆର ବିଧାନସଭା ନିର୍ବାଚନମଣ୍ଡଳୀରେ ଅନୁସୂଚିତ ଜନଜାତିଙ୍କ ପ୍ରତିନିଧିତ୍ୱର ପୁନଃସମଯୋଜନ ବିଲ୍

୨- ବାଣିଜ୍ୟ ପରିବହନ ବିଲ୍

୩- ମଣିପୁର ସାମଗ୍ରୀ ଏବଂ ସେବା କର (ସଂଶୋଧନ) ବିଲ୍

୪- ମଣିପୁର ବ୍ୟୟବରାଦ (ନଂ. 2) ବିଲ୍

୫- ଜାତୀୟ କ୍ରୀଡା ପ୍ରଶାସନ ବିଲ୍

୬- ଜାତୀୟ ଡୋପିଂ ନିରୋଧୀ (ସଂଶୋଧନ) ବିଲ୍

୭- ଆୟକର ବିଲ୍

୮-କର ଆଇନ (ସଂଶୋଧନ) ବିଲ୍

୯- ଭାରତୀୟ ବନ୍ଦର ବିଲ୍

୧୦- ଖଣି ଏବଂ ଖଣିଜ (ବିକାଶ ଏବଂ ନିୟନ୍ତ୍ରଣ) ସଂଶୋଧନ ବିଲ୍

୧୧- ଭାରତୀୟ ପରିଚାଳନା ପ୍ରତିଷ୍ଠାନ (ସଂଶୋଧନ) ବିଲ୍

୧୨- ଅନଲାଇନ୍ ଗେମିଂର ପ୍ରୋତ୍ସାହନ ଏବଂ ନିୟନ୍ତ୍ରଣ ବିଲ୍

ରାଜ୍ୟସଭାରେ ଗୃହୀତ ହୋଇଥିବା ବିଲ୍

୧- ବିଲ୍‌ସ ଅଫ ଲ୍ୟାଣ୍ଡିଂ ବିଲ୍

୨- ସମୁଦ୍ରରେ ମାଲ୍ ପରିବହନ ବିଲ୍

୩- ଉପକୂଳ ଜାହାଜ ଚଳାଚଳ ବିଲ୍

୪- ମଣିପୁର ସାମଗ୍ରୀ ଏବଂ ସେବା କର (ସଂଶୋଧନ) ବିଲ୍

୫- ମଣିପୁର ବ୍ୟୟବରାଦ (ନଂ. ୨) ବିଲ୍

୬- ବାଣିଜ୍ୟ ପରିବହନ ବିଲ୍

୭- ଗୋଆର ବିଧାନସଭା ନିର୍ବାଚନମଣ୍ଡଳୀରେ ଅନୁସୂଚିତ ଜନଜାତିଙ୍କ ପ୍ରତିନିଧିତ୍ୱର ପୁନଃସଞ୍ଚୟ ବିଲ୍

୮- ଜାତୀୟ କ୍ରୀଡା ପ୍ରଶାସନ ବିଲ୍

୯- ଜାତୀୟ ଡୋପିଂ ନିରୋଧୀ (ସଂଶୋଧନ) ବିଲ୍

୧୦- ଆୟକର ବିଲ୍

୧୧- କର ଆଇନ (ସଂଶୋଧନ) ବିଲ୍

୧୨- ଭାରତୀୟ ବନ୍ଦର ବିଲ୍

୧୩- ଖଣି ଏବଂ ଖଣିଜ (ବିକାଶ ଏବଂ ନିୟନ୍ତ୍ରଣ) ସଂଶୋଧନ ବିଲ୍

୧୪- ଭାରତୀୟ ପରିଚାଳନା ପ୍ରତିଷ୍ଠାନ (ସଂଶୋଧନ) ବିଲ୍

୧୫- ଅନଲାଇନ୍ ଗେମିଂର ପ୍ରୋତ୍ସାହନ ଏବଂ ନିୟନ୍ତ୍ରଣ ବିଲ୍