ନୂଆଦିଲ୍ଲୀ,୦୨/୧୧: ପୂର୍ବ ଲଦାଖରେ ଭାରତ-ଚୀନ୍ ସୀମା (ଏଲ୍ଏସି)ରେ ଶୁକ୍ରବାରଠାରୁ ପାଟ୍ରୋଲିଂ ଆରମ୍ଭ ହୋଇଛି । ଏବେ କେବଳ ଡେମ୍ଚୋକରେ ପାଟ୍ରୋଲିଂ ଆରମ୍ଭ ହୋଇଥିବାବେଳେ ଦେପ୍ସାଙ୍ଗ୍ରେ ଖୁବ୍ଶୀଘ୍ର ଏହି ଅଭିଯାନ ଚାଲିବ ବୋଲି ଜଣାପଡ଼ିଛି । ୪ ବର୍ଷ ଧରି ବିବାଦୀୟ ସ୍ଥିତି ଲାଗି ରହିବା ପରେ ନିକଟରେ ଡେମ୍ଚୋକ ଏବଂ ଦେପ୍ସାଙ୍ଗ୍ରୁ ନିଜ ନିଜ ସୈନ୍ୟ ଏବଂ ନିର୍ମାଣ କରାଯାଇଥିବା ଅସ୍ଥାୟୀ ଢାଞ୍ଚା ହଟାଇବାକୁ ଦୁଇ ଦେଶ ସହମତ ହୋଇଥିଲେ । ଏହା ପରେ ସୀମାରୁ ପ୍ରଥମେ ସୈନ୍ୟ ଅପସାରଣ ଓ ପରେ ସେଠାରେ ଥିବା ଅସ୍ଥାୟୀ ସାମରିକ ଭିତ୍ତିଭୂମିକୁ ହଟାଇବା ପ୍ରକ୍ରୟା ଆରମ୍ଭ ହୋଇଥିଲା । ଏହି ପ୍ରକ୍ରିୟା ଅକ୍ଟୋବର ୩୦ରେ ସମ୍ପୂର୍ଣ୍ଣ ହୋଇଥିଲା ।
ଉଭୟ ଦେଶ ମଧ୍ୟରେ ହୋଇଥିବା ବୁଝାମଣା ଅନୁସାରେ ୨୦୨୦ ଏପ୍ରିଲରୁ ଉଭୟ ସ୍ଥାନରେ ଯେଉଁ ସ୍ଥିତାବସ୍ଥା ରହିଥିଲା ତାହା ବଳବତ୍ତର ରହିବ । ଭାରତ ଓ ଚୀନ୍ ସେନା ସମ୍ପୃକ୍ତ ଅଞ୍ଚଳରେ ପାଟ୍ରୋଲିଂ କରିବେ । ଗୋଟିଏ ମାସରେ ଦୁଇଥର ଲେଖାଏ ପାଟ୍ରୋଲିଂ କରାଯିବ । ପାଟ୍ରୋଲିଂ କରିବା ପୂର୍ବରୁ ପରସ୍ପରକୁ ସୂଚନା ଦେବେ । ଗୁରୁବାର ଦୀପାବଳି ଅବସରରେ ପୂର୍ବ ଲଦାଖର ହଟ୍ ସ୍ପ୍ରିଙ୍ଗ୍, କାରାକୋରମ, ଦୌଲତ ବେଗ୍ ଓଲ୍ଡି, କୋଙ୍ଗକାଲା ଏବଂ ଚୁଶୁଲ-ମୋଲ୍ଡୋକୁ ଲାଗି ଥିବା ସୀମାରେ ଦୁଇ ଦେଶର ଅଧିକାରୀମାନେ ପରସ୍ପରକୁ ମିଠା ଖୁଆଇବା ସହ ଦୀପାବଳି ଶୁଭେଚ୍ଛା ଜଣାଇଥିଲେ ।
ସୂଚନାଯୋଗ୍ୟ ଯେ ୨୦୨୦ ଜୁନରେ ପୂର୍ବ ଲଦାଖର ଗଲୱାନ ଘାଟିରେ ଦୁଇଦେଶର ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା । ଅନ୍ୟପକ୍ଷରେ ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ଏଲ୍ଏସିକୁ ଯାଇ ଚୀନ୍ ସୈନ୍ୟଙ୍କୁ ଭେଟିଥିଲେ । ଏହି ସମୟରେ ସେ ଚୀନ୍ ସୈନିକଙ୍କୁ କେତେକ ପ୍ରଶ୍ନ ମଧ୍ୟ ପଚାରିଥିଲେ । ଏତେ ଉଚ୍ଚତାରେ ନିଃଶ୍ୱାସପ୍ରଶ୍ୱାସ ନେବାରେ ଅସୁବିଧା ହେଉନାହିଁ କି ବୋଲି ରିଜିଜୁ ପଚାରିବା ପରେ ପରେ ଚୀନ୍ ସୈନ୍ୟ ସମସ୍ୟା ହେଉ ନ ଥିବା କହିଥିଲେ । ଏଥିସହ ସେ ଭାରତୀୟ ସୈନ୍ୟଙ୍କ ସହ ଦୀପାବଳି ମନାଇଥିଲେ । ଏହା ପରେ ନିଜ ସୋସିଆଲ ମିଡିଆ ଏକ୍ସରେ ରିଜିଜୁ ପୋଷ୍ଟ କରି କହିଛନ୍ତି ଯେ, ଚୀନ୍ ସୈନିକଙ୍କ ସହ କଥା ହେବା ଏବଂ ଭିତ୍ତିଭୂମି ଢାଞ୍ଚା ଦେଖିବା ପରେ ଏବେ ସଭିଏଁ ଭାରତର ସୀମାରେ ବିକାଶକୁ ନେଇ ଗର୍ବ କରିବେ । ଅରୁଣାଚଳ ପ୍ରଦେଶର ବୁମଲାରେ ସେନା ଯବାନଙ୍କ ସହ ଦୀପାବଳି ପାଳିଛି । ଏହା ପୂର୍ବରୁ ତୱାଙ୍ଗ୍ରେ ଆର୍ମି ହେଲିପ୍ୟାଡ୍ରେ ଯବାନଙ୍କ ସହ ଦୀପାବଳି ମନାଇଥିଲି । ୧୫ ହଜାର ଫୁଟ୍ ଉଚ୍ଚତାରେ ରହି ଦେଶର ସେବା କରିବା ଗର୍ବର କଥା ବୋଲି ରିଜିଜୁ କହିଛନ୍ତି । ସେ ଏହି ଅବସରରେ ଯବାନଙ୍କୁ ମିଠା ମଧ୍ୟ ବାଣ୍ଟିଥିଲେ ।
