ନୂଆଦିଲ୍ଲୀ,୧୧/୧୦: ବିହାର ବିଧାନସଭା ନିର୍ବାଚନ ଲଢ଼ିବା ନେଇ ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇଛନ୍ତି ଭୋଜପୁରୀ ସୁପରଷ୍ଟାର ପୱନ ସିଂହ । ସେ ବିହାର ବିଧାନସଭା ନିର୍ବାଚନ ଲଢ଼ିବେ ନାହିଁ ବୋଲି କହିଛନ୍ତି । ନିର୍ବାଚନ ଲଢିବାକୁ କୌଣସି ଦଳରେ ଯୋଗ ଦେଇନାହାଁନ୍ତି ବୋଲି ଏକ୍ସରେ ସୂଚନା ଦେଇଛନ୍ତି ଅଭିନେତାରୁ ନେତା ପାଲଟିଥିବା ପୱନ ସିଂହ । ପତ୍ନୀ ଜ୍ୟୋତି ସିଂହଙ୍କ ସହ ବିବାଦ ମଧ୍ୟରେ ବଡ ଘୋଷଣା କରିଛନ୍ତି ପୱନ । ନିକଟରେ ସେ ବିଜେପିରେ ଯୋଗ ଦେଇଥିଲେ । ସେ ନିଜକୁ ତାଙ୍କ ଦଳର ଜଣେ ସଚ୍ଚୋଟ ସିପାହୀ ବୋଲି କହିଛନ୍ତି ।

​​​​​​​''ମୁଁ ଦଳର ସଚ୍ଚୋଟ ସିପାହୀ''- ପୱନ ସିଂହ ଏକ୍ସରେ ପୋଷ୍ଟ କରି କହିଛନ୍ତି, "ମୁଁ, ପୱନ ସିଂହ, ମୋର ଭୋଜପୁରୀ ସମ୍ପ୍ରଦାୟକୁ କହିବାକୁ ଚାହୁଁଛି ଯେ, ମୁଁ ବିହାର ବିଧାନସଭା ନିର୍ବାଚନ ଲଢ଼ିବା ପାଇଁ ଦଳରେ ଯୋଗ ଦେଇନାହିଁ । ବିଧାନସଭା ନିର୍ବାଚନ ଲଢ଼ିବାକୁ ମୋର କୌଣସି ଇଚ୍ଛା ନାହିଁ । ମୁଁ ଦଳର ଜଣେ ପ୍ରକୃତ ସିପାହୀ ରହିଛି ଏବଂ ରହିବି। "

ପତ୍ନୀ ଜ୍ୟୋତି ସିଂହଙ୍କ ସହ ବିବାଦ- ଭୋଜପୁରୀ ସୁପରଷ୍ଟାର ପୱନ ସିଂହ ବିହାର ବିଧାନସଭା ନିର୍ବାଚନ ଲଢ଼ିବେ ନାହିଁ ବୋଲି ସ୍ପଷ୍ଟ କରିଛନ୍ତି । ବରିଷ୍ଠ ବିଜେପି ନେତାଙ୍କ ସହ ତାଙ୍କର ସାମ୍ପ୍ରତିକ ସାକ୍ଷାତ ପରେ, ପୱନ ସିଂହ ଏଥର ନିର୍ବାଚନ ଲଢ଼ିପାରନ୍ତି ବୋଲି ଗୁଜବ ଉଠିଥିଲା । ଏହାରି ଭିତରେ, ପୱନ ସିଂହ ତାଙ୍କ ପତ୍ନୀ ଜ୍ୟୋତି ସିଂହଙ୍କ ସହ ଚାଲିଥିବା ବିବାଦ ଆହୁରି ଗଭୀର ହେବାରେ ଲାଗିଛି । ବ୍ୟକ୍ତିଗତ ଏବଂ ଆଇନଗତ ଦ୍ୱନ୍ଦ୍ୱ ବହୁତ ଦିନ ଧରି ଖବରର ଶିରୋନାମାରେ ରହିଛି । ପୱନଙ୍କ ପତ୍ନୀ ଜ୍ୟୋତି ସିଂହ ତାଙ୍କ ବିରୁଦ୍ଧରେ ଅନେକ ଗମ୍ଭୀର ଅଭିଯୋଗ ଆଣିଛନ୍ତି । ପୱନ ତାଙ୍କୁ ଗର୍ଭପାତ ବଟିକା ଖାଇବାକୁ ବାଧ୍ୟ କରୁଥିବା କହିଛନ୍ତି ।
​​​​​​​