ଫିରିଙ୍ଗିଆ , ୩୧।୩ : ପ୍ରଶାସନ ଅବହେଳାରୁ ଯୋଜନା ବାଟ ବଣା। ଆବାସ ଯୋଜନାରେ ମିଳୁନି ଗୃହ। ପକ୍କା ଘର ହୋଇ ପଡିଛି ସାତସପନ। ପକ୍କା ଘର ଖଣ୍ଡେ ନ ଥିବାରୁ ଭଙ୍ଗା କୁଡିଆରେ ବିତୁଛି ଜୀବନ। କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଳକ୍ ଲୁଇସିଂ ପଞ୍ଚାୟତ ଅନ୍ତର୍ଗତ ରାଇଗୁଡ଼ା ଗ୍ରାମରେ ଏହା ଦେଖିବାକୁ ମିଳିଛି।
କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଳକ୍ ଲୁଇସିଂ ପଞ୍ଚାୟତ ଅନ୍ତର୍ଗତ ରାଇଗୁଡ଼ା ଗ୍ରାମରେ ରୁହନ୍ତି ସାବାଣା କହଁରଙ୍କ ପରିବାର । ରହିବାକୁ ଭଲ ଘର ଖଣ୍ଡେ ନାହିଁ। ଅର୍ଥ ଅଭାବରୁ ଘର ସଜାଡ଼ି ନପାରି ଝାଟିମାଟି ତଳେ ବିପଦ ସଙ୍କୁଳ ଅବସ୍ଥାରେ କରୁଛନ୍ତି। ସରକାରଙ୍କ ପକ୍ଷରୁ ତାଙ୍କୁ ଆଜି ପର୍ଯ୍ୟନ୍ତ ପକ୍କା ଘର ଖଣ୍ଡିଏ ମିଳିନଥିବା ଅସହାୟ ସାବାଣା କହଁର କହିଛନ୍ତି।
ପକ୍କା ଘର ଖଣ୍ଡିଏ ପାଇବା ପାଇଁ ଦୀର୍ଘ ବର୍ଷ ହେବ ପଞ୍ଚାୟତ କାର୍ଯ୍ୟାଳୟ ଠାରୁ ଆରମ୍ଭ କରି ବ୍ଳକ କାର୍ଯ୍ୟାଳୟ ପର୍ଯ୍ୟନ୍ତ ଗୁହାରି କରିଥିଲେ ମଧ୍ୟ ଆଜି ପର୍ଯ୍ୟନ୍ତ ତାଙ୍କୁ କୈାଣସି ସୁଫଳ ମିଳିନାହିଁ। ସାବାଣା ଜଣେ ଗରିବ ଲୋକ ମଜୁରିଆ ହୋଇଥିବା ବେଳେ ସବୁ ଦିନ ମୂଳ ମଜୁରି ମିଳୁନାହିଁ। ଯାହା କିଛି ମୂଳ ମଜୁରି ମିଳେ ସେଥିରେ ନିଜେ ଚଲୁଥିବା ବେଳେ ପକ୍କା ଘର ଖଣ୍ଡିଏ କରିବା ପାଇଁ ତାଙ୍କ ପକ୍ଷେ ସାତ ସପନ ପାଲଟିଛି। ସେହିପରି ବୟସ ୬୧ରେ ପହଞ୍ଚିଥିଲେ ମଧ୍ୟ ଏ ପର୍ଯ୍ୟନ୍ତ ବାର୍ଦ୍ଧକ୍ୟ ଭତ୍ତା ମିଳୁ ନାହିଁ। ଅନ୍ତଦ୍ୟୋୟ ଯୋଜନାରେ ସାମିଲ କରିବା ସହିତ ଆବାସ ଘର ଖଣ୍ଡିଏ ଯୋଗେଇ ଦେବାକୁ ଗ୍ରାମର ବ୍ରଜମୋହନ କହଁର, ଦୟାନିଧି କହଁର ବିଶ୍ଵନାଥ ଦିଗାଲ, ମୋହନ ଦିଗାଲ, ସୁଶାନ୍ତ ଦିଗାଲ, ଅନିରୁଦ୍ଧ ରଣା ପ୍ରମୁଖ ଦାବି କରିଛନ୍ତି ।
