ବାରଙ୍ଗ,୧୧/୧୨: ନରଣପୁରରେ ଟେକାମରାକୁ ନେଇ ହତ୍ୟାକାଣ୍ଡ । ପୁଅ ଆଗରେ ବାପାକୁ ଇଟାରେ ଛେଚି ହତ୍ୟା କଲେ ବସ୍ତିବାସିନ୍ଦା । ମୃତକ କଣ୍ଟ୍ରାକ୍ଟର ତୋଫାନ ସାମଲ ବୋଲି ଜଣା ପଡ଼ିଛି । କଟକ ଜିଲ୍ଲା ବାରଙ୍ଗ ସ୍ଥିତ ନରଣପୁର ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କିଛି ବସ୍ତିବାସିନ୍ଦା ଆଜବେଷ୍ଟ ଟିଣରେ ଟେକା ପକାଉଥିଲେ । ଏହାକୁ ତୋଫାନ ପ୍ରତିବାଦ କରିବାରୁ ଘଟିଗଲା ଏହି ହତ୍ୟାକାଣ୍ଡ । ଉତ୍ୟକ୍ତ ହୋଇ ବସ୍ତିବାସିନ୍ଦା ତୋଫାନଙ୍କ ମୁଣ୍ଡକୁ ଇଟାରେ ଛେଚିଥିଲେ । ଏଥିରେ ସେ ଗୁରୁତର ହୋଇ ଜନ୍ତ୍ରଣାରେ ଚିତ୍କାର କରିଥିଲେ । ଏହା ଦେଖି ଦୁର୍ବୃତ୍ତମାନେ ଫେରାର ହେଇଥିଲେ । ବାପାଙ୍କ ଚିତ୍କାର ଶୁଣି ପୁଅ ସ୍ଥାନୀୟଲୋକଙ୍କୁ ସାହାଯ୍ୟ ପାଇଁ ଡାକି ଆଣିଥିଲା । ଏହି ଘଟଣା ବିଷୟରେ ଜଣି ଲୋକେ ତୁରନ୍ତ ପୋଲିସକୁ ଖବର ଦେଇ ଏକ ଆମ୍ୱୁଲାନ୍ସ ଯୋଗେ ତୋଫାନଙ୍କୁ ଡାକ୍ତରଖାନାକୁ ନେଇଥିଲେ । ହେଲେ ମେଡିକାଲ ଯିବା ବାଟରେ ହିଁ ଚାଲିଗଲା ତୋଫାନଙ୍କ ଜୀବନ । ଖବର ପାଇ ଘଟଣାସ୍ଥଳରେ ବାରଙ୍ଗ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ କଟକ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
