ନୂଆଦିଲ୍ଲୀ: ଫିଲିପାଇନ୍ସର ରାଜଧାନୀ ମନିଲା ଅଞ୍ଚଳରେ ଥିବା ଏକ ତିନି ମହଲା କୋଠାରେ ଭୟଙ୍କର ଅଗ୍ନିକାଣ୍ଡ ଘଟିଛି । କୁହାଯାଉଛି ଯେ, ଗୁରୁବାର ସକାଳୁ ରାଜଧାନୀ ଅଞ୍ଚଳରେ ଏହି ଦୁର୍ଘଟଣା ଘଟିଛି । ଅଗ୍ନିକାଣ୍ଡ ଯୋଗୁଁ ମାତ୍ର ଗୋଟିଏ ଘଣ୍ଟା ମଧ୍ୟରେ ଏହି ତିନି ମହଲା ବିଶିଷ୍ଟ ଆବାସିକ କୋଠା ପୋଡ଼ି ପାଉଁଶ ହୋଇଯାଇଛି ଏବଂ ଏଥିରେ ଆଠ ଜଣଙ୍କର ମୃତ୍ୟୁ ହୋଇଛି । ଅଧିକାରୀ ମାନେ ଏହି ସୂଚନା ପ୍ରଦାନ କରିଛନ୍ତି। ଅଗ୍ନିକାଣ୍ଡରେ ଅତି କମରେ ଜଣେ ଆହତ ହୋଇଥିବା ଅଧିକାରୀ ମାନେ କହିଛନ୍ତି।
ସେ କହିଛନ୍ତି ଯେ, ପ୍ରାୟତଃ କାଠରେ ତିଆରି ଏହି କୋଠାରେ ମଧ୍ୟରାତ୍ରି ପରେ ଲୋକମାନେ ଶୋଇଥିବା ସମୟରେ ନିଆଁ ଲାଗିଯାଇଥିଲା। ଏହି କୋଠାଟି କ୍ୱେଜନ୍ ସିଟିର ଉପନଗରୀୟ ସାନ ଇସିଡ୍ରୋ ଗାଲାସ୍ ଗ୍ରାମରେ ଅବସ୍ଥିତ ଥିଲା। ଅଗ୍ନିକାଣ୍ଡର କାରଣ ଜାଣିବା ପାଇଁ ତଦନ୍ତ ଚାଲିଛି। ଜଣେ ବରିଷ୍ଠ ଅଗ୍ନିଶମ ଅଧିକାରୀଙ୍କ ସୂଚନା ଅନୁଯାୟୀ, ଦୁଇଟି ମୃତଦେହ ତଳ ମହଲାରେ ଏବଂ ଅନ୍ୟ ଛଅଟି ଦ୍ୱିତୀୟ ମହଲାରେ ମିଳିଛି, ଯେଉଁଠାରୁ ନିଆଁ ଲାଗିଥିବା ସମ୍ଭବତଃ ଜଣାପଡୁଛି।
ଫିଲିପାଇନ୍ସରେ ମାର୍ଚ୍ଚ ମାସରେ ଅଗ୍ନି-ନିବାରଣ ମାସ ଆରମ୍ଭ ହେବାର ମାତ୍ର ଦୁଇ ଦିନ ପୂର୍ବରୁ ଏହି ଅଗ୍ନିକାଣ୍ଡ ଘଟିଥିଲା, ଯେତେବେଳେ ସରକାର ପ୍ରଚଣ୍ଡ ଗ୍ରୀଷ୍ମ ଋତୁ ଆରମ୍ଭ ହେବା ପୂର୍ବରୁ ଅଗ୍ନି ବିପଦ ବିଷୟରେ ସଚେତନତା ସୃଷ୍ଟି କରିବା ପାଇଁ ଏକ ବାର୍ଷିକ ଅଭିଯାନ ଆରମ୍ଭ କରନ୍ତି। ଫିଲିପାଇନ୍ସର ଅନେକ ଭୟଙ୍କର ଅଗ୍ନିକାଣ୍ଡ ପାଇଁ ସୁରକ୍ଷା ନିୟମର ଦୁର୍ବଳ କାର୍ଯ୍ୟକାରୀତା, ଅତ୍ୟଧିକ ଲୋକ ରହିବା ଏବଂ ତ୍ରୁଟିପୂର୍ଣ୍ଣ କୋଠା ଡିଜାଇନ୍ ଦାୟୀ ବୋଲି କୁହାଯାଇଛି।୧୯୯୬ ମସିହାରେ, କ୍ୱେଜନ୍ ସିଟିର ଏକ ଡିସ୍କୋରେ ଅଗ୍ନିକାଣ୍ଡ ଘଟି ୧୬୨ ଜଣଙ୍କର ମୃତ୍ୟୁ ହୋଇଥିଲା ।
