ଭୁବନେଶ୍ୱର,୨୧/୦୬: ଯୁକ୍ତ ତିନି ପ୍ରଥମ ପର୍ଯ୍ୟାୟ ନାମଲେଖା ପାଇଁ ଚୟନ ହୋଇଥିବା ଶିକ୍ଷାର୍ଥୀଙ୍କ ମଧ୍ୟରୁ ମାତ୍ର ୭୬ ହଜାର ନାମଲେଖାଇଲେ । ଆଉ ୧ ଲକ୍ଷ ଶିକ୍ଷାର୍ଥୀ ନାମଲେଖାଇ ନାହାନ୍ତି । ଗତ ୧୨ରୁ ଆରମ୍ଭ ହୋଇ ୧୭ ତାରିଖ ଯାଏ ନାମଲେଖା ଚାଲିଥିଲା । ହେଲେ ଚୟନ ହୋଇଥିବା ପିଲାଙ୍କ ମଧ୍ୟରୁ ଅଧା ପିଲାବି ନାମଲେଖାଇ ନାହାନ୍ତି । ଯେଉଁଥିପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ନାମଲେଖା ଅବଧିକୁ ଶନିବାର ଯାଏ ବୃଦ୍ଧି କରାଯାଇଛି । ଅନ୍ୟପଟେ ୨୨ ତାରିଖରେ ଦ୍ୱିତୀୟ ପର୍ଯ୍ୟାୟ ନାମଲେଖା ପାଇଁ ମେଧା ତାଲିକା ପ୍ରକାଶ ପାଇବ । ଉଚ୍ଚଶିକ୍ଷା ବିଭାଗ ପକ୍ଷରୁ ସୋସିଆଲ୍ ମିଡିଆ ଏକ୍ସରେ କୁହାଯାଇଛି, ଯେଉଁ ଶିକ୍ଷାର୍ଥୀମାନେ ପ୍ରଥମ ପର୍ଯ୍ୟାୟ ନାମଲେଖା ପାଇଁ ଚୟନ ହୋଇଛନ୍ତି, ମାତ୍ର ନାମଲେଖାଇ ନାହାନ୍ତି ସେମାନେ ୨୧ ତାରିଖ ମଧ୍ୟରେ ନାମଲେଖାଇ ପାରିବେ । ଅପରାହ୍ଣ ୩ଟା ମଧ୍ୟରେ ସେମାନେ ନାମଲେଖାଇବେ । ନାମଲେଖା ଫି ଦାଖଲ କରିବେ । ଏଥିସହ ଫ୍ରିଜ୍, ସ୍ଲାଇଡ୍, ପ୍ଲଟ୍ ଅପ୍ସନ୍କୁ ଚୟନ କରିପାରିବେ ।
ସୂଚନାଯୋଗ୍ୟ, ଚଳିତ ଶିକ୍ଷାବର୍ଷ (୨୦୨୫-୨୬) ପାଇଁ ଯୁକ୍ତ ତିନି ପ୍ରଥମ ପର୍ଯ୍ୟାୟ ନାମଲେଖା ପାଇଁ ୧ ଲକ୍ଷ ୭୫ ହଜାର ୭୨୨ ଛାତ୍ରଛାତ୍ରୀ ଚୟନ ହୋଇଥିଲେ । ବିଜ୍ଞାନରେ ୪୫ ହଜାର ୮୫୫, କଳା ପାଇଁ ୧ ଲକ୍ଷ ୭ ହଜାର ୬୯, ବାଣିଜ୍ୟରେ ୧୬ ହଜାର ୨୦୫, ଶାସ୍ତ୍ରୀ ପାଇଁ ୩୩୭୧, ସେଲ୍ଫ ଫାଇନାନ୍ସ ପାଇଁ ୩୦୫୧, ଆଇନ ନାମଲେଖା ପାଇଁ ୧୭୧ ଜଣଙ୍କୁ ଚୟନ କରାଯାଇଥିଲା । ମାତ୍ର ସାମ୍ସ ତଥ୍ୟ ଅନୁଯାୟୀ ମାତ୍ର ୭୬ ହଜାର ପିଲା ନାମଲେଖାଇଛନ୍ତି । ଏଥିପାଇଁ ବିଭାଗ ପକ୍ଷରୁ ଚୟନ ହୋଇଥିବା ଶିକ୍ଷାର୍ଥୀଙ୍କୁ ନାମଲେଖାଇବା ପାଇଁ ୨୧ ତାରିଖ ଯାଏ ସୁଯୋଗ ଦିଆଯାଇଛି । ଆସନ୍ତା ୨୨ରେ ଦ୍ୱିତୀୟ ମେଧା ତାଲିକା ପ୍ରକାଶ ପାଇବ । ଏହାର ନାମଲେଖା ୨୨ରୁ ୨୫ ତାରିଖ ମଧ୍ୟରେ ହେବ । ଜୁଲାଇ ୧ରେ ତୃତୀୟ ପର୍ଯ୍ୟାୟ ମେଧା ତାଲିକା ପ୍ରକାଶ ହେବ । ଏହାର ନାମଲେଖା ୧ରୁ ୪ ମଧ୍ୟରେ ହେବ । ସମସ୍ତ ନାମଲେଖା ପ୍ରକ୍ରିୟା ଜୁଲାଇ ୧୫ ମଧ୍ୟରେ ଶେଷ ହେବ । ଜୁଲାଇ ୧୦ରେ ପାଠପଢ଼ା ଆରମ୍ଭ ହେବ ।
