ନୂଆଦିଲ୍ଲୀ,୧୯/୧୧: ଆଜି ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ୧୦୭ତମ ଜନ୍ମ ଜୟନ୍ତୀ । ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀଙ୍କ ଜନ୍ମ ଜୟନ୍ତୀରେ ତାଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହା ସହିତ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଏବଂ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ଶ୍ରଦ୍ଧାଞ୍ଜଳି ଦେଇଛନ୍ତି ।
ସୋସିଆଲ ମିଡିଆ ଏକ୍ସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶ୍ରଦ୍ଧାଞ୍ଜଳି ଜଣାଇ ଲେଖିଛନ୍ତି, ଆମର ପୂର୍ବତମ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଜୀଙ୍କ ଜନ୍ମ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଉଛି । ସେହିପରି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଏବଂ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ଶକ୍ତି ସ୍ଥଳରେ ଇନ୍ଦିରା ଗାନ୍ଧୀଙ୍କ ଜନ୍ମ ଜୟନ୍ତୀରେ ଶ୍ରଦ୍ଧାଞ୍ଜଳି ଦେଇଛନ୍ତି ।
ଏକ୍ସରେ ମଲ୍ଲିକାର୍ଜୁନ ଖଡଗେ କହିଛନ୍ତି, ଆଇରନ ଲେଡିଙ୍କ ଜୀବନ ସବୁବେଳେ ଭାରତୀୟଙ୍କୁ ପ୍ରେରଣା ଦେବ । ତାଙ୍କର ଆଜୀବନ ସଂଗ୍ରାମ, ସାହାସ ତାଙ୍କ ନେତୃତ୍ବ ସର୍ବଦା ଉଦାହରଣ ହୋଇ ରହିବ । ଭାରତର ଏକତା ଓ ଅଖଣ୍ଡତା ନେଇ ସେ ତାଙ୍କ ଜୀବନକୁ ଉତ୍ସର୍ଗ କରିଥିଲେ ।କଂଗ୍ରେସ ନେତା ରାହୁଲ ଗାନ୍ଧୀ ଏକ୍ସରେ କହିଛନ୍ତି, ଜେଜେମାଆ ଉତ୍ସାହ ଓ ପ୍ରେମର ପ୍ରତୀକ ଥିଲେ । ମୁଁ ତାଙ୍କଠୁ ଦେଶ ପାଇଁ ପ୍ରକୃତ ସାମର୍ଥ୍ୟ ଏବଂ ଭୟହୀନ ହେବା ଶିଖିଛି । ତାଙ୍କ ସ୍ମୃତି ମୋ ପାଇଁ ଶକ୍ତି । ଯାହା ମୋତେ ବାଟ କଢାଇ ନେବ ।
୧୯୧୭ ନଭେମ୍ବର ୧୯ ତାରିଖରେ ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଜନ୍ମ ଗ୍ରହଣ କରିଥିଲେ । ୧୯୬୬ରୁ ୧୯୭୭ ଯାଏ ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଦାୟିତ୍ବ ତୁଲାଇଥିଲେ । ନେହେରୁଙ୍କ ପରେ ସେ ଦେଶର ଦ୍ବିତୀୟ ସର୍ବାଧିକ ସମୟ ପ୍ରଧାନମନ୍ତ୍ରୀ ରହିଥିଲେ । ତାଙ୍କୁ ଆଇରନ ଲେଡି ବୋଲି କୁହାଯାଏ । ୧୯୮୪ ଅକ୍ଟୋବର ୩୧ ତାରିଖରେ ଅଖବର ରୋଡରେ ତାଙ୍କୁ ତାଙ୍କ ସୁରକ୍ଷାକର୍ମୀଙ୍କ ଦ୍ବାରା ଗୁଳି କରି ହତ୍ୟା କରିଥିଲେ ।
