ନୂଆଦିଲ୍ଲୀ,୧୨/୧୧; ଜାତୀୟ ରାଜଧାନୀ ଦିଲ୍ଲୀର ଐତିହାସିକ ଲାଲକିଲ୍ଲା ନିକଟରେ ସୋମବାର ଏକ କାର୍ରେ ବୋମା ବିସ୍ଫୋରଣ ନେଇ ତନାଘନା ଜାରି ରହିଛି । ସୁରକ୍ଷା ଏଜେନ୍ସିଗୁଡ଼ିକ ହାଇ ଆଲର୍ଟରେ ଅଛନ୍ତି । ଦିଲ୍ଲୀ ବିସ୍ଫୋରଣ ସମ୍ପର୍କରେ ଆଜି (ବୁଧବାର) ସଂଧ୍ୟା ୫ଟାରେ ସୁରକ୍ଷା କ୍ୟାବିନେଟ କମିଟି (CCS)ର ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି । ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହେବ । ଭୁଟାନ ଗସ୍ତରେ ଥିବା ପ୍ରଧାନମନ୍ତ୍ରୀ ଫେରିବା ପରେ CCSରେ ଦିଲ୍ଲୀ ବିସ୍ଫୋରଣ ସମ୍ପର୍କରେ ଆଲୋଚନା ପାଇଁ ଏକ ଗୁରୁତ୍ୱପୂର୍ଣ୍ଣ ବୈଠକ କରିବ । ମିଟିଂରେ କିଛି ବଡ଼ ନିଷ୍ପତ୍ତି ନିଆଯାଇପାରେ ।
ବୈଠକରେ ଦିଲ୍ଲୀ ବିସ୍ଫୋରଣ ତଦନ୍ତର ସ୍ଥିତି ବିଷୟରେ ମଧ୍ୟ ଆଲୋଚନା ହେବ । ଭବିଷ୍ୟତ ରଣନୀତି ଉପରେ ଏକ ବଡ଼ ନିଷ୍ପତ୍ତି ନିଆଯିବ । ସିସିଏସ୍ ବୈଠକ ପୁଣି ଥରେ 'ଅପରେସନ ସିନ୍ଦୂର ପାର୍ଟ-୨ ସମ୍ପର୍କରେ ଏକ ବଡ଼ ନିଷ୍ପତ୍ତି ନିଆଯାଇପାରେ ବୋଲି ଚର୍ଚ୍ଚା ହେଉଛି । କୁହାଯାଉଛି କି ପହଲଗାମ ପ୍ରତିଶୋଧ ପାଇଁ ଯେପରି ଅପରେସନ ସିନ୍ଦୂର ହୋଇଥିଲା ଦିଲ୍ଲୀ ବ୍ଲାଷ୍ଟ ପାଇଁ ପାର୍ଟ-୨ ହୋଇପାରେ ।
ଏହା ପୂର୍ବରୁ କେବେ ହୋଇଥିଲା ସିସିଏସ୍ ବୈଠକ ? କହିରଖୁଛୁ ଯେ, ପୂର୍ବରୁ ୨୨ ଏପ୍ରିଲରେ ଜମ୍ମୁ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ସୁରକ୍ଷା ସମ୍ପର୍କିତ କ୍ୟାବିନେଟ କମିଟିର ଏକ ବୈଠକ ଅନୁଷ୍ଠିତ ହୋଇଥିଲା । ଯାହାର କିଛି ଦିନ ପରେ ଭାରତୀୟ ସେନା 'ଅପରେସନ ସିନ୍ଦୂର' ଅଧୀନରେ ପାକିସ୍ତାନରେ ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରିଥିଲା । ଭାରତର ଏହି କୂଟନୈତିକ ଆକ୍ରମଣ ପାକିସ୍ତାନକୁ ବହୁତ କ୍ଷତି ପହଞ୍ଚାଇଥିଲା ।
ଦିଲ୍ଲୀ ବ୍ଲାଷ୍ଟକୁ ନେଇ ବଡ଼ ଚର୍ଚ୍ଚା- ଦିଲ୍ଲୀ ଲାଲକିଲ୍ଲା ବୋମା ବିସ୍ଫୋରଣକୁ ଏକ ଆତଙ୍କବାଦୀ ମଡ୍ୟୁଲ୍ ସହିତ ଯୋଡା ଯାଉଛି ଯେଉଁଥିରେ ଏକ ପାକିସ୍ତାନୀ ଆତଙ୍କବାଦୀ ସଂଗଠନର ନାମ ମଧ୍ୟ ଉଲ୍ଲେଖ କରାଯାଇଛି । ଭୁଟାନ ଭାଷଣରେ ପ୍ରଧାନମନ୍ତ୍ରୀ ମୋଦୀ ସ୍ପଷ୍ଟ ଭାବରେ କହିଥିଲେ ଯେ, ଏହି ଘଟଣାର ପାଇଁ ଯିଏ ଦାୟୀ, ତାଙ୍କୁ ଛଡାଯିବ ନାହିଁ। ଫଳସ୍ୱରୂପ, ସରକାର 'ଅପରେସନ ସିନ୍ଦୂର ପାର୍ଟ-୨' ଆରମ୍ଭ କରିପାରନ୍ତି କି ବୋଲି ସେ ବିଷୟରେ ପୁଣି ଥରେ ଆଲୋଚନା ହେଉଛି ।
'ଅପରେସନ ସିନ୍ଦୂର' ପାର୍ଟ-୨ ହେବ କି ? ଭାରତୀୟ ସେନା ଏବଂ ସରକାର ବାରମ୍ବାର କହିଛନ୍ତି ଯେ, 'ଅପରେସନ ସିନ୍ଦୂର' ଏପର୍ଯ୍ୟନ୍ତ ଶେଷ ହୋଇନାହିଁ । ଯଦି ପାକିସ୍ତାନ ଦ୍ୱାରା କୌଣସି ଆତଙ୍କବାଦୀ ଷଡ଼ଯନ୍ତ୍ର କରାଯାଏ, ତେବେ ଉପଯୁକ୍ତ ଜବାବ ଦିଆଯିବ । ସରକାର ଏହା ମଧ୍ୟ କହିଛନ୍ତି ଯେ, ଆତଙ୍କବାଦ କାର୍ଯ୍ୟକୁ ଯୁଦ୍ଧ କାର୍ଯ୍ୟ ଭାବରେ ବିବେଚନା କରାଯିବ। ଆଜି ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ସିସିଏସ୍ ବୈଠକରେ କ’ଣ ନିଷ୍ପତ୍ତି ନିଆଯିବ ତାହା ଉପରେ ସମସ୍ତଙ୍କ ନଜର ରହିଛି ।
