ନୂଆଦିଲ୍ଲୀ: ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଲାଗୁ ହୋଇଥିବା ୫୦% ଟାରିଫ ଚାପ ମଧ୍ୟରେ ଗୁରୁବାର ଦିନ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବ୍ରାଜିଲର ରାଷ୍ଟ୍ରପତି ଲୁଇଜ ଇନାସିଓ ଲୁଲା ଦା ସିଲଭା ଫୋନରେ ଆଲୋଚନା କରିଛନ୍ତି। ଦୁହେଁ ଆଞ୍ଚଳିକ ଏବଂ ବିଶ୍ୱସ୍ତରୀୟ ମୁଦ୍ଦା ଉପରେ ମତ ବିନିମୟ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ ସାମାଜିକ ଗଣମାଧ୍ୟମ ଏକ୍ସରେ ପୋଷ୍ଟ କରି କହିଛନ୍ତି ଯେ, “ରାଷ୍ଟ୍ରପତି ଲୁଲାଙ୍କ ସହ ଏକ ଭଲ ଆଲୋଚନା ହୋଇଛି। ମୋର ବ୍ରାଜିଲ ଗସ୍ତକୁ ସ୍ମରଣୀୟ ଓ ଅର୍ଥପୂର୍ଣ୍ଣ କରିଥିବାରୁ ତାଙ୍କୁ ଧନ୍ୟବାଦ। ଆମେ ବାଣିଜ୍ୟ, ଶକ୍ତି, ପ୍ରଯୁକ୍ତି, ପ୍ରତିରକ୍ଷା, ସ୍ୱାସ୍ଥ୍ୟ ଏବଂ ଜନସାଧାରଣ ମଧ୍ୟରେ ସମ୍ପର୍କ ଆଦି କ୍ଷେତ୍ରରେ ଆମର ରଣନୌତିକ ଭାଗୀଦାରୀକୁ ଗଭୀର କରିବାକୁ ପ୍ରତିବଦ୍ଧ। ଗ୍ଲୋବାଲ ସାଉଥ ଦେଶଗୁଡ଼ିକ ମଧ୍ୟରେ ଏକ ଶକ୍ତିଶାଳୀ, ଜନକେନ୍ଦ୍ରୀ ଭାଗୀଦାରୀ ସମସ୍ତଙ୍କ ପାଇଁ ଲାଭଦାୟକ।”
ଏକ ଆନୁଷ୍ଠାନିକ ବିବୃତି ଅନୁଯାୟୀ, ପିଏମ ମୋଦୀ ଗତ ମାସରେ ବ୍ରାଜିଲ ଗସ୍ତ ସମୟରେ, ଦୁଇ ନେତା ବାଣିଜ୍ୟ, ପ୍ରଯୁକ୍ତି, ଶକ୍ତି, ପ୍ରତିରକ୍ଷା, କୃଷି, ସ୍ୱାସ୍ଥ୍ୟ ଏବଂ ଜନସାଧାରଣ ମଧ୍ୟରେ ସହଯୋଗ ବୃଦ୍ଧି ପାଇଁ ଏକ ଫ୍ରେମୱାର୍କ ଉପରେ ରାଜି ହୋଇଥିଲେ। ଏହି ଆଲୋଚନାକୁ ଆଗେଇ ନେଇ, ଦୁହେଁ ଭାରତ-ବ୍ରାଜିଲ ରଣନୌତିକ ଭାଗୀଦାରୀକୁ ନୂଆ ଉଚ୍ଚତାକୁ ନେବା ପାଇଁ ନିଜର ପ୍ରତିବଦ୍ଧତା ପୁନର୍ବ୍ୟକ୍ତ କରିଛନ୍ତି।
ଏହି ଆଲୋଚନା ଟ୍ରମ୍ପଙ୍କ ଟାରିଫ ନୀତି ଦ୍ୱାରା ସୃଷ୍ଟ ବାଣିଜ୍ୟ ଚାପ ମଧ୍ୟରେ ହୋଇଛି। ଯେଉଁଥିରେ ଭାରତ ଓ ବ୍ରାଜିଲ ଉପରେ ୫୦% ଟାରିଫ ଲାଗୁ କରାଯାଇଛି। ବ୍ରିକ୍ସ ସଦସ୍ୟ ଦେଶ ଭାବେ, ଭାରତ ଓ ବ୍ରାଜିଲ ଏହି ଚାପର ମୁକାବିଲା କରିବା ପାଇଁ ଏକଜୁଟ ହେବାର ସମ୍ଭାବନା ରହିଛି। ଏହା ସହିତ, ପିଏମ ମୋଦୀ ଅଗଷ୍ଟ ୩୧ ଓ ସେପ୍ଟେମ୍ବର ୧ରେ ଚୀନରେ ଅନୁଷ୍ଠିତ ହେବାକୁ ଥିବା ଶାଙ୍ଘାଇ କୋଅପରେସନ ଅର୍ଗାନାଇଜେସନ (ଏସସିଓ) ଶିଖର ସମ୍ମିଳନୀରେ ଚୀନର ରାଷ୍ଟ୍ରପତି ଶି ଜିନପିଙ୍ଗଙ୍କ ସହ ଆଲୋଚନା ପାଇଁ ଯିବାର ଯୋଜନା କରିଛନ୍ତି। ଯେଉଁଥିପାଇଁ ଆମେରିକା ଏହି ଶିଖର ସମ୍ମିଳନିକୁ ନେଇ ଚିନ୍ତା ବ୍ୟକ୍ତ କରିଛି।
ଏହି ଆଲୋଚନା ଭାରତ ଓ ବ୍ରାଜିଲ ମଧ୍ୟରେ ସହଯୋଗୀ ସମ୍ପର୍କକୁ ଆହୁରି ମଜବୁତ କରିବା ସହ ବିଶ୍ୱସ୍ତରୀୟ ଅର୍ଥନୈତିକ ଚାପ ମୁକାବିଲା ପାଇଁ ଏକ ରଣନୀତିକ ପଦକ୍ଷେପ ଭାବେ ଦେଖାଯାଉଛି।
