ନୂଆଦିଲ୍ଲୀ: ନିଜ ଆକାଶସୀମାରେ ଲଢ଼ୁଆ ବିମାନ ମୁତୟନ କଲା ପୋଲାଣ୍ଡ । ରୁଷୀୟ ଡ୍ରୋନ୍ ଦେଶ ଭିତରେ ପ୍ରବେଶ କରିବା ପରେ ସଜାଗ ପୋଲାଣ୍ଡ ହୋଇଯାଇଛି । ରୁଷୀୟ ଆକ୍ରମଣ ଭୟରେ ପୂର୍ବ ସହର ଲୁବଲିନରେ ଥିବା ବିମାନ ବନ୍ଦରକୁ ବନ୍ଦ କରିଦିଆଯାଇଛି । ଏନେଇ ଶନିବାର ଦେଶର ଶୀର୍ଷ ଅଧିକାରୀ ସୂଚନା ଦେଇଛନ୍ତି । ଏହା ପୂର୍ବରୁ ବୁଧବାର ଅନେକ ରୁଷୀୟ ଡ୍ରୋନ୍ ପୋଲାଣ୍ଡରେ ପ୍ରବେଶ କରିବା ପରେ ନାଟୋ ରାଷ୍ଟ୍ର ତତ୍ପରତା ପ୍ରକାଶ କରିଛି । ନାଟୋ ପକ୍ଷରୁ ସମ୍ଭାବ୍ୟ ରୁଷ ଆକ୍ରମଣକୁ ପ୍ରତିହତ କରିବା ଲାଗି ଲଢ଼ୁଆ ବିମାନ ପଠାଯାଇଛି ।
ପୋଲାଣ୍ଡର ଏହି ସମରସଜା ୩ ବର୍ଷ ଧରି ଜାରି ରହିଥିବା ୟୁକ୍ରେନ ଯୁଦ୍ଧ ଭିନ୍ନ ମୋଡ଼ ନେଇପାରେ ବୋଲି ଆଶାଙ୍କା ବୃଦ୍ଧି ପାଇଛି । ପୋଲାଣ୍ଡ ସେନା କହିଛି ଯେ, ବାୟୁ ପ୍ରତିରକ୍ଷା ଏବଂ ଯାଞ୍ଚ ପ୍ରଣାଳୀ ହାଇଆଲର୍ଟରେ ରହିଛି । ପୋଲାଣ୍ଡର ଆକାଶପଥ ସୁରକ୍ଷିତ ରଖିବାକୁ ଏବଂ ନାଗରିକମାନଙ୍କୁ ସୁରକ୍ଷିତ ରଖିବା ପାଇଁ ଏହି ପଦକ୍ଷେପ ଗ୍ରହଣ କରାଯାଉଛି । ପ୍ରଧାନମନ୍ତ୍ରୀ ଡୋନାଲ୍ଡ ଟସ୍କ ଏକ୍ସ ରେ ମଧ୍ୟ ଲେଖିଛନ୍ତି ଯେ, ରୁଷ ଦ୍ୱାରା ୟୁକ୍ରେନ ନିକଟବର୍ତ୍ତୀ ଅଞ୍ଚଳରୁ ଡ୍ରୋନ କାର୍ଯ୍ୟକଳାପ ଯୋଗୁଁ ପୋଲାଣ୍ଡ ଆକାଶପଥରେ ଯୁଦ୍ଧ ବିମାନ ମୁତୟନ କରାଯାଉଛି ।
ସାମରିକ ବିମାନ ଚଳାଚଳ କାର୍ଯ୍ୟକଳାପ ଯୋଗୁଁ ଲୁବଲିନ୍ ବିମାନବନ୍ଦରରେ ବିମାନ ଚଳାଚଳ ଉପରେ ପ୍ରତିବନ୍ଧକ ଲଗାଯାଇଛି। ବିମାନବନ୍ଦର ମୁଖପାତ୍ର ପିଓଟର ୟାନୋଭସ୍କି କହିଛନ୍ତି ଯେ, ଆକାଶ ମାର୍ଗ ବନ୍ଦ ରହିବ । କିନ୍ତୁ କେତେ ସମୟ ପାଇଁ ଏହାକୁ ବନ୍ଦ ରଖାଯିବ ତାହା ସେ କହି ନାହାନ୍ତି। ସେପଟେ ରୁଷ ପକ୍ଷରୁ କୁହାଯାଇଛି ଯେ, ପୋଲାଣ୍ଡକୁ ଟାର୍ଗେଟ କରାଯାଇ ନାହିଁ । ଏହାର ସହଯୋଗୀ ବେଲାରୁଷ ଦାବି କରିଛି ଯେ, ଡ୍ରୋନଗୁଡ଼ିକ ଜାମ୍ ହୋଇଥିବାରୁ ପଥଭ୍ରଷ୍ଟ ହୋଇଛି । କିନ୍ତୁ ୟୁରୋପୀୟ ନେତାମାନେ ଜୋର ଦେଇ କହିଛନ୍ତି ଯେ, ରୁଷ ଜାଣିଶୁଣି ଡ୍ରୋନ୍ ମାଡ଼ କରିଛି ।
