ନୂଆଦିଲ୍ଲୀ: ଆତଙ୍କବାଦୀ ଆକ୍ରମଣରେ ସହିଦ ହୋଇଥିବା ଶୌର୍ଯ୍ୟ ଚକ୍ର ପ୍ରାପ୍ତ ଯବାନଙ୍କ ମା’ ପାକିସ୍ତାନୀ ନାଗରିକଙ୍କ ସୂଚୀରେ ସାମିଲ ନାହାଁନ୍ତି । ଏନେଇ ଜାମ୍ମୁ କାଶ୍ମୀରର ପୋଲିସ ପକ୍ଷରୁ ସ୍ପଷ୍ଟ କରାଯାଇଛି । ଏହା ଗୁଜବ ବୋଲି କହିଛି ପୋଲିସ । ଏନକାଉଣ୍ଟରରେ ସହିଦ ପୋଲିସ ଯବାନ ମରଣୋତ୍ତର ଶୌର୍ଯ୍ୟ ଚକ୍ର ସମ୍ମାନିତ ମୁଦାସିର ଅହମଦ ଶେଖଙ୍କ ମାଆ ସମୀମା ଅଖତର ପାକିସ୍ତାନୀ ନାଗରିକ ବୋଲି ଖବର ମିଳିଥିଲା । ତାଙ୍କୁ ପାକିସ୍ତାନ ଫେରାଇ ଦିଆଯିବ ବୋଲି କୁହାଯାଉଥିଲା । କିନ୍ତୁ ଏବେ ବାରାମୁଲ୍ଲା ପୋଲିସ ସ୍ପଷ୍ଟ କରିଛି ଯେ, ସମୀମା ପାକିସ୍ତାନୀ ନାଗରିକ ନୁହଁନ୍ତି । ତାଙ୍କୁ ନେଇ ମିଥ୍ୟା ଏବଂ ବିଭ୍ରାନ୍ତୀକର ଖବର ପ୍ରକାଶ ପାଇଥିଲା ।
ପହଲଗାମରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନୀ ନାଗରିକଙ୍କୁ ଦେଶ ଛାଡ଼ିବା ପାଇଁ ନିର୍ଦ୍ଦେଶ ଦେଇଛନ୍ତି ଭାରତ ସରକାର । ସବୁ ରାଜ୍ୟ ସରକାରଙ୍କୁ ମଧ୍ୟ ଏହା ଉପରେ କାର୍ଯ୍ୟ କରିବାକୁ କେନ୍ଦ୍ର ସରକାର କହିସାରିଛନ୍ତି । ପାକିସ୍ତାନୀ ନାଗରିକଙ୍କୁ ସ୍ବଦେଶ ଫେରାଇବା ପ୍ରକ୍ରିୟା ଜାରି ରହିଛି । ଜମ୍ମୁକାଶ୍ମୀର ପ୍ରଶାସନ ମଧ୍ୟ ପାକିସ୍ତାନୀ ନାଗରିକଙ୍କ ତାଲିକା ପ୍ରସ୍ତୁତ କରିଛି । ଜମ୍ମୁକାଶ୍ମୀର ଅଧିକାରୀ ରାଜ୍ୟରେ ରହୁଥିବା ୬୦ ପାକିସ୍ତାନୀଙ୍କୁ ଦେଶରୁ ବାହାର କରାଯିବା ପ୍ରକ୍ରିୟା ଆରମ୍ଭ କରିଛନ୍ତି । ତେବେ ଏହି ସୂଚୀରେ ୨୦୨୨ରେ ହୋଇଥିବା ଏନକାଉଣ୍ଟରରେ ସହିଦ ପୋଲିସ ଯବାନ ମରଣୋତ୍ତର ଶୌର୍ଯ୍ୟ ଚକ୍ର ସମ୍ମାନିତ ମୁଦାସିର ଅହମଦ ଶେଖଙ୍କ ମାଆ ସମୀମାଙ୍କ ନାଁ ଥିବା ଖବର ପ୍ରକାଶ ପାଇଥିଲା ।
ମୁଦାସିରଙ୍କ ଦାଦା ୟୁନୁସ ପ୍ରତିକ୍ରିୟା ଦେଇ କହିଥିଲେ ଯେ, ମୋ ଭାଉଜ ପାକିସ୍ତାନ କବଜାରେ ଥିବା କାଶ୍ମୀର ବାସିନ୍ଦା । ସେ ଅଞ୍ଚଳ ବି ଆମର ହିଁ । ତେଣୁ ସରକାର ତାଙ୍କୁ ନିର୍ବାସନ ନକରିବା ଦରକାର । ମୁଦାସିରଙ୍କ ବଳିଦାନ ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପରିବାର ଲୋକଙ୍କୁ ଭେଟିଥିଲେ । ଉପରାଜ୍ୟପାଳ ଦୁଇ ଥର ପରିବାରକୁ ଭେଟିଥିଲେ । ୟୁନୁସ କହିଥିଲେ, 'ଭାଉଜ ଯେତେବେଳେ ଏଠାକୁ ଆସିଥିଲେ, ସେତେବେଳେ ତାଙ୍କୁ କେବଳ ୨୦ ବର୍ଷ ହୋଇଥିଲା । ୪୫ ବର୍ଷ ହେଲା ସେ ଭାରତରେ ରହୁଛନ୍ତି । ତାଙ୍କ ପୁଅ ଦେଶ ପାଇଁ ବଳିଦାନ ଦେଇଛି । ତେଣୁ ଏପରି ନକରିବା ପାଇଁ ପ୍ରଧାନମନ୍ତ୍ରୀ ମୋଦୀ ଓ ଗୃହମନ୍ତ୍ରୀ ଅମିତ ଶାହଙ୍କୁ ମୁଁ ନିବେଦନ କରୁଛି ।' ତେବେ ସମୀମାଙ୍କ ସମେତ ତାଙ୍କ ପରିବାରକୁ ଆଶ୍ବସ୍ତି ମିଳିଛି । ସମୀମା ପାକିସ୍ତାନ ଯିବେ ନାହିଁ ବୋଲି ପୋଲିସ ସ୍ପଷ୍ଟ କରିବା ପରେ ୟୁନୁସ ସରକାରଙ୍କୁ ଧନ୍ୟବାଦ ଜଣାଇଛନ୍ତି ।
ଜମ୍ମୁକାଶ୍ମୀର ପୋଲିସ ଯବାନ ମୁଦାସିର ଅହମଦ ଶେଖ ୨୦୨୨ରେ ପାକିସ୍ତାନୀ ଆତଙ୍କବାଦୀଙ୍କ ବିରୋଧରେ ଏକ ଅପରେସନରେ ସାମିଲ ଥିଲେ । ଏନକାଉଣ୍ଟର ବେଳେ ଆତଙ୍କୀଙ୍କ ଗୁଳିରେ ମୁଦାସିରଙ୍କ ମୃତ୍ୟୁ ହୋଇଥିଲା । ମୁଦାସିରଙ୍କୁ ମରଣୋତ୍ତର ଶୌର୍ଯ୍ୟ ଚକ୍ରରେ ସମ୍ମାନିତ କରାଯାଇଥିଲା । ୨୦୨୩ରେ ଦିଲ୍ଲୀରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କଠାରୁ ମୁଦାସିରଙ୍କ ମାଆା ସମୀମା ପୁରସ୍କାର ଗ୍ରହଣ କରିଥିଲେ । ବାରମୁଲ୍ଲାରେ ଏକ ଛକ ସହିଦ ମୁଦାସିରଙ୍କ ନାଁ ଅନୁସାରେ ନାମିତ କରାଯାଇଛି ।
