ପୁରୀ,୨୯/୧୦: ମଦ ପିଇ ଭୁଲିଗଲେ ମାନବିକତା । ହରାଇଲେ ମଣିଷ ପଣିଆ । ଜଣେ ଗ୍ୟାରେଜ୍ ମେକାନିକ୍ ସହ ମିଶି ଆତଙ୍କ ରଚିଲେ ଜଣେ ପୁଲିସ ବାବୁ । ଘରେ ପଶି ଜଣଙ୍କୁ ପିଟିଲେ । ତାଙ୍କ ଉପରେ ଗରମ ତେଲ ଢାଳିଲେ । ବ୍ୟକ୍ତିଙ୍କ ବୃଦ୍ଧା ମା’ ଜଣକ ସୁରକ୍ଷା ଦେବାକୁ ଉଦ୍ୟମ କରିବା ବେଳେ ଖଟ ଉପରୁ ଖସି ଗୁରୁତର ଆହତ ହେଲେ । ତାଙ୍କ ଦେହରେ ଲାଗିଥିବା ପରିସ୍ରା ନଳି ବାହାରିଯାଇ ଥିବାବେଳେ ପୁଲିସ ବାବୁ ଜଣକ ବାହାର ପଟୁ କବାଟ କିଳି ଚମ୍ପଟ ମାରିଲେ । ଏଭଳି ସ୍ଥିତିରେ ଉଦ୍ଧାର କଲେ ସାହି ଲୋକେ । କୁମ୍ଭାରପଡ଼ା ଥାନା ଅଧୀନ ତଳମାଳିସାହିରେ ଘଟିଛି ଏମିତି ଏକ ଅଭାବନୀୟ ଘଟଣା । ଏନେଇ ଏତଲା ହୋଇଛି । କୁମ୍ଭାରପଡ଼ା ଥାନା ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏତଲାକାରୀ ହେଲେ ସେହି ସାହିର ବିଜୟ ଚନ୍ଦ୍ର ମହାରଣା । ଆତଙ୍କ ରଚିଥିବା ପୁଲିସ ବାବୁଙ୍କ ନାମ ଜଳେଶ୍ୱର ଓ ସେ ବାଟାଲିୟନ୍ରେ କାର୍ଯ୍ୟରତ ଏବଂ ତାଙ୍କ ସହଯୋଗୀ ଗ୍ୟାରେଜ୍ ମେକାନିକ୍ ପପୁ ଦାସ ବୋଲି ଏତଲାରେ ଉଲ୍ଲେଖ ରହିଛି ।
ଅଭିଯୋଗ ଅନୁସାରେ, ପୁଲିସ ବାରାକ୍ ସମ୍ନାରେ ପପୁ ଗ୍ୟାରେଜ୍ କରିଛି । ବିଜୟଙ୍କ ଘର ପାଖରେ ଭଡ଼ାଘରେ ରହୁଛନ୍ତି ଜଳେଶ୍ୱର । ପପୁ ଓ ଜଳେଶ୍ୱର ଗତ ୨୬ ତାରିଖ ବିଳମ୍ବିତ ରାତିରେ ରୋଷେଇ କରିଥିଲେ । ନିଶାସକ୍ତ ଅବସ୍ଥାରେ ବିଜୟଙ୍କ ଘର ବାରଣ୍ଡାରେ ବସି ଉଭୟ ଅଶ୍ଳୀଳ ଭାଷାରେ ଗାଳିଗୁଲଜ କରୁଥିଲେ । ବିଜୟଙ୍କ ମା’ ବ୍ରେନ୍ ଷ୍ଟୋକ୍ କାରଣରୁ ପକ୍ଷାଘାତ ରୋଗରେ ଆକ୍ରାନ୍ତ ଥିବାରୁ ଏଭଳି ପାଟିତୁଣ୍ଡ କରନାହିଁ ବୋଲି ନିବେଦନ କରିଥିଲେ । ଉଭୟ ସେଠାରୁ ପଳାଇଥିଲେ । ରାତି ପ୍ରାୟ ସାଢ଼େ ୨ଟାରୁ ୩ଟା ମଧ୍ୟରେ ଏକ ହାତୁଡ଼ି ଆଣି ଉଭୟ ବିଜୟଙ୍କ କବାଟ ବାଡ଼େଇଥିଲେ । କବାଟ ଖୋଲିବା ମାତ୍ରେ ହାତୁଡ଼ିରେ ବିଜୟଙ୍କୁ ସେମାନେ ଅତର୍କିତ ଆକ୍ରମଣ କରିଥିଲେ । ବିଜୟଙ୍କ ମା’ ଖଟରୁ ଖସିପଡ଼ିଥିଲେ । ତାଙ୍କର ପରିସ୍ରା ନଳୀ ବାହାରି ଯାଇଥିବା ବେଳେ ସେ ଗୁରୁତର ଭାବେ ଆହତ ହୋଇଥିଲେ । ଏତିକିରେ ଜଳେଶ୍ୱରଙ୍କ ମନ ଶାନ୍ତି ହୋଇନଥିଲା । ନିଜଘରୁ ଗରମ ତେଲ କଡ଼େଇ ଆଣି ବିଜୟଙ୍କ ଉପରେ ଢାଳି ଦେଇଥିବା ଏତଲାରେ ଉଲ୍ଲେଖ ରହିଛି । ଗରମ ତେଲ ଓ ହାତୁଡ଼ି ମାଡ଼ରେ ବିଜୟଙ୍କ ଅବସ୍ଥା ସଙ୍ଗିନ ହୋଇଥିଲା । ମା’ ଓ ପୁଅ ଘରେ ପଡ଼ିଥିବା ବେଳେ ବାହାର ପଟୁ ସେମାନଙ୍କୁ କବାଟ କିଳି ଉଭୟ ପଳାଇଥିଲେ ।
ମୁଁ ପୁଲିସ... । ଯା, ମୋର୍ କ’ଣ କରିବୁ କର୍ ବୋଲି ଧମକ ଦେଇଥିଲେ ଜଳେଶ୍ୱର ଓ ପପୁ । ଚିତ୍କାର ଶୁଣି ସାହି ଲୋକେ ଆସି କବାଟ ଖୋଲି ଉଭୟଙ୍କୁ ଉଦ୍ଧାର କରିଥିଲେ । ମା’ଙ୍କ ଚିକିତ୍ସା କରାଇ ବିଜୟ ନିଜେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ । ଏହାପରେ ଥାନାକୁ ଆସି ଏତଲା ଦେଇଥିଲେ । ଏନେଇ ମାମଲା ରୁଜୁ କରାଯାଇଥିବା କହିଛନ୍ତି ଆଇଆଇସି ସୁଶାନ୍ତ କୁମାର ସାହୁ ।
