ବାଙ୍ଗିରିପୋଷି,୨୪/୧ : ହାତୀ ଶୁଣ୍ଡରେ ପେଲି ଦେବାରୁ ଜଣେ ଗୁରୁତର ଆହାତ ହୋଇଛନ୍ତି । ମୟୁରଭଞ୍ଜ ଜିଲ୍ଲା ବାଙ୍ଗିରିପୋଷି ବନାଞ୍ଚଳ ଅନ୍ତର୍ଗତ ଖଇରବଣି ଗ୍ରାମ ନିକଟରେ ଆଜି ଅଘଟଣ ଘଟି ଯାଇଛି। ଶୌଚ ହେବାକୁ ଯାଇଥିବାବେଳେ ଜଣେ ବ୍ୟକ୍ତି ହାତୀ ହାବୁଡରେ ପଡିଯାଇଥିଲେ ।
ହାତୀଟି ତାଙ୍କୁ ଶୁଣ୍ଡରେ ପେଲି ଦେଇଥିବାବେଳେ ଗୁରୁତର ହୋଇ ପଡିଛନ୍ତି । ବ୍ୟକ୍ତି ଜଣକ ହେଲେ ଶତ୍ରୁଘ୍ନ ପାତ୍ର । ତାଙ୍କ ଘର ବାଲେଶ୍ଵର ଜିଲ୍ଲାର ଜଳେଶ୍ଵର ଅଞ୍ଚଳରେ । ସେ ଜଣେ ଆଳୁ ବ୍ୟବସାୟୀ। ଉକ୍ତ ଅଞ୍ଚଳରେ ଧଳା ଆଳୁ କ୍ଷେତରେ ଫସଲ ତୋଳାଯାଉଥିବାବେଳେ ସେ ଆଳୁ କିଣିବାକୁ ଆସିଥିଲେ । ତେବେ ଶୌଚ ଲାଗିବାରୁ ସେ ବିଲ ପଛପଟ ଜଂଗଲ ଆଡ଼କୁ ଯାଇଥିବାବେଳେ ହାତୀ ହାବୁଡ଼ରେ ପଡି ଯାଇଥିଲେ।
ଶତ୍ରୁଘ୍ନଙ୍କୁ ଗୁରୁତର ଅବସ୍ଥାରେ ବାରିପଦା ପିଆରଏମ୍ ମେଡିକାଲ କଲେଜରେ ଭର୍ତ୍ତି କରାଯାଇଛି । ଗତ କିଛି ଦିନ ହେବ ୧୨ଟିକିଆ ହାତୀ ପୋଲ ବାଙ୍ଗିରିପୋଷି ଅଞ୍ଚଳରେ ବ୍ୟାପକ କ୍ଷୟକ୍ଷତି କରୁଥିବାବେଳେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।
