ନୂଆଦିଲ୍ଲୀ,୩୦/୦୫; ଏସିର ବହୁଳ ବ୍ୟବହାର ଆଣିବ ସମସ୍ୟା । ଗ୍ରୀଡ୍ କ୍ଷମତାକୁ ବଳିଯିବ କୁଲିଂ ଚାହିଦା । ପିକ୍ ଚାହିଦାରେ ରୁମ୍ ଏସି ଭାଗ ଏବେ ୭୦ ଗିଗାୱାଟ୍ । ଏଫିସିଏନ୍ସି ଷ୍ଟାଣ୍ଡାର୍ଡ ନ ବଢିଲେ ୨୦୩୦ ସୁଦ୍ଧା ୧୨୦ ଗିଗାୱାଟକୁ ବଢିବ । ୨୦୩୫ ସୁଦ୍ଧା ୧୮୦ ଗିଗାୱାଟ୍ ହୋଇପାରେ । ଏହା ବଡ଼ ସମସ୍ୟା ଆଣିବାକୁ ଯାଉଛି । ୨୦୨୮ ସୁଦ୍ଧା ଘୋର ବିଦ୍ୟୁତ୍ ସଙ୍କଟ ମାଡ଼ି ଆସିବ । ଅନ୍ଧାରରେ ରହିବ ଦେଶ । ତାତି ବଢ଼ିବା ସହ ଏୟାର୍ କଣ୍ଡିଶନର ଚାହିଦା ବହୁଗୁଣିତ ହୋଇଛି । ତେବେ ଏସିର ବହୁଳ ବ୍ୟବହାର ଆଣିପାରେ ଭୟଙ୍କର ପରିଣତି । ଏକ ନୂଆ ରିପୋର୍ଟ ଅନୁସାରେ, ଏୟାର୍ କଣ୍ଡିଶନରର ବହୁଳ ବ୍ୟବହାର ଯୋଗୁ କୁଲିଂ ଚାହିଦାରେ ଦେଖାଦେବ ବଡ଼ ବୃଦ୍ଧି । ଏହି ଚାହିଦା ପାୱାର ଗ୍ରୀଡ୍ଗୁଡ଼ିକର କ୍ଷମତାକୁ ବଳିଯିବ । ଏଭଳି ସ୍ଥିତିରେ ୨୦୨୮ ସୁଦ୍ଧା ଏକ ଭୟଙ୍କର ବିଦ୍ୟୁତ୍ ସଂକଟର ସାମ୍ନା କରିପାରେ ଭାରତ । ୟୁନିଭର୍ସିଟି ଅଫ୍ କାଲିଫର୍ଣ୍ଣିଆ, ବର୍କଲେସ୍ଥିତ ଇଣ୍ଡିଆ ଏନର୍ଜି ଆଣ୍ଡ୍ କ୍ଲାଇମେଟ୍ ସେଣ୍ଟର ଦ୍ୱାରା ପ୍ରସ୍ତୁତ ଏକ ନୂଆ ପେପର୍ ଅନୁସାରେ, ଦେଶର ପିକ୍ ବିଦ୍ୟୁତ୍ ଚାହିଦାରେ ରୁମ୍ ଏସିଗୁଡ଼ିକର ଅଂଶ ହେଉଛି ଏକ ତୃତୀୟାଂଶ ।
ପିକ୍ ଚାହିଦାରେ ରୁମ୍ ଏସିର ଭାଗ ଏବେ ୬୦ରୁ ୭୦ ଗିଗାୱାଟ । ରିପୋର୍ଟରେ କୁହାଯାଇଛି ଯେ, ଏସିଗୁଡ଼ିକର ଶକ୍ତି ସଞ୍ଚୟ କ୍ଷମତାକୁ ବଢ଼ାଇବାକୁ ପଡ଼ିବ । ଏୟାର୍ କଣ୍ଡିସନରଗୁଡ଼ିକର ଏଫିସିଏନ୍ସି ଷ୍ଟାଣ୍ଡାର୍ଡ ନ ବଢ଼ାଗଲେ ଏସିରୁ ଚାଳିତ ପିକ୍ ଚାହିଦା ୨୦୩୦ ସୁଦ୍ଧା ୧୨୦ ଗିଗାୱାଟ ଏବଂ ୨୦୩୫ ସୁଦ୍ଧା ୧୮୦ ଗିଗାୱାଟକୁ ବୃଦ୍ଧି ପାଇବ । ପ୍ରତିବର୍ଷ ୧ରୁ ଦେଢ଼ କୋଟି ନୂଆ ଏସି ଯୋଡୁଛି ଭାରତ । ଭାରତୀୟଙ୍କ ଆୟବୃଦ୍ଧି ଏବଂ ପ୍ରବଳ ଗ୍ରୀଷ୍ମପ୍ରବାହ ଯୋଗୁ ଆଗାମୀ ଦଶନ୍ଧିରେ ଭାରତରେ ଆଉ ୧୩ରୁ ୧୫ କୋଟି ୟୁନିଟ୍ ନୂଆ ଏସି ଯୋଡ଼ି ହୋଇଯିବ । ଏଭଳି ସ୍ଥିତିରେ ପରିସ୍ଥିତି ଭୟଙ୍କର ହୋଇପାରେ । କୁଲିଂ ଚାହିଦା ବଢ଼ିବା ସହ ଚାପ ମଧ୍ୟକୁ ଆସିଯିବେ ପାୱାର୍ ଗ୍ରୀଡ୍ । ଗ୍ରୀଡ୍ କ୍ଷମତା ଏହି ଚାହିଦାକୁ ପୂରଣ କରିବାରେ ସକ୍ଷମ ହେବା ମୁସ୍କିଲ ହୋଇଯିବ । ରିପୋର୍ଟ ଅନୁସାରେ, ଏସିର ବହୁଳ ବ୍ୟବହାର ଯୋଗୁ ଆଗାମୀ ଦଶନ୍ଧିରେ ଭାରତ ଭୟଙ୍କର ବିଦ୍ୟୁତ ଅଭାବ ସ୍ଥିତି, ଏପରିକି ବ୍ଲାକ୍ଆଉଟ୍ରେ ସାମ୍ନା କରିପାରେ ।
ଏହା ବି ପଢନ୍ତୁ...ବିଶ୍ବର ଏକମାତ୍ର ବିମାନ ବନ୍ଦର, ଯେଉଁଠି ରନଓ୍ବେ ମଝିରେ ଯାଇଛି ରେଲଓ୍ବେ ଟ୍ରାକ୍, ରେଳ ପାଇଁ ବିମାନକୁ କରିବାକୁ ପଡେ ଅପେକ୍ଷା...
ସ୍ମାର୍ଟ ନୀତି ମାଧ୍ୟମରେ ଏହି ଚ୍ୟାଲେଞ୍ଜ୍ ଉପଭୋକ୍ତା, କମ୍ପାନି ଏବଂ ଗ୍ରୀଡ୍ଗୁଡ଼ିକ ପାଇଁ ବରଦାନ ସାବ୍ୟସ୍ତ ହୋଇପାରେ ବୋଲି ରିପୋର୍ଟରେ ଉଲ୍ଲେଖ କରାଯାଇଛି । ଭାରତକୁ ଏହାର ମିନିମମ୍ ଏନର୍ଜି ପର୍ଫମାନ୍ସ ଷ୍ଟାଣ୍ଡାର୍ଡ(ଏମ୍ଇପିଏସ୍) ରୋଡ୍ମ୍ୟାପ୍କୁ କଡ଼ାକଡ଼ି କରିବାକୁ ପଡ଼ିବ ବୋଲି ପରାମର୍ଶ ଦିଆଯାଇଛି । ଏସିଗୁଡ଼ିକର ଶକ୍ତି ସଞ୍ଚୟ ମାନ ବଢ଼ିବା ଦ୍ୱାରା ୨୦୩୫ ସୁଦ୍ଧା ଏସି-ଚାଳିତ ପିକ୍ ଚାହିଦା ୪୭ ଗିଗାୱାଟ୍ କମିପାରେ ବୋଲି ବିଶ୍ଳେଷଣ କରାଯାଇଛି । ଫଳରେ ଗ୍ରୀଡ୍ ଏବଂ ଉପଭୋକ୍ତା ସଭିଙ୍କର ସଞ୍ଚୟ ହେବ । ଏହି ହ୍ରାସ ଦ୍ୱାରା ୨୦୩୫ ସୁଦ୍ଧା ଭାରତର ୮ ଲକ୍ଷ କୋଟି ଟଙ୍କା ସଞ୍ଚୟ ହେବ ।
ସମାଧାନ କ'ଣ ?ଗବେଷକମାନେ କହିଛନ୍ତି ଯେ, ଏହି ସମସ୍ୟାର ସମାଧାନ କରିବାର ଏକମାତ୍ର ଉପାୟ ହେଉଛି AC ଗୁଡ଼ିକୁ ଅଧିକ ଶକ୍ତି ଦକ୍ଷ କରିବା । ଏଥିପାଇଁ ବ୍ୟୁରୋ ଅଫ୍ ଏନର୍ଜି ଏଫିସିଏନ୍ସି (BEE) କୁ ଏହାର ସର୍ବନିମ୍ନ ଶକ୍ତି କାର୍ଯ୍ୟଦକ୍ଷତା ମାନଦଣ୍ଡରେ ଉନ୍ନତି ଆଣିବାକୁ ପଡିବ । ରିପୋର୍ଟ ଅନୁଯାୟୀ, ଅଧ୍ୟୟନ ସୁପାରିଶ କରୁଛି ଯେ, ଦେଶରେ ବିକ୍ରି ହେଉଥିବା AC ପାଇଁ ସବୁଠାରୁ ମୌଳିକ ମାନଦଣ୍ଡ ମଧ୍ୟ ୨୦୩୦ ସୁଦ୍ଧା ୫-ଷ୍ଟାର ରେଟିଂ ସହିତ ସମାନ ହେବା ଉଚିତ୍ । ଏହା ପରେ, ୨୦୩୩ ସୁଦ୍ଧା ଏହାକୁ ISEER ୬.୭କୁ ଆହୁରି ବୃଦ୍ଧି କରିବା ଆବଶ୍ୟକ ବୋଲି କୁହାଯାଉଛି ।
