ନୂଆଦିଲ୍ଲୀ: ଭୋପାଳର ପୂର୍ବତନ ସାଂସଦ ପ୍ରଜ୍ଞା ସିଂହ ଠାକୁରଙ୍କ ବୟାନକୁ ନେଇ ପୁଣି ବିବାଦ । ଏଥର ସାଧ୍ବୀ ପ୍ରଜ୍ଞା ସିଂହ ଠାକୁର ସାଂପ୍ରଦାୟୀକ ଭେଦଭାବକୁ ନେଇ ଟିପ୍ପଣୀ ରଖିଛନ୍ତି, ଯାହାକୁ ନେଇ କଂଗ୍ରେସ ବିଜେପିକୁ ଟାର୍ଗେଟ କରିବା ଆରମ୍ଭ କରିଛି। ପ୍ରଜ୍ଞା ସିଂ ସମାଜରେ ବାପା-ମା ମାନଙ୍କୁ ପରାମର୍ଶ ଦେଇଥିଲେ କି, ସେମାନେ ସେମାନଙ୍କ ଝିଅ ମାନଙ୍କୁ ଅଣହିନ୍ଦୁଙ୍କ ଘରକୁ ଯିବାରୁ ବାରଣ କରନ୍ତୁ ଏବଂ ଯଦି ସେମାନେ ଅମାନ୍ୟ କରନ୍ତି ତେବେ "ତାଙ୍କ ଗୋଡ଼ ଭାଙ୍ଗି ଦିଅନ୍ତୁ"। ଏହାକୁ ନେଇ ଏବେ ବିବାଦ ପୁଣି ଥରେ ମୁଣ୍ଡ ଟେକିଛି। କଂଗ୍ରେସ ବିଜେପି ଉପରେ "ଘୃଣା" ବିସ୍ତାର କରୁଥିବାର ଅଭିଯୋଗ କରିଛି।
ଏହି ମାସର ଆରମ୍ଭରେ ଭୋପାଳରେ ଏକ ଧାର୍ମିକ କାର୍ଯ୍ୟକ୍ରମରେ ଭାଷଣ ଦେଇ, ଠାକୁର ପିତାମାତାଙ୍କୁ ଆହ୍ୱାନ କରିଥିଲେ ଯେ,ଯଦି ସେମାନଙ୍କ ଝିଅମାନେ ସେମାନଙ୍କ ଇଚ୍ଛା ବିରୁଦ୍ଧରେ କାର୍ଯ୍ୟ କରନ୍ତି ତେବେ ସେମାନଙ୍କୁ ଶାରୀରିକ ଭାବରେ ଦଣ୍ଡ ଦିଅନ୍ତୁ।
"ଆପଣଙ୍କ ମନକୁ ମଜବୁତ କରନ୍ତୁ, ଏବଂ ଏହାକୁ ଏତେ ଶକ୍ତିଶାଳୀ କରନ୍ତୁ ଯେ ଯଦି ଆମ ଝିଅ ଆମର କଥା ମାନିବେ ନାହିଁ, ଯଦି ସେ ଜଣେ ଅଣହିନ୍ଦୁଙ୍କ ଘରକୁ ଯାଆନ୍ତି, ତେବେ ତାଙ୍କ ଗୋଡ଼ ଭାଙ୍ଗିବା ବିଷୟରେ ଚିନ୍ତା କରିବାରେ କୌଣସି କସରତ ଛାଡ଼ନ୍ତୁ ନାହିଁ। ଯେଉଁମାନେ ମୂଲ୍ୟବୋଧକୁ ମାନିବେ ନାହିଁ ଏବଂ ସେମାନଙ୍କ ପିତାମାତାଙ୍କ କଥା ଶୁଣନ୍ତି ନାହିଁ ସେମାନଙ୍କୁ ଦଣ୍ଡ ଦିଆଯିବା ଉଚିତ। ଯଦି ଆପଣଙ୍କୁ ଆପଣଙ୍କ ପିଲା ମାନଙ୍କୁ ସେମାନଙ୍କ ମଙ୍ଗଳ ପାଇଁ ମାଡ଼ ମାରିବାକୁ ପଡ଼େ, ତେବେ ପଛକୁ ହଟିବେ ନାହିଁ ବୋଲି ସେ କହିଛନ୍ତି।
"ପରିବାରିକ ମୂଲ୍ୟବୋଧ ପାଳନ ନ କରୁଥିବା, ପିତାମାତାଙ୍କ କଥା ନଶୁଣୁଥିବା, ବଡ଼ମାନଙ୍କୁ ସମ୍ମାନ ନ କରୁଥିବା ଏବଂ ଘରୁ ପଳାଇବାକୁ ପ୍ରସ୍ତୁତ ଥିବା ଝିଅ ମାନଙ୍କ ପ୍ରତି ଅଧିକ ସତର୍କ ରୁହନ୍ତୁ। ସେମାନଙ୍କୁ ଆପଣଙ୍କ ଘରୁ ବାହାରକୁ ଯିବାକୁ ଦିଅନ୍ତୁ ନାହିଁ - ସେମାନଙ୍କୁ ମାଡ଼ ମାରି, ବୁଝାଇ, ଶାନ୍ତ କରି, ପ୍ରେମ ଦେଖାଇ କିମ୍ବା ଗାଳି ଦେଇ ସେମାନଙ୍କୁ ରୋକନ୍ତୁ ବୋଲି ସେ ମଧ୍ୟ କହିଛନ୍ତି ।
