ପୁରୀ,୧୨/୧୨: ଆସନ୍ତା ମାସ ୭, ୮ ଓ ୯ ତାରିଖରେ ପ୍ରବାସୀ ଭାରତୀୟ ଦିବସ ପାଳନ କରିବାକୁ ଯାଉଛନ୍ତି ସରକାର । ଏହି ସମୟରେ ପୁରୀକୁ ପ୍ରବାସୀ ଭାରତୀୟଙ୍କ ଆଗମନ ବହୁ ସଂଖ୍ୟାରେ ହେବ । ଏହାକୁ ଦୃଷ୍ଟିରେ ରଖି ପୁରୀ ଜିଲ୍ଲା ପ୍ରଶାସନ ପକ୍ଷରୁ ପ୍ରଭାସୀ ଭାରତୀୟ ଅତିଥିଙ୍କୁ ସ୍ୱାଗତ କରିବା ସହ ପୁରୀର ସଂସ୍କୃତି, ଐତିହ୍ୟ ଓ ପର୍ଯ୍ୟଟନ ସହ ପରିଚିତ କରାଇବାର ସୁବନ୍ଦୋବସ୍ତ କରାଯାଇଛି । ଏହି ଅତିଥିମାନଙ୍କୁ ହୋଟେଲରେ ରହଣି ସହ ଜିଲ୍ଲାର ପ୍ରମୁଖ ପର୍ଯ୍ୟଟନ ସ୍ଥଳକୁ ବୁଲାଇ ନେବା ନିମନ୍ତେ ଯୋଜନା ପ୍ରସ୍ତୁତ କରିଛି ପ୍ରଶାସନ।
ଏନେଇ ଜିଲ୍ଲା ପ୍ରଶାସନର ଏକ ପ୍ରସ୍ତୁତି ବୈଠକ ବୁଧବାର ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁଙ୍କ ଅଧ୍ୟକ୍ଷତାରେ ହୋଇଯାଇଛି । ଏନେଇ ଜିଲ୍ଲାପାଳ କହିଛନ୍ତି, ପୁରୀକୁ ଆସିବାକୁ ଥିବା ଅତିଥିମାନଙ୍କୁ ଭବ୍ୟ ସ୍ୱାଗତ କରିବା ନିମନ୍ତେ ପ୍ରଶାସନିକ ସମସ୍ତ ବିଭାଗ ଭିତରେ କାର୍ଯ୍ୟ ବଣ୍ଟନ ହୋଇଛି । ସମସ୍ତେ ସମସ୍ତଙ୍କ ଦାୟିତ୍ୱ ନିର୍ବାହ କରିବେ । ଅତିଥିମାନଙ୍କୁ ମୁଖ୍ୟତଃ ଶ୍ରୀମନ୍ଦିର, କୋଣାର୍କ, ରାମଚଣ୍ଡୀ, ସାତପଡ଼ା, ରଘୁରାଜପୁର ପ୍ରଭୃତି ପର୍ଯ୍ୟଟନ ଓ ଐତିହ୍ୟସ୍ଥଳ ବୁଲିବାର ବନ୍ଦୋବସ୍ତ କରାଯାଇଛି । ଅତିଥିମାନଙ୍କ ପୁରୀରେ ରହଣି ନିମନ୍ତେ ୫୧ଟି ହୋଟେଲରେ ୧୬୦୦ ରୁମ୍ ବୁକ୍ କରାଯାଉଛି । ସ୍ଲଟ୍ ବୁକିଂ ଓ ଅନ୍ୟାନ୍ୟ ଅନୁସଙ୍ଗିକ ସୁବିଧା କରିବାକୁ ପର୍ଯ୍ୟଟନ ବିଭାଗ ସହ ଓଟିଡିସି ଦାୟିତ୍ୱ ଦିଆଯାଇଛି । ଭୁବନେଶ୍ୱର ସମେତ ପୁରୀରେ ଏହି ସମୟରେ ଆଦିବାସୀ ମେଳା ଓ ପଲ୍ଲଶ୍ରୀ ମେଳା କରାଯିବ । ଏଠାରେ ସେମାନେ ରାଜ୍ୟର ସଂସ୍କୃତି, ଐତିହ୍ୟ, ପର୍ଯ୍ୟଟନର ସ୍ଥିତିକୁ ଅନୁଭବ କରିବେ । ଯେପରି ଭଲ ଅନୁଭୂତି ନେଇ ସେମାନେ ଯିବେ ସେଥିନିମନ୍ତେ ନିର୍ଦ୍ଧାରିତ ସମୟ ସୀମା ଭିତରେ ସମସ୍ତ ପ୍ରସ୍ତୁତି କରାଯିବ ।
ଏନେଇ ପୁରୀ ପର୍ଯ୍ୟଟନ କାର୍ଯ୍ୟାଳୟ ସହକାରୀ ନିର୍ଦ୍ଦେଶକ ସରୋଜ ପ୍ରଧାନ କହିଛନ୍ତି, ପ୍ରବାସୀ ଭାରତୀୟଙ୍କ ରହଣି ନିମନ୍ତେ ପୁରୀ, ଭୁବନେଶ୍ୱର ଓ କଟକରେ ମୋଟ ୩୫୦୦ ରୁମ୍ ବୁକ୍ କରି ରଖାଯାଇଛି । ବୈଦେଶିକ ମନ୍ତ୍ରଣାଳୟକୁ ଏହି ରୁମ୍ରେ ବୁକିଂ ଦାୟିତ୍ୱକୁ ଦେଇଦିଆଯାଇଛି । ଅତିଥିମାନେ ବୈଦେଶିକ ମନ୍ତ୍ରଣାଳୟ ଜରିଆରେ ରୁମ୍ ବୁକ୍ କରିବା ପରେ ଆସି ରହିବେ । ସେମାନଙ୍କ ବୁଲିବା ଦାୟିତ୍ୱ ସ୍ଥାନୀୟ ପ୍ରଶାସନ କରିବ । ବିଶେଷ ଭାବେ ଅଳ୍ପ ସମୟ ଭିତରେ ପୁରୀ ଶ୍ରୀମନ୍ଦିର, ବ୍ଲୁ ଫ୍ଲାଗ୍ ବିଚ୍, କୋଣାର୍କ, ରାମଚଣ୍ଡୀ ବିଚ୍, ସାତପଡ଼ା, ରଘୁରାଜପୁର ପ୍ରଭୃତି ସ୍ଥାନ ଯେପରି ପ୍ରବାସୀ ଭାରତୀୟମାନେ ବୁଲି ପାରିବେ ସେଥିନିମନ୍ତେ ପଦକ୍ଷେପ ନିଆଯାଉଛି ।
ଏହି ସମୟରେ ପ୍ରବାସୀ ଭାରତୀୟଙ୍କୁ ଆମୋଦିତ କରିବାକୁ ପୁରୀ ବେଳାଭୂମିର ବିଭିନ୍ନ ସ୍ଥାନରେ ପଲିଶ୍ରୀମେଳା, ବେଳାଭୂମି ମହୋତ୍ସବ, ବୋଟିଂ ପ୍ରତିଯୋଗିତା, କାଇଟ୍ ଫେଷ୍ଟିଭାଲ୍ ପ୍ରଭୃତିର ଆୟୋଜନ କରାଯିବ । ପ୍ରବାସୀ ଭାରତୀୟମାନେ ଯେପରି ପୁରୀ ତଥା ଆମ ରାଜ୍ୟର ପର୍ଯ୍ୟଟନ ଏବଂ ଐତିହ୍ୟ ଭିତ୍ତିଭୂମିର ଉତ୍ତମ ଅନୁଭୂତି ନେଇ ଫେରିବେ ତାହା ଉପରେ ସତର୍କ ଦୃଷ୍ଟି ଦିଆଯିବ । ସେମାନେ ଭଲ ଅନୁଭୂତି ନେଇ ଗଲେ ଏହା ପରବର୍ତ୍ତୀ ସମୟରେ ପୁରୀ ତଥା ଓଡ଼ିଶାରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧିରେ ବେଶ ସହାୟକ ହେବ ବୋଲି ଆଶା ରହିଛି।
