ନୂଆଦିଲ୍ଲୀ,୧୬/୦୭: ଅନାଦି ଅନନ୍ତ ସେ ଅପୂର୍ଵ ଅକାରଣ । ଆଲୋକିକ ମହିମା ତାଙ୍କର ସେ ମହାବାହୁ । ସକଳ ବିଶ୍ୱ ବ୍ରହାଣ୍ଡ ତାଙ୍କରି ସର୍ଜନା । ସକାଳ, ସଞ୍ଜ, ଦିନ ରାତି ତୁମ ନିର୍ଦ୍ଦେଶରେ ପରିଚାଳିତ । ଅପୂର୍ବ ଲୀଳାମୟ ତୁମେ କିଏବା ପାରିବ ତୁମ ମହିମା କରି ବର୍ଣନା କରି । ଆଜି ପବିତ୍ର ବିଶ୍ୱ ପ୍ରସିଦ୍ଧ ଘୋଷଯାତ୍ରା । ଶ୍ରୀଗୁଣ୍ଡିଚା ଯାତ୍ରାରେ ରଥାରୂଢ଼ ହେବେ ଦାରୁବ୍ରହ୍ମ । ଗତ ନୀଳାଦ୍ରି ବିଜେରେ ଭକ୍ତକୁ ପ୍ରତିଶ୍ରୁତି ଦେଇଥିଲେ କାଳିଆ ସାଆନ୍ତେ । ଆର ରଥଯାତ୍ରାକୁ ପୁଣି ଭେଟ । ସଭିଙ୍କ ପ୍ରତୀକ୍ଷା ମିଳନର ସେହି ଦିବ୍ୟ ମୁହୂର୍ତ୍ତକୁ । ଭାବ ଓ ଭକ୍ତିରେ ଭିଜିବେ ଭକ୍ତ ଓ ଭଗବାନ । ଏହି ଦିବ୍ୟ ଅନୁଭବ ପାଇଁ ପ୍ରସ୍ତୁତ ଅଗଣିତ ଭକ୍ତ, ରଥ ଓ ପଥ । ସିଂହଦ୍ୱାରେ ଅପେକ୍ଷାରତ ରଥତ୍ରୟ । ବଡ଼ଦାଣ୍ଡରେ ଉପସ୍ଥିତ ଲକ୍ଷାଧିକ ଉତ୍କଣ୍ଠିତ ଭକ୍ତ । ଭଜନ କୀର୍ତ୍ତନରେ କମ୍ପୁଛି ରଥ ପଥ । ପବିତ୍ର ରଥଯାତ୍ରା ଅବସରରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ଏକ୍ସରେ ଘୋଷଯାତ୍ରା ଶୁଭେଚ୍ଛା ଜଣାଇ ରାଷ୍ଟ୍ରପତି କହିଛନ୍ତି, '' ମହାପ୍ରଭୁଙ୍କ ରଥଯାତ୍ରାର ଏହି ପବିତ୍ର ଅବସରରେ, ମୁଁ ଦେଶ ଏବଂ ବିଦେଶରେ ଥିବା ସମସ୍ତ ଶ୍ରୀଜଗନ୍ନାଥ ଭକ୍ତଙ୍କୁ ମୋର ଆନ୍ତରିକ ଶୁଭକାମନା ଜଣାଉଛି ।  ଏହା ଏକ ଲୋକପ୍ରିୟ ବିଶ୍ୱାସ ଯେ, ପବିତ୍ର ରଥଯାତ୍ରାର ଏହି ମହାନ ପରମ୍ପରା ସମୟରେ, ମହାପ୍ରଭୁ ଶ୍ରୀଜଗନ୍ନାଥ, ଚକ୍ରରାଜ ସୁଦର୍ଶନ, ବଡ଼ ଭାଇ ବଳଭଦ୍ର ଏବଂ ଭଉଣୀ ସୁଭଦ୍ରାଙ୍କ ସହିତ ଭକ୍ତମାନଙ୍କୁ ସାକ୍ଷାତ କରନ୍ତି । ଭକ୍ତ ଏବଂ ପ୍ରଭୁଙ୍କ ମଧ୍ୟରେ ଏକତାର ଏହି ଭାବପ୍ରବଣ ମୁହୂର୍ତ୍ତ ଅତୁଳନୀୟ । ମୋର ପ୍ରାର୍ଥନା ଯେ, ମହାପ୍ରଭୁ ଶ୍ରୀ ଜଗନ୍ନାଥଙ୍କ କୃପାରୁ, ଆମ ଦେଶ ଏବଂ ଏହାର ଲୋକଙ୍କ ସୁଖ ଏବଂ ସମୃଦ୍ଧିରେ ନିରନ୍ତର ବୃଦ୍ଧି ହେଉ। ଜୟ ଜଗନ୍ନାଥ ! ''

ଏକ୍ସରେ ଘୋଷଯାତ୍ରାରେ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲେଖିଛନ୍ତି, ''ପ୍ରଭୁ ଜଗନ୍ନାଥଙ୍କ ରଥଯାତ୍ରାର ପବିତ୍ର ଅବସରରେ, ମୋର କାମନା ଯେ ତାଙ୍କର ଆଶୀର୍ବାଦ ଆମ ସମସ୍ତଙ୍କ ଉପରେ ଚିରକାଳ ରହୁ । ତାଙ୍କର ଦିବ୍ୟ କୃପା ଆମ ସମସ୍ତ ଦେଶବାସୀଙ୍କ ଜୀବନରେ ନୂତନ ଶକ୍ତି ସଞ୍ଚାର କରୁ ।''

ଏହା ବି ପଢନ୍ତୁ...ରିଲିଜ୍ ହେବନି ଆନିମେଟେଡ୍ ଫିଲ୍ମ ‘ମହାପ୍ରଭୁ ଜଗନ୍ନାଥ’, କଟକଣା ଜାରି କଲେ ହାଇକୋର୍ଟ  

ସେହିପରି ଗୃହମନ୍ତ୍ରୀ ଅମିତ୍ ଶାହ ରଥଯାତ୍ରା ଶୁଭେଚ୍ଛା ଜଣାଇ ଲେଖିଛନ୍ତି, ''ପ୍ରଭୁ ଶ୍ରୀ ଜଗନ୍ନାଥଙ୍କ ରଥଯାତ୍ରାର ପବିତ୍ର ଅବସରରେ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା । ବିଶ୍ୱ ପ୍ରସିଦ୍ଧ ଜଗନ୍ନାଥ ରଥଯାତ୍ରା ଅଟଳ ବିଶ୍ୱାସ, ବିଶ୍ୱାସ ଏବଂ ଭକ୍ତିର ପ୍ରତୀକ। ଏହି ପବିତ୍ର ରଥଯାତ୍ରା ଭାରତର ସମୃଦ୍ଧ ସାଂସ୍କୃତିକ ଐତିହ୍ୟକୁ ସଂରକ୍ଷଣ କରେ ଏବଂ ଦିବ୍ୟତା ପ୍ରତି ଅଖଣ୍ଡ ଶ୍ରଦ୍ଧା ପ୍ରଦର୍ଶନ କରେ । ମୁଁ ପ୍ରଭୁ ଜଗନ୍ନାଥ, ବୀର ବଳଭଦ୍ର ଏବଂ ମାତା ସୁଭଦ୍ରାଙ୍କ ନିକଟରେ ସମସ୍ତଙ୍କ ସୁଖ, ସମୃଦ୍ଧି ଏବଂ ମଙ୍ଗଳ ପାଇଁ ପ୍ରାର୍ଥନା କରୁଛି । ''

ପବିତ୍ର ରଥଯାତ୍ରା ଅବସରରେ ଶୁଭେଚ୍ଚା ଜଣାଇଛନ୍ତି ଉପରାଷ୍ଟ୍ରପତି ସିପି ରାଧାକ୍ରିଷ୍ଣନ । ସେ କହିଛନ୍ତି, '' ବିଶ୍ୱପ୍ରସିଦ୍ଧ ଘୋଷଯାତ୍ରାକେ ସମସ୍ତଙ୍କୁ ମୋର ହାର୍ଦ୍ଦିକ ଶୁଭେଚ୍ଛା । ପବିତ୍ର ରଥଯାତ୍ରା ବିଶ୍ୱାସ, ଭକ୍ତି, ସମାନତା ଏବଂ ସାମୂହିକ ସମନ୍ୱୟର ମୂଲ୍ୟବୋଧକୁ ପ୍ରତିଫଳିତ କରେ, ସମସ୍ତ ଭିନ୍ନତାରୁ ଉର୍ଦ୍ଧ୍ୱକୁ ଆସି ଲୋକଙ୍କୁ ଏକାଠି କରେ । ଏହା ଆମର ସମୃଦ୍ଧ ସଭ୍ୟତା ନୀତି ଏବଂ ସ୍ଥାୟୀ ଆଧ୍ୟାତ୍ମିକ ପରମ୍ପରାର ଏକ ସ୍ପନ୍ଦନଶୀଳ ଉତ୍ସବ। ମହାପ୍ରଭୂ ଜଗନ୍ନାଥଙ୍କ ଦିବ୍ୟ ଆଶୀର୍ବାଦ ଆମକୁ ଧାର୍ମିକତାର ପଥରେ ଚାଲିବାକୁ, ଆମର ସାମୂହିକ ସଂକଳ୍ପକୁ ମଜବୁତ କରିବାକୁ ଏବଂ ଆମ ଦେଶରେ ଶାନ୍ତି ଏବଂ ଏକତାକୁ ବୃଦ୍ଧି କରିବାକୁ ପ୍ରେରଣା ଦେଉ ।''