କୋରାପୁଟ,୨୫/୦୭: ହିଟାଚି କ୍ୟାସ୍ ମ୍ୟାନେଜମେଣ୍ଟ ସଂସ୍ଥାର ୧୧ ଲକ୍ଷ ୪ ହଜାର ୩୭୦ ଟଙ୍କା ଆତ୍ମସାତ କରିବା ଅଭିଯୋଗରେ କୋରାପୁଟ ଟାଉନ ଥାନା ପୁଲିସ ୩ଜଣଙ୍କୁ ଗିରଫ କରିଛି । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ସତ୍ୟାନନ୍ଦ ପାତ୍ର ସୂଚନା ଦେଇଛନ୍ତି ।
ସୂଚନା ମୁତାବକ, କୋରାପୁଟ ବ୍ରାଞ୍ଚ୍ ମ୍ୟାନେଜର ଆକ୍ସିସ ବ୍ୟାଙ୍କରେ ଟଙ୍କା ଡିପୋଜିଟ୍ ନିମନ୍ତେ ବାଇକରେ ଯିବାବେଳେ କିଛି ଦୁର୍ବୃତ୍ତ ତାଙ୍କଠାରୁ ଟଙ୍କା ଲୁଟି ନେଇଥିବା ନେଇ ଭୁବନେଶ୍ୱର ରିଜିଓନାଲ୍ ଅଫିସର ମ୍ୟାନେଜର ଥାନାରେ ଅଭିଯୋଗ କରିଥିଲେ । ଅଭିଯୋଗ ଅନୁଯାୟୀ ଟାଉନ ଥାନାରେ ଏକ ମାମଲା ରୁଜୁ କରିବା ପରେ ସ୍ୱତନ୍ତ୍ର ଟିମ୍ ଗଠନ କରାଯାଇ ଛାନଭିନ୍ ଆରମ୍ଭ ହୋଇଥିଲା। ପୁଲିସ ପ୍ରଥମେ କୋରାପୁଟ ବ୍ରାଞ୍ଚ ମ୍ୟାନେଜରଙ୍କୁ ପଚରାଉଚରା ପରେ ସିସିଟିଭି ଫୁଟେଜରୁ ନିଜେ ନାଟକ ରଚିଥିବା ଜାଣିବାକୁ ପାଇଥିଲେ। ଅଭିଯୁକ୍ତ ଶିବ ପ୍ରସାଦ ନାଗକୁ ଜୟପୁର ଗୋପବନ୍ଧୁ ନଗରଠାରୁ ଗିରଫ କରି ଜେରା କରିବା ପରେ ଘଟଣାର ପର୍ଦ୍ଦାଫାଶ ହୋଇଥିଲା। ଘଟଣାରେ ତିନି ଜଣଙ୍କୁ ପୁଲିସ ଗିରଫ କରିଥିବା ବେଳେ ଜଣେ ଅଭିଯୁକ୍ତ ଫେରାର ଥିବା ଥାନା ଅଧିକାରୀ ସୂଚନା ଦେଇଛନ୍ତି । ଅଭିଯୁକ୍ତମାନଙ୍କ ନିକଟରୁ ପୁଲିସ ୪ ଲକ୍ଷ ୧୦ ହଜାର ୩୧୦ ଟଙ୍କା ଓ ଅପରାଧରେ ବ୍ୟବହୃତ ଏକ ମୋଟର ସାଇକେଲ ଜବତ କରିଛି। ଗିରଫ ତିନି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
