ନୂଆଦିଲ୍ଲୀ: ପଞ୍ଜାବ ଓ ହରିୟାଣା ହାଇକୋର୍ଟ ଗତ ମଙ୍ଗଳବାର ଦିନ ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସ୍ଥାନକୁ ‘ଶହୀଦ ହିନ୍ଦୁ ଭ୍ୟାଲି ପର୍ଯ୍ୟଟକ ସ୍ଥାନ’ ଭାବେ ନାମକରଣ କରିବା ଓ ହମଲାରେ ମୃତ୍ୟୁ ଘଟିଥିବା ଲୋକଙ୍କୁ ‘ଶହୀଦ’ ମାନ୍ୟତା ଦେବା ପାଇଁ ଦାଖଲ ହୋଇଥିବା ଏକ ଜନହିତ ମାମଲା (ପିଆଇଏଲ)କୁ ଖାରଜ କରିଛନ୍ତି। ଏହି ଆବେଦନ ଜଣେ ଓକିଲଙ୍କ ଦ୍ୱାରା ଦାଖଲ ହୋଇଥିଲା।

ଆପଣଙ୍କୁ ଜଣାଇରଖୁ ଯେ, ଗତ ଏପ୍ରିଲ ମାସ ୨୨ ତାରିଖରେ ପହଲଗାମର ବୈସରଣ ଉପତ୍ୟକାରେ ଆତଙ୍କବାଦୀମାନେ ଗୁଳିଚାଳନା କରି ୨୬ ଜଣ ପର୍ଯ୍ୟଟକଙ୍କୁ ହତ୍ୟା କରିଥିଲେ। ଯେଉଁମାନଙ୍କ ମଧ୍ୟରେ ୨୫ ଜଣ ଭାରତୀୟ ଏବଂ ଜଣେ ନେପାଳୀ ନାଗରିକ ରହିଥିଲେ। ଏହି ଆକ୍ରମଣରେ ଲସ୍କର-ଏ-ତୈବା (LeT) ଆତଙ୍କବାଦୀ ଗୋଷ୍ଠୀର ଏକ ଶାଖା, ଦି ରେଜିଷ୍ଟାନ୍ସ ଫ୍ରଣ୍ଟ(ଟିଆରଏଫ) ଦ୍ୱାରା ସଂଗଠିତ ଏବଂ ଯୋଜନାବଦ୍ଧ ଆକ୍ରମଣ ଥିଲା ବୋଲି ଘୋଷଣା କରିଥିଲା। କିନ୍ତୁ ପରେ ଭାରତ ସରକାରଙ୍କ କଡା କାର୍ଯ୍ୟାନୁଷ୍ଠାନ ଦେଖି ଟିଆରଏଫ ୟୁ-ଟର୍ଣ୍ଣ ନେଇଥିଲା। ପରେ ଏହି ଗୋଷ୍ଠୀ ଆକ୍ରମଣ ସହିତ କୌଣସି ସମ୍ପର୍କକୁ ଅସ୍ୱୀକାର କରିଥିଲା। ଏହି ଘଟଣାରେ ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧପରି ପରିସ୍ଥିତି ସୃଷ୍ଟି କରିଥିଲା।

ଏହି ହମଲାର ଜବାବରେ ଭାରତୀୟ ସଶସ୍ତ୍ର ବାହିନୀ ମଇ ୭ ତାରିଖରେ ‘ଅପରେସନ ସିନ୍ଦୁର’ ଆରମ୍ଭ କରି ପାକିସ୍ତାନ ଓ ପାକିସ୍ତାନ ଅଧିକୃତ କଶ୍ମୀର (PoK)ରେ ଥିବା ନଅଟି ଆତଙ୍କବାଦୀ ଶିବିର ଉପରେ ଲକ୍ଷ୍ୟଭେଦୀ ଆକ୍ରମଣ କରିଥିଲେ। ଯେଉଁଥିରେ ପ୍ରାୟ ୧୦୦ରୁ ଅଧିକ ଆତଙ୍କୀ ନିହତ ହୋଇଥିଲେ। 

ତେବେ ଜାରି ହୋଇଥିବା ପିଆଇଏଲ ପାଇଁ କୌଣସି ନିର୍ଦ୍ଦେଶ ଜାରି କରିବାକୁ ମନା କରିଦେଇଛନ୍ତି ପଞ୍ଜାବ ଓ ହରିୟାଣା ହାଇକୋର୍ଟ। ଏହା ପୂର୍ବରୁ ସୁପ୍ରିମକୋର୍ଟ ମଧ୍ୟ ପହଲଗାମ ହମଲା ସମ୍ପର୍କିତ ଅନ୍ୟ ଏକ ଜନହିତ ମାମଲାକୁ ଖାରଜ କରିବା ସହ ଆବେଦନକାରୀଙ୍କୁ ପ୍ରଚାର ପାଇଁ ମାମଲା ଦାୟର କରିବା ଅଭିଯୋଗରେ ତାଗିଦ କରିଥିଲେ।