ନୂଆଦିଲ୍ଲୀ: ପଞ୍ଜାବ ପୋଲିସକୁ ଏକ ବଡ ସଫଳତା ମିଳିଛି। ଦିଲ୍ଲୀ ଅନ୍ତର୍ଜାତୀୟ ବିମାନବନ୍ଦରରୁ ବବର ଖାଲସା ଇଣ୍ଟରନ୍ୟାସନାଲ ଆତଙ୍କବାଦୀ ମଡ୍ୟୁଲର ଆଉ ଜଣେ କାର୍ଯ୍ୟକର୍ତ୍ତା ସଚିନଦୀପ ସିଂହ ଓରଫ ସଚିନଙ୍କୁ ଗିରଫ କରିଛି। ଅଭିଯୁକ୍ତ ଜଣକ ଅମୃତସରର ଅଜନଲାର ବାସିନ୍ଦା ଏବଂ ନାନ୍ଦେଡ଼ ହତ୍ୟା ମାମଲାରେ ସେ ପୋଲିସ ପାଇଁ ଓ୍ବାଣ୍ଟେଡ ଥିଲା। 

ପଞ୍ଜାବ ପୋଲିସର କହିବା ଅନୁଯାୟୀ, ସଚିନଦୀପ ଗିରଫଦାରୀ ଏଡାଇବା ପାଇଁ ଥାଇଲ୍ୟାଣ୍ଡ ପଳାଇ ଯାଇଥିଲା। ସେ ଦିଲ୍ଲୀ ଫେରୁଥିବା ସୂଚନା ପାଇବା ମାତ୍ରେ ପୋଲିସ ତାଙ୍କୁ ଗିରଫ କରିଛି। ଏହି ଆତଙ୍କବାଦୀଙ୍କ ବିରୋଧରେ ପଞ୍ଜାବ ପୋଲିସ ଏକ ଲୁକ୍ ଆଉଟ୍ ସର୍କୁଲାର (LOC) ଜାରି କରିଥିଲା।

ଦୁଇ ସପ୍ତାହ ପୂର୍ବରୁ ପଞ୍ଜାବ ପୋଲିସ ଏହି ମାମଲାରେ ବବର ଖାଲସା ଇଣ୍ଟରନ୍ୟାସନାଲର ଆଉ ଦୁଇ ଜଣ କାର୍ଯ୍ୟକର୍ତ୍ତା ଜଗଦୀଶ ସିଂହ ଓରଫ ଜଗା ଏବଂ ଶୁଭଦୀପ ସିଂହ ଓରଫ ଶୁଭଙ୍କୁ ଗିରଫ କରିବା ପରେ ଏହି ଗିରଫଦାରୀ ହୋଇଛି। ସେମାନଙ୍କ ଠାରୁ ଦୁଇଟି 32 ବୋର ପିସ୍ତଲ ଏବଂ ପାଞ୍ଚଟି କାର୍ଟ୍ରିଜ୍ ଜବତ କରାଯାଇଛି।

ପୋଲିସର କହିବା ଅନୁଯାୟୀ, ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ସଚିନଦୀପ ବବର ଖାଲସା ଇଣ୍ଟରନ୍ୟାସନାଲର ଆତଙ୍କବାଦୀ ମାନଙ୍କୁ ସୁରକ୍ଷିତ ଆଡ୍ଡା, ଲଜିଷ୍ଟିକ୍ ସମର୍ଥନ ଏବଂ ପାଣ୍ଠି ଯୋଗାଇ ଦେଉଥିଲା । ସେ ପାକିସ୍ତାନସ୍ଥିତ ଆତଙ୍କବାଦୀ ହରବିନ୍ଦର ସିଂହ ରିଣ୍ଡା ଏବଂ  ଆମେରିକାସ୍ଥିତ ବବର ଖାଲସା ଇଣ୍ଟରନ୍ୟାସନାଲ୍ କାର୍ଯ୍ୟକର୍ତ୍ତା ହରପ୍ରୀତ ସିଂହ ଓରଫ ହାପି ପାସିଆନଙ୍କ ନିର୍ଦ୍ଦେଶରେ କାମ କରୁଥିଲା। ବର୍ତ୍ତମାନ ଆତଙ୍କବାଦୀଙ୍କୁ ପଚରାଉଚରା ଚାଲିଛି।