କଟକ,୨୫/୦୯: ଇନ୍ସର୍ଭିସ୍ ଶିକ୍ଷକମାନଙ୍କର ସ୍ୱତନ୍ତ୍ର ଶିକ୍ଷକ ଯୋଗ୍ୟତା ପରୀକ୍ଷା(ସ୍ପେସାଲ୍ ଓଟିଇଟି) ଆସନ୍ତା ୨୭ ତାରିଖରେ ଅନୁଷ୍ଠିତ ହେବ । ମାଧ୍ୟମିକ ଶିକ୍ଷା ପରିଷଦ(ବୋର୍ଡ)ଦ୍ୱାରା ପରିଚାଳିତ ଏହି ପରୀକ୍ଷା ପାଇଁ ବୁଧବାର ପ୍ରାଥମିକ ପର୍ଯ୍ୟାୟରେ ୫ଟି ଉପାନ୍ତ ଜିଲ୍ଲା କଳାହାଣ୍ଡି, ନବରଙ୍ଗପୁର, କୋରାପୁଟ, ମାଲକାନଗିରି ଓ ରାୟଗଡ଼ା ଅଭିମୁଖେ ପ୍ରଶ୍ନପତ୍ର ଯାଇଛି । ପ୍ରଶ୍ନପତ୍ରଗୁଡ଼ିକ ଡିଜି ଲକର୍ରେ ରହିଛି । ଦୁଇ ଜଣ ବନ୍ଧୁକଧାରୀ ପୁଲିସ ଓ ବୋର୍ଡ କର୍ମଚାରୀଙ୍କ ସହାୟତାରେ ପ୍ରତ୍ୟେକ ସେଣ୍ଟର୍କୁ ପ୍ରଶ୍ନପତ୍ର ପଠା ଯାଉଛି । ଆସନ୍ତା ୨୬ ତାରିଖ ସୁଦ୍ଧା ରାଜ୍ୟର ସମସ୍ତ ୧୯୩ଟି ଯାକ କେନ୍ଦ୍ରରେ ପ୍ରଶ୍ନପତ୍ର ପହଞ୍ଚିଯିବ ବୋଲି ବୋର୍ଡ ସଭାପତି ଶ୍ରୀକାନ୍ତ ତରାଇ କହିଛନ୍ତି ।
ପରୀକ୍ଷାରେ ଅନିୟମିତତା ତଥା ଭାଇରାଲ୍ ଓ କପି ଆଦି ନିୟନ୍ତ୍ରଣ ପାଇଁ ପୂର୍ବ ପରି ପ୍ରତି ପ୍ରଶ୍ନପତ୍ରରେ କ୍ୟୁଆର୍ କୋର୍ଡ ଏବଂ ୱାଟର୍ ମାର୍କ ରହିଛି । ୧୯୩ଟି ଯାକ ସେଣ୍ଟର୍ରେ ସିସିଟିଭି ଖଞ୍ଜା ଯାଇଛି । ଦୁଇଟି ଯାକ ସିଟିଂରେ ପରୀକ୍ଷା ସମୟର ଲାଇଭ୍ ଭିଡିଓ(ସିଧାପ୍ରସାରଣ) ବ୍ୟବସ୍ଥା ରହିଛି । ଏଥିଲାଗି ବୋର୍ଡ କାର୍ଯ୍ୟାଳୟରେ ଏକ କମାଣ୍ଡ୍ କଣ୍ଟ୍ରୋଲ ରୁମ୍ ଖୋଲାଯାଇଛି । ଉକ୍ତ କଣ୍ଟ୍ରୋଲ୍ ରୁମ୍ ସହ ରାଜ୍ୟର ୧୯୩ଟି ଯାକ କେନ୍ଦ୍ର ଯୋଡ଼ି ହୋଇରହିଛି । ପରୀକ୍ଷା କେନ୍ଦ୍ରରେ ଦୁଇ ଜଣ ଲେଖାଏଁ ସଶସ୍ତ୍ର ପୁଲିସ ମୁତୟନ ଲାଗି ନିଷ୍ପତ୍ତି ହୋଇଛି । ଅନ୍ୟପକ୍ଷରେ ପରୀକ୍ଷା ପରିଚାଳନା ବ୍ୟବସ୍ଥାର ଅନୁଧ୍ୟାନ ଲାଗି ବୋର୍ଡ ପକ୍ଷରୁ ୩୧ଟି ସ୍କ୍ୱାଡ୍ ଗଠନ କରାଯାଇଛି ।ଏହାବାଦ୍ ଜିଲ୍ଲା ସ୍ତରରେ ଡିଇଓମାନେ ପୃଥକ ସ୍କ୍ୱାଡ୍ ଗଠନ ଲାଗି କୁହାଯାଇଛି । ଅନ୍ୟପକ୍ଷରେ ୨୬ ତାରିଖରେ ବର୍ଷା ଆଶଙ୍କା ଥିବାରୁ ସମସ୍ତ କେନ୍ଦ୍ରରେ ଜେନେରେଟର୍ ବନ୍ଦୋବସ୍ତ କରିବାକୁ ଡିଇଓମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଏହି ସ୍ପେସାଲ୍ ଓଟିଇଟି ପାଇଁ ରାଜ୍ୟରେ ଆବେଦନରତ ୭୫ ହଜାରରୁ ଅଧିକ ଇନ୍ସର୍ଭିସ ଶିକ୍ଷକଙ୍କ ମଧ୍ୟରୁ ୨ ହଜାର ୬ ଶହ ଜଣ ଶାରୀରିକ ଅକ୍ଷମ ପ୍ରାର୍ଥୀ ଥିବା ସୂଚନା ମିଳିଛି । ଉକ୍ତ ପ୍ରାର୍ଥୀମାନଙ୍କୁ ଅଧିକ ୫୦ ମିନିଟ୍ ସମୟ ଦିଆଯିବ । ଏହି ପରୀକ୍ଷା ଦୁଇଟି ସିଟିଂରେ ହେବ । ପେପର-୧ ପରୀକ୍ଷା ପ୍ରଥମ ସିଟିଂରେ ସକାଳ ୯ଟାରୁ ଦିନ ୧୧ଟା ୩୦ ମିନିଟ୍ ପର୍ଯ୍ୟନ୍ତ ଚାଲିବ । ସେହିପରି ପେପର-୨ ପରୀକ୍ଷା ଅପରାହ୍ନ ୨ଟାରୁ ଆରମ୍ଭ ହୋଇ ଅପରାହ୍ନ ୪ଟା ୩୦ ମିନିଟ୍ରେ ଶେଷ ହେବ । ପୂର୍ବ ପରି ସେହି ପୁରୁଣା ପାର୍ଟନ ଅନୁସାରେ ପ୍ରଶ୍ନ ପ୍ରସ୍ତୁତି କରାଯାଇଥିବା ବୋର୍ଡ ପକ୍ଷରୁ ସୂଚନା ଦିଆଯାଇଛି ।
