ନୂଆଦିଲ୍ଲୀ,୧୨/୦୭: ଏବେ ସାରା ବିଶ୍ୱର ଟେକ୍ନୋଲୋଜି କମ୍ପାନି ଗୁଡ଼ିକରେ ବଡ଼ ଧରଣର ଛଟେଇ ଦେଖିବାକୁ ମିଳୁଛି । ବିଶ୍ୱ ବଜାର ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)କୁ ଗୁରୁତ୍ୱ ଦେଉଥିବାରୁ ଏଭଳି ଛଟେଇ ହେଉଛି । ଏଣ୍ଟ୍ରି ସ୍ତରୀୟ ଇଞ୍ଜିନିୟରଙ୍କ କାମକୁ ଏଆଇ ତ୍ୱରିତ ଏବଂ ବେଶ ଭଲ ଭାବେ କରିପାରିବ ବୋଲି କମ୍ପାନି ସିଇଓ କହୁଛନ୍ତି । ଏଭଳି ସ୍ଥିତିରେ ଏଆଇ ବିକାଶ ଲାଗି ଟେକ୍ ପ୍ରତିଭାଙ୍କୁ କମ୍ପାନି ଗୁଡ଼ିକ ଲୋଭନୀୟ ଅଫର ଦେଉଛନ୍ତି ।
ଗତ ୨ ବର୍ଷରେ ଗୁଗଲ ୧୨ ହଜାର କର୍ମଚାରୀଙ୍କୁ କାଢ଼ି ଦେଲାଣି । କେବଳ ମେ ମାସରେ ବିଦା ହୋଇଛନ୍ତି ୨୦୦ରୁ ଉଦ୍ଧ୍ୱର୍ କର୍ମଚାରୀ । ମାଇକ୍ରୋସଫ୍ଟରୁ ଛଟେଇ ହେଲେଣି ୧୬ ହଜାରରୁ ଉଦ୍ଧ୍ୱର୍ । ଚଳିତ ମାସରେ ଆଉ ୯ ହଜାର କର୍ମଚାରୀଙ୍କୁ କାଢ଼ି ଦେବ କମ୍ପାନି । କେବଳ ଏହି ୨ ପ୍ରମୁଖ ଟେକ୍ କମ୍ପାନି ନୁହନ୍ତି ଆମାଜନ, ଇଣ୍ଟେଲ, ସିସ୍କୋ, ଏକ୍ସ ଏବଂ ମେଟା ଭଳି କମ୍ପାନି ମଧ୍ୟ ସମାନ ରାସ୍ତା ଆପଣାଉଛନ୍ତି ।
ଗୋଟିଏ ପଟେ ଏଣ୍ଟ୍ରି ସ୍ତର ଇଞ୍ଜିନିୟରଙ୍କ ଚାକିରି ଯାଉଛି । ଅନ୍ୟ ପଟେ ବଛା ବଛା ଏଆଇ ପ୍ରତିଭାଙ୍କୁ ମିଳୁଥିବା ବେତନ ପ୍ୟାକେଜ ଆଶ୍ଚର୍ଯ୍ୟ କରିଦେବା ଭଳି । ଟପ୍ ଏଆଇ ଇଞ୍ଜିନିୟରଙ୍କୁ ନିଯୁକ୍ତି ଦେବା ଟ୍ରେଣ୍ଡ୍ ମାଇକ୍ରୋସଫ୍ଟର ସତ୍ୟ ନାଦେଲାଙ୍କଠାରୁ ଆରମ୍ଭ ହୋଇଛି । ଇନଫ୍ଲେକ୍ସନ ଏଆଇକୁ ଅଧିଗ୍ରହଣ ଲାଗି ମାଇକ୍ରୋସଫ୍ଟ ୬୫୦ ନିୟୁତ ଡଲାରର ଏକ ଡିଲ୍ କରିଛି । ଡିପ୍ ମାଇଣ୍ଡର ପୂର୍ବତନ ପ୍ରତିଷ୍ଠାତା ମୁସ୍ତାଫା ସୁଲେମାନ ଏବଂ ତାଙ୍କ ଟିମ୍କୁ ରଖିବାକୁ ନାଦେଲା ଏଭଳି ଡିଲ୍ କରିଛନ୍ତି । ତେବେ ପ୍ରମୁଖ ଟେକ୍ କମ୍ପାନି ଗୁଗଲ ଆଉ ପାଦେ ଆଗକୁ ଯାଇ କ୍ୟାରେକ୍ଟର ଏଆଇ ସହ ୨.୭ ବିଲିୟନ ଡଲାରର ଏକ ଡିଲ୍ କରିଛି । ଷ୍ଟାର୍ ଏଆଇ ଇଞ୍ଜିନିୟର ନୋଆମ୍ ସାଜିରଙ୍କୁ କମ୍ପାନି ନିଜ ସହ ଯେଡ଼ିଛି । ସେହିଭଳି ଫେସବୁକର ମୂଳ କମ୍ପାନି ମେଟାରେ ଯୋଗ ଦେବାକୁ ଚାହୁଁଥିବା ଏଆଇ ପ୍ରତିଭାଙ୍କ ଲାଗି ଜୁକରବର୍ଗ ୧୦୦ ନିୟୁତ ଡଲାରର ପ୍ୟାକେଜ ରଖିଛନ୍ତି । ଏହାକୁ ଅନେକ ଗ୍ରହଣ ମଧ୍ୟ କଲେଣି ।
ସ୍କେଲ ଏଆଇର ୪୯% ଅଂଶଧନ ସହ ଏହାର ପ୍ରତିଷ୍ଠାତା ଆଲେକଜାଣ୍ଡର ୱାଙ୍ଗଙ୍କୁ ନିଜ ସହ ଯୋଡ଼ିବା ଲାଗି ମେଟା ୧୪.୩ ବିଲିୟନ ଡଲାରର ଅଫର ଦେଇଛି । ସେହିଭଳି ଓପନ ଏଆଇ ସହପ୍ରତିଷ୍ଠାତା ତଥା ଏଆଇ ସୁପରଷ୍ଟାର ଇଲ୍ୟା ସତସ୍କେଭରଙ୍କୁ ନେବା ଲାଗି ୩୨ ବିଲିୟନ ଡଲାରର ଅଫର ମଧ୍ୟ କମ୍ପାନି ଦେଇଥିଲା । ତେବେ ଏଆଇ ଯୁଗରେ ଟାଲେଣ୍ଟଙ୍କୁ ନିଯୁକ୍ତି କରିବା ଲାଗି କମ୍ପାନି କାହିଁକି ବିଲିୟନ ଡଲାର ନିବେଶ କରିବାକୁ ଚାହୁଁଛନ୍ତି ବୋଲି ପ୍ରଶ୍ନ ଉଠେ । ଏହାର ଉତ୍ତର ହେଲା ଏଆଇ ବିକାଶ ଲାଗି ମାନବ ପ୍ରତିଭା ଲକଜ୍ୟୁରୀ ଗୁଡ୍ସ ବିବେଚିତ ହୋଇଛି । ପ୍ରତିଭାଙ୍କ ନିକଟରେ ଥିବା ଜିଜ୍ଞାସା, ସୃଜନଶୀଳତା, ଚିନ୍ତା କରିବାର ଶକ୍ତି, ଅନୁରକ୍ତି ଏବଂ ଭାଷାଗତ ଲାଳିତ୍ୟର ସ୍ଥାନ ଏଆଇ କେବେ ନେଇ ପାରିବ ନାହିଁ ।
ଅନ୍ୟ ଏଆଇର ଦୃଢ଼ ପରିଚାଳନା, ନେଟୱାର୍କିଂ, ଏଆଇ ସୁରକ୍ଷା, ଆଲ୍ଗୋରିଦିମର ରୁପାନ୍ତରଣ ଭଳି ନେତୃତ୍ୱ ଭିତ୍ତିକ କାମ ପାଇଁ ଏମାନଙ୍କୁ ନିଯୁକ୍ତ କରାଯାଉଛି । ଏଆଇ ଯଦି ଇଞ୍ଜିନ ହୁଏ ଏହାର ପରିକଳ୍ପନା ଏବଂ ବିକାଶ ମଣିଷ ହାତରେ । ସେହିଭଳି ମାନବର ଅନ୍ତର୍ଦୁଷ୍ଟି, ଦୟାଶୀଳତା, ବିଶ୍ୱାସ ଏବଂ ପ୍ରକୃତ ପଣିଆ ଏଆଇ ଠାରୁ କେବେ ମିଳିବ ନାହିଁ । ମାନବ ଜାତି ଲାଗି ଏଆଇର ବିଶ୍ୱାସଯୋଗ୍ୟ ବ୍ୟବହାର ଲାଗି ଦକ୍ଷ ଟିମ୍ ଉପରେ ଏବେ କମ୍ପାନିଙ୍କ ନଜର ।
