କଟକ,୦୭/୧୧: ଡ୍ରଗ୍ସ କଣ୍ଟ୍ରୋଲର ବିଭାଗ ଓ ଅବକାରୀ ବିଭାଗର ମିଳିତ ଚଢ଼ାଉ । କଟକ ସଦର ଥାନା ଅନ୍ତର୍ଗତ ସୁମାଣ୍ଡି ଗାଁର କ୍ରିଷ୍ଣା ମେଡ଼ିସିନ୍ ଫାର୍ମ ଉପରେ ରାତି ଅଧରେ ଚଢ଼ାଉ କରି ବିପୁଳ ପରିମାଣର ବେଆଇନ କଫ୍ ସିରପ ଜବତ କରାଯାଇଛି । ବେଆଇନ୍ ଔଷଧ କିଣିବା, ବିକ୍ରି ଓ ଗଚ୍ଛିତ ରଖିବା ଅଭିଯୋଗରେ ଶଙ୍ଖତ୍ରାସ ଅଞ୍ଚଳର ମେଡିସିନ୍ ଫାର୍ମର ମାଲିକ ଜୟରାମ ସାହୁ ଓ ସହଯୋଗୀ ପ୍ରଫୁଲ୍ଲ କୁମାର ଜେନାଙ୍କୁ ଗିରଫ କରାଯାଇଛି ।
ସୂଚନା ମୁତାବକ, ଶଙ୍ଖତାରସ ଠାରେ ଥିବା କ୍ରିଷ୍ଣା ମେଡ଼ିସିନ୍ ଫାର୍ମରେ ବିପୁଳ ପରିମାଣରେ ପ୍ରତିବନ୍ଧିତ କଫ ସିରପ ରଖି ବିକ୍ରି କରା ଯାଉଥିଲା । ଏହି ଔଷଧ ଗୁଡିକୁ ଲୋକେ ନିଶା ପାଇଁ ବ୍ୟବହାର କରୁଥିବା ନେଇ ଅବକାରୀ ବିଭାଗ ଏବଂ ଡ୍ରଗ୍ସ କଣ୍ଟ୍ରୋଲର ବିଭାଗ ଏକ ବିଶେଷ ସୂତ୍ରରୁ ଖବର ପାଇଥିଲା । ଖବର ପାଇ ଉଭୟ ବିଭାଗ ମେଡ଼ିସିନ ଫାର୍ମରେ ରାତି ଅଧରେ ରେଡ୍ କରିଥିଲା ଡ୍ରଗ୍ସ କଣ୍ଟ୍ରୋଲର ଏବଂ ଅବକାରୀ ବିଭାଗ । ଏହି ଚଢାଉରେ କ୍ରୀଷ୍ଣା ମେଡ଼ିସିନ ଫାର୍ମର ମାଲିକ ଜୟରାମ ସାହୁଙ୍କ ନିକଟରୁ ୯୨ ଟି ବୋତଲ କପ୍ ସିରପ ଜବତ୍ କରାଯାଇଛି । ଏଗୁଡ଼ିକୁ ସପ୍ଲାଏ କରୁଥିବା ପ୍ରଫୁଲ୍ଲ କୁମାର ଜେନାଙ୍କ ନିକଟରୁ ୬୭୬ ବୋତଲ କଫ୍ ସିରପ ଜବତ କରାଯାଇଛି । ଏହି ଘଟଣାରେ ଲାଇସେନ୍ସ ପ୍ରାପ୍ତ ମେଡ଼ିସିନ୍ ଫାର୍ମକୁ ସିଲ୍ କରିଦିଆଯାଇଛି । ଏହା ସହ ଫାର୍ମର ମାଲିକ ଜୟରାମ ସାହୁ ଏବଂ ପ୍ରଫୁଲ୍ଲ କୁମାର ଜେନାଙ୍କୁ ଗିରଫ କରାଯାଇଛି ।
ତେବେ ଏହି ରାକେଟ୍ରେ ଅନ୍ୟ ଜିଲ୍ଲାର କିଛି ଲୋକଙ୍କ ସମ୍ପୃକ୍ତି ରହିଥିବା ବେଳେ ଅବକାରୀ ବିଭାଗ ପକ୍ଷରୁ ଅନୁସନ୍ଧାନ ଜାରି ରହିଛି । ଏତେ ପରିମାଣର ବେଆଇନ ଭାବେ କଫ୍ ସିରପ ରଖି ସେମାନେ କେବଳ ନିଶାଖୋର ଲୋକଙ୍କୁ ବ୍ୟବସାୟ କରୁଥିଲେ । ୧୯୦ ଟଙ୍କା ଏମ୍ଆର୍ପି ଥିଲେ ବି ଏହାକୁ ୨୫୦ ଟଙ୍କାରେ ବିକ୍ରି କରି ମୋଟା ଅଙ୍କର ଟଙ୍କା ଆୟ କରୁଥିବା କଥା କହିଛନ୍ତି କଟକ ଅବକାରୀ ଅଧିକ୍ଷକ କରୁଣା ଶଙ୍କର ତିୱାରୀ।
