ନୂଆଦିଲ୍ଲୀ: ଭାରତୀୟ ରେଳବାଇର ବଡ଼ ନିଷ୍ପତ୍ତି। ଯାତ୍ରୀଙ୍କ ସୁରକ୍ଷାକୁ ଆହୁରି ସୁଦୃଢ଼ କରିବା ପାଇଁ ଟ୍ରେନ ଗୁଡ଼ିକରେ ଲଗାଇବ ସିସି ଟିଭି କ୍ୟାମେରା । ଏହି ଯୋଜନା ଅଧୀନରେ, ସାରା ଦେଶରେ ପ୍ରାୟ ୭୪ ହଜାର ଯାତ୍ରୀ କୋଚ୍ ଏବଂ ୧୫ ହଜାର ଲୋକୋମୋଟିଭ୍ ଇଞ୍ଜିନରେ ସିସି ଟିଭି କ୍ୟାମେରା ଲଗାଯିବ। ପ୍ରତ୍ୟେକ କୋଚ୍ରେ ଚାରୋଟି କ୍ୟାମେରା ଲଗାଯିବ। ସେହିଭଳି ପ୍ରତ୍ୟେକ ଲୋକୋମୋଟିଭ୍ରେ ଛଅଟି ଲେଖାଏ କ୍ୟାମେରା ଲଗାଯିବାର ଯୋଜନା ରହିଛି। କୋଚ୍ର ପ୍ରବେଶ ସ୍ଥାନ ଏବଂ ସାଧାରଣ ଅଞ୍ଚଳରେ ଦୁଇଟି କ୍ୟାମେରା ଲଗାଯିବ।
ଏହି ହାଇ-ଟେକ୍ କ୍ୟାମେରା ଗୁଡ଼ିକର ବିଶେଷ କଥା ହେଉଛି ଯେ ଏଗୁଡ଼ିକ କମ୍ ଆଲୋକରେ ମଧ୍ୟ ଉଚ୍ଚ ଗୁଣବତ୍ତା ଭିଡିଓ ରେକର୍ଡ କରିପାରିବେ ଏବଂ ଉଚ୍ଚ ଗତିରେ ମଧ୍ୟ ସ୍ପଷ୍ଟ ଫୁଟେଜ୍ ପ୍ରଦାନ କରିପାରିବେ। ଏହା ଦ୍ୱାରା ନିରୀକ୍ଷଣ ବ୍ୟବସ୍ଥା ଏବଂ ସୁରକ୍ଷାରେ ବହୁତ ଉନ୍ନତି ହେବ ବୋଲି ଆଶା କରାଯାଉଛି।
ସୂଚନାଥାଉକି,ନିକଟରେ ପାନିପତରେ ଏକ ଟ୍ରେନ ଭିତରେ ଜଣେ ମହିଳାଙ୍କୁ ଗଣବଳାତ୍କାର କରାଯାଇଥିଲା। ମହିଳା ଜଣକ କହିଥିଲେ ଯେ, ସେ ରେଳ ଷ୍ଟେସନ୍ରେ ବସିଛନ୍ତି। ଏହି ସମୟରେ, ଜଣେ ବ୍ୟକ୍ତି ଆସି ଦାବି କଲେ ଯେ ତାଙ୍କୁ ମହିଳାଙ୍କ ସ୍ୱାମୀ ପଠାଇଛନ୍ତି। ଅଭିଯୁକ୍ତ ମହିଳାଙ୍କୁ ଏକ ଖାଲି କୋଚ୍କୁ ନେଇଗଲେ। ଏଠାରେ ସେ ତାଙ୍କୁ ଦୁଷ୍କର୍ମ କରିଥିଲେ। ଏହା ପରେ ଆଉ ଦୁଇଜଣ ବ୍ୟକ୍ତି ଆସିଥିଲେ ଏବଂ ସେମାନେ ମଧ୍ୟ ମହିଳାଙ୍କୁ ବଳାତ୍କାର କରିଥିଲେ। ଏହା ପରେ ତାଙ୍କୁ ରେଳ ଟ୍ରାକରେ ଫିଙ୍ଗି ଦିଆଯାଇଥିଲା। ମହିଳା ଜଣକ ରେଳ ଟ୍ରାକରେ ଶୋଇଥିଲେ ଏବଂ ତାଙ୍କ ଉପରେ ଏକ ଟ୍ରେନ୍ ଚାଲିଗଲା। ଏହି ଦୁର୍ଘଟଣାରେ ସେ ତାଙ୍କର ଗୋଟିଏ ଗୋଡ଼ ମଧ୍ୟ ହରାଇଲେ। ଏହି ଘଟଣା ପରେ, ଏବେ କୋଚରେ କ୍ୟାମେରା ଲଗାଇବାର ନିଷ୍ପତ୍ତି ନିଶ୍ଚିତ ଭାବରେ ସୁରକ୍ଷାକୁ ଉନ୍ନତ କରିବ।
ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଚଳିତ ବର୍ଷ ଏପ୍ରିଲ୍ ଆରମ୍ଭରେ କହିଥିଲେ ଯେ,୧.୫ ବର୍ଷ ମଧ୍ୟରେ ଦେଶର ପ୍ରତ୍ୟେକ ରେଳ ଷ୍ଟେସନରେ ସିସି ଟିଭି କ୍ୟାମେରା ଲଗାଯିବ। ସଂସଦରେ ଏକ ପ୍ରଶ୍ନର ଉତ୍ତର ଦେଇ ସେ କହିଥିଲେ ଯେ ଭାରତୀୟ ରେଳ ମହିଳା ମାନଙ୍କ ସୁରକ୍ଷା ପାଇଁ ଅନେକ ପଦକ୍ଷେପ ନେଉଛି। ଦେଶର ବିଭିନ୍ନ ସ୍ଥାନରେ ରେଳ ଷ୍ଟେସନରେ କ୍ୟାମେରା ଲଗାଇବା ପାଇଁ କାମ ଚାଲିଛି। ପ୍ରତ୍ୟେକ ଡିଭିଜନ, ଜୋନ୍ ଏବଂ ରେଳ ବୋର୍ଡରେ ଓ୍ବାର୍ ରୁମ୍ ସ୍ଥାପନ କରାଯାଇଛି, ଯାହା ନିୟମିତ ଭାବରେ ରେଳ ଷ୍ଟେସନ ଗୁଡ଼ିକର ତଦାରଖ କରିବ।
