ନୂଆଦିଲ୍ଲୀ,୦୯/୦୮: ଯାତ୍ରୀଙ୍କ ପାଇଁ ବମ୍ପର୍ ଅଫର୍ ଆଣିଛି ଭାରତୀୟ ରେଳବାଇ । ଆଣିଲା ନୂଆ ପ୍ୟାକେଜ୍ ପ୍ଲାନ୍ । ଶନିବାରଠାରୁ ରେଳବାଇ ଆରମ୍ଭ କରିଛି ରାଉଣ୍ଡ ଟ୍ରିପ୍ ପ୍ୟାକେଜ୍ । ପାର୍ବଣ ଋତୁରେ ଭିଡ଼କୁ ପରିଚାଳନା କରିବା ଏବଂ ଯାତ୍ରୀମାନଙ୍କୁ ଉତ୍ତମ ସୁବିଧା ପ୍ରଦାନ କରିବା ଲାଗି ରେଳବାଇ 'ରାଉଣ୍ଡ ଟ୍ରିପ୍ ପ୍ୟାକେଜ୍' ଯୋଜନା ଘୋଷଣା କରିଛି । ଏହି ଯୋଜନା ଅନୁଯାୟୀ, ନିର୍ଦ୍ଧାରିତ ସମୟ ସୀମା ମଧ୍ୟରେ ଯିବା ଓ ଆସିବା ଲାଗି ଟିକେଟ୍ ବୁକ୍ କରୁଥିବା ଯାତ୍ରୀମାନଙ୍କୁ ଫେରିବା ଟିକେଟର ମୂଳ ଭଡ଼ାରେ ୨୦% ରିହାତି ମିଳିବ । ରେଳ ଯାତ୍ରାକୁ ସୁଗମ ଓ ଅଧିକ ଆଦୃତ କରିବା ପାଇଁ ରେଳବାଇ ପକ୍ଷରୁ ଏହି ନିଷ୍ପତ୍ତି ନିଆଯାଇଛି ।
'କନେକ୍ଟିଂ ଜର୍ନି ଫିଚର' ମାଧ୍ୟମରେ ବୁକ୍ ହେବ ଟିକେଟ୍:
କହିରଖୁ କି, ଏହି ଯୋଜନା ୧୪ ଅଗଷ୍ଟ ୨୦୨୫ ରୁ ଆରମ୍ଭ ହେବ । ଏହା ଅଧୀନରେ, ପ୍ରଥମେ ପରବର୍ତ୍ତୀ ଯାତ୍ରା ପାଇଁ ୧୩ ଅକ୍ଟୋବର ୨୦୨୫ ମଧ୍ୟରେ ଟିକେଟ୍ ବୁକ୍ କରିବାକୁ ପଡ଼ିବ । ଏହା ପରେ, 'କନେକ୍ଟିଂ ଜର୍ନି ଫିଚର୍' ମାଧ୍ୟମରେ ୧୭ ନଭେମ୍ବର ୨୦୨୫ ରୁ ୧ ଡିସେମ୍ବର ୨୦୨୫ ମଧ୍ୟରେ ଫେରିବା ଯାତ୍ରା ପାଇଁ ଟିକେଟ୍ ବୁକ୍ କରିବାକୁ ହେବ । ଉଭୟ ପାର୍ଶ୍ୱର ଟିକେଟ ନିଶ୍ଚିତ ହେଲେ ଏବଂ ସମାନ ଯାତ୍ରୀଙ୍କ ନାଁରେ ଥିଲେ ଏହି ଯୋଜନାରେ ରିହାତି ମିଳିବ । ଫେରିବା ଟିକେଟ୍ ବୁକିଂ ପାଇଁ ଆଗୁଆ ସଂରକ୍ଷଣ ଅବଧି ପ୍ରଯୁଜ୍ୟ ହେବ ନାହିଁ । କେବଳ ଫେରିବା ଯାତ୍ରାର ମୂଳ ଭଡ଼ା ଉପରେ ରିହାତି ଦିଆଯିବ । ରେଳବାଇ କହିଛି ଯେ, ଏହି ଯୋଜନା ବର୍ତ୍ତମାନ ପରୀକ୍ଷାମୂଳକ ଭାବରେ କାର୍ଯ୍ୟକାରୀ କରାଯାଇଛି । ବିଭାଗ ପକ୍ଷରୁ ଆଶା ରଖାଯାଇଛି ଯେ, ରାଉଣ୍ଡ ଟ୍ରିପ୍ ପ୍ୟାକେଜ ଜରିଆରେ ଲୋକ ରେଳ ଯାତ୍ରା କରିବାକୁ ଉତ୍ସାହିତ ହେବେ । ଅନ୍ୟପକ୍ଷେ ବିଭାଗର ଏହି ଅଫର୍ ଭବିଷ୍ୟତରେ ସଫଳ ହେବ ବୋଲି ରେଳବାଇ ଆଶାବାଦୀ । ଏଥିସହ ଯାତ୍ରୀଙ୍କ ସଂଖ୍ୟାରେ ବୃଦ୍ଧି ଦେଖିବାକୁ ମିଳିବ ।
