ଭୁବନେଶ୍ୱର,୨୯/୦୬: ରାଜଧାନୀ କଲେଜରେ ପୁଣି ଜଣେ ଯୁକ୍ତ ୩ ଛାତ୍ରଙ୍କୁ ଆକ୍ରମଣ ହୋଇଛି । ପୂର୍ବ କଥାକୁ କେନ୍ଦ୍ର କରି କିଛି ଅଣଛାତ୍ର ଏହି ଆକ୍ରମଣ କରିଥିବା ଜଣାପଡ଼ିଛି । ଏଥିରେ ଆହତ ହୋଇଛନ୍ତି ଯୁକ୍ତ ୩ ଛାତ୍ର ଶ୍ରୀମାନ ସୌଭାଗ୍ୟ ମହାପାତ୍ର । ଏନେଇ ସେ ଖଣ୍ଡଗିରି ଥାନାରେ ଅଭିଯୋଗ କରିବା ପରେ ପୁଲିସ୍ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ଶ୍ରୀମାନଙ୍କ ଘର ପାତ୍ରପଡ଼ା ଶଙ୍କର ବିହାରରେ । ସେ ରାଜଧାନୀ କଲେଜରେ ଯୁକ୍ତ ୩ର ଦ୍ୱିତୀୟ ବର୍ଷରେ ପାଠ ପଢ଼ୁଛନ୍ତି । ଗତକାଲି ଅପରାହ୍ଣ ପ୍ରାୟ ୩ଟା ବେଳେ ସେ କଲେଜ କ୍ୟାମ୍ପସ୍ରେ ବସିଥିଲେ । ତେବେ ଏହି ସମୟରେ କିଛି ଅଣଛାତ୍ର ତାଙ୍କ ପାଖରେ ପହଞ୍ଚିଥିଲେ । ସମସ୍ତ ବିୟର ବୋତଲ ଧରିଥିଲେ । ଜଣେ ଛୁରି ଧରିଥିଲା । ଶ୍ରୀମାନ କିଛି ବୁଝିବା ଆଗରୁ ଅଭିଯୁକ୍ତମାନେ ଆକ୍ରମଣ କରିଥିଲେ । ଆକ୍ରମଣରେ ତାଙ୍କ ମୁଣ୍ଡ ଓ କାନରୁ ରକ୍ତ ବାହାରିଥିଲା । ଏହା ଦେଖି କଲେଜର ଅନ୍ୟ ଛାତ୍ରଛାତୀଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା । ଶ୍ରୀମାନଙ୍କୁ ତାର ସାଙ୍ଗମାନେ ହସ୍ପିଟାଲ୍ ନେଇଥିଲେ । ଏନେଇ ସେ ଥାନାରେ ଅଭିଯୋଗ କରିଥିଲେ । ପୁଲିସ୍ ମାମଲା ରୁଜୁ କରି ଅଭିଯୁକ୍ତମାନଙ୍କୁ ଚିହ୍ନଟ କରିଥିବା ଜଣାପଡିଛି । ଏହି ଆକ୍ରମଣ ପଛରେ ପୂର୍ବ ବିବାଦ ଥିବା ପୁଲିସ୍ କହିଛି ।
