ନୂଆଦିଲ୍ଲୀ: ରାଜସ୍ଥାନର ଆବୁ ରୋଡ୍ ଅଞ୍ଚଳରେ ଏକ ହୃଦୟ ବିଦାରକ ଦୁର୍ଘଟଣା ଘଟିଛି। ଆଜି (ଗୁରୁବାର) ଭୋର ସମୟରେ ଘଟିଥିବା ଏହି ଭୟଙ୍କର ସଡ଼କ ଦୁର୍ଘଟଣାରେ ମୋଟ ୬ ଜଣଙ୍କର ମୃତ୍ୟୁ ହୋଇଛି। ତେବେ ଏହି ଦୁର୍ଘଟଣାରେ ଜଣେ ମହିଳା ଆହତ ହୋଇଥିବା ଖବର ମଧ୍ୟ ରହିଛି। ସୂଚନା ଅନୁଯାୟୀ, ଏକ ଦ୍ରୁତ ଗତିରେ ଆସୁଥିବା କାର୍ ଏକ ଟ୍ରଲି ସହିତ ଧକ୍କା ହେବା ଯୋଗୁଁ ଏହି ଭୟଙ୍କର ଦୁର୍ଘଟଣା ଘଟିଛି ଏବଂ ୬ ଜଣ ଲୋକ ପ୍ରାଣ ହରାଇଛନ୍ତି।
ପୋଲିସ ଏହି ଦୁର୍ଘଟଣା ବିଷୟରେ ସମ୍ପୂର୍ଣ୍ଣ ସୂଚନା ଦେଇଛି। ଏନେଇ ପୋଲିସ କହିଛି ଯେ, ଭୋର ପ୍ରାୟ ୩ଟା ସମୟରେ ସିରୋହିର କିଭାର୍ଲି ଗାଁ ନିକଟରେ ଏହି ଭୟଙ୍କର ଦୁର୍ଘଟଣା ଘଟିଥିଲା। ଏଠାରେ ଏକ ଦ୍ରୁତଗାମୀ କାର ଏକ ଟ୍ରଲି ସହିତ ଧକ୍କା ଦେଇଥିଲା। ମାଉଣ୍ଟ ଆବୁ ସର୍କଲ ଅଫିସରଙ୍କ ଅନୁଯାୟୀ, କାରରେ ଥିବା ଲୋକମାନେ ଜାଲୋର ଜିଲ୍ଲାର ଏକ ଗାଁର ବାସିନ୍ଦା ଥିଲେ। ସେମାନେ ଅହମ୍ମଦାବାଦରୁ ଫେରୁଥିଲେ। କିଭାର୍ଲି ନିକଟରେ କାରଟି ଏକ ଟ୍ରଲି ସହିତ ଧକ୍କା ହୋଇଥିଲା ।
ଅଧିକାରୀଙ୍କ କହିବା ଅନୁଯାୟୀ, ଦୁର୍ଘଟଣା ପରେ କାରରେ ଥିବା ଚାରି ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଏହା ପରେ, ଡାକ୍ତରଖାନାରେ ଦୁଇଜଣଙ୍କ ମୃତ୍ୟୁ ହୋଇଥିଲା। ଦୁର୍ଘଟଣାରେ ଆହତ ଜଣେ ମହିଳାଙ୍କୁ ଚିକିତ୍ସା କରାଯାଉଛି।
