ଜୟପୁର,୧୬/୧୨: ଅନୁସୂଚିତ ଜାତି/ ଜନଜାତି (ଏସ୍ସି/ଏସ୍ଟି) ଆଇନ ସହ ଜଡ଼ିତ ଏକ ମାମଲାରେ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି ରାଜସ୍ଥାନ ହାଇକୋର୍ଟ ।
ଏସ୍ସି/ ଏସ୍ଟି ଆକ୍ଟରୁ ୪ ଶବ୍ଦ ହଟାଇ ଜଷ୍ଟିସ୍ ବୀରେନ୍ଦ୍ର କୁମାରଙ୍କ ଖଣ୍ଡପୀଠ କହିଛନ୍ତି, ଭଙ୍ଗୀ, ନୀଚ୍ଚ, ଭିକାରୀ, ମଙ୍ଗନୀ ଭଳି ଶବ୍ଦ ଜାତିସୂଚକ ନୁହେଁ । ଏହି ମାମଲା ଜବରଦଖଲ ଉଚ୍ଛେଦ ବେଳେ ଜଣେ ସରକାରୀ କର୍ମଚାରୀଙ୍କ ସହ ଯୁକ୍ତିତର୍କ ସହ ଜଡ଼ିତ । ମାମଲା କୋର୍ଟରେ ପହଞ୍ଚିବା ପରେ ଏହି ଶବ୍ଦ ବ୍ୟବହାର କରିଥିବା ୪ ଅଭିଯୁକ୍ତଙ୍କ ବିରୋଧରେ ରୁଜୁ କେସ୍ରୁ ଏସ୍ସି/ଏସ୍ଟି ଆଇନର ଧାରାକୁ ହାଇକୋର୍ଟ ହଟାଇଦେଇଛନ୍ତି । ଏହି ଘଟଣା ୧୩ ବର୍ଷ ତଳର ।
୨୦୧୧ ଜାନୁଆରୀ ୩୧ରେ ଜୈଶସାଲମେରର କୋତବାଲି ଥାନା ଅଞ୍ଚଳରେ ଜବରଦଖଲ ଉଚ୍ଛେଦ ବେଳେ ଜଣେ ବାସିନ୍ଦା ଅଚଳ ସିଂ ସରକାରୀ ଅଧିକାରୀ ହରିଶ ଚନ୍ଦ୍ରଙ୍କୁ ନୀଚ୍ଚ, ଭିକାରୀ, ଭଙ୍ଗୀ ଆଦି କହି ଗାଳି ଦେଇଥିଲେ । ବିବାଦ ମାର୍ପିଟରେ ପରିଣତ ହୋଇଥିଲା । ଏ ନେଇ ସରକାରୀ ଅଧିକାରୀ ଜଣକ ଅଚଳଙ୍କ ବିରୋଧରେ ଏସ୍ସି/ଏସ୍ଟି ଆଇନରେ ମାମଲା ରୁଜୁ କରାଇଥିଲେ । ମାମଲାରେ ୪ ଜଣଙ୍କ ନାଁ ରହିଥିଲା । ବିବାଦ ପୂର୍ବରୁ ଅଭିଯୁକ୍ତମାନେ ସରକାରୀ ଅଧିକାରୀଙ୍କ ଜାତି ବାବଦରେ କିଛି ବି ଜାଣି ନ ଥିଲେ ବୋଲି ଯୁକ୍ତି ରଖିଥିଲେ । ହାଇକୋର୍ଟ ଉକ୍ତ ୪ ଶବ୍ଦ ଜାତିସୂଚକ ନୁହେଁ ବୋଲି ରାୟ ଶୁଣାଇବା ସହ ଅଭିଯୁକ୍ତଙ୍କୁ ଏସ୍ସି/ଏସ୍ଟି ମାମଲାରୁ ମୁକ୍ତ କରିଛନ୍ତି।
