ନୂଆଦିଲ୍ଲୀ, ୧୫/୦୫ : ଜମ୍ମୁ କାଶ୍ମୀର ଶ୍ରୀନରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଓ ସ୍ଥଳସେନା ମୁଖ୍ୟ। ସୀମାରେ ଲୋକଙ୍କୁ ଭେଟିବା ସହ ବଢାଇଲେ ଯବାନଙ୍କ ମନୋବଳ। ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳୀ ଅପର୍ଣ କଲେ। ଏହି ଅବସରରେ ରାଜନାଥ ସିଂହ ସମ୍ଵୋଧିତ କରି ପାକିସ୍ତାନକୁ କଡ଼ା ସନ୍ଦେଶ ଦେଇଛନ୍ତି। ସେ କହିଛନ୍ତି ଯେ, ଭାରତ କେବେ ଯୁଦ୍ଧ ପକ୍ଷରେ ନାହିଁ। ହେଲେ ଆମର ସାର୍ବଭୌମତ୍ଵ ଉପରେ ପ୍ରଶ୍ନ ଉଠିଲେ ଆମେ ଜବାବ ଦେବୁ। ପାକିସ୍ତାନ ଭଳି ଦୁଷ୍ଟ ଦେଶ ହାତରେ ପରମାଣୁ ଅସ୍ତ୍ର ସୁରକ୍ଷିତ ନୁହେଁ। ତେଣୁ ପାକିସ୍ତାନ ଉପରେ କଡ଼ା ନଜର ରଖିବା ଜରୁରୀ।
ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ଆତଙ୍କବାଦ ବିରୋଧରେ ଅପରେସନ ସିନ୍ଦୂର ହେଉଛି ଭାରତର ବଡ଼ ଅପରେସନ। ଏହା ଇତିହାସର ସବୁଠୁ ବଡ଼ କାର୍ଯ୍ୟାନୁଷ୍ଠାନ। ଭାରତ ଆଜି ସାରା ବିଶ୍ଵ ଆଗରେ ସ୍ପଷ୍ଟ କରିଛି ଯେ, ଆତଙ୍କବାଦ ବିରୋଧରେ ଭାରତ ଯେକୌଣସି ସୀମା ପର୍ଯ୍ୟନ୍ତ ଚାଲିଯିବ। ପହଲଗାମ୍ରେ ନରସଂହାର କରି ଭାରତର ମଥାକୁ ଆଘାତ କଲେ, ଆମେ ତାଙ୍କ ଛାତିରେ ଆଘାତ କଲୁ। ପାକିସ୍ତାନର ଏକମାତ୍ର ଚିକିତ୍ସା ସେ ଭାରତ ବିରୋଧୀ ଆତଙ୍କବାଦୀ ସଙ୍ଗଠନକୁ ଆଶ୍ରୟ ଦେବା ବନ୍ଦ କରୁ। ଭାରତ ବିରୋଧରେ ନିଜ ମାଟିକୁ ଉପଯୋଗ ନକରୁ। ଜାମ୍ମୁ କାଶ୍ମୀରରୁ ଅନ୍ତରାଷ୍ଟ୍ରୀୟ ସମୁଦାୟକୁ ରାଜନାଥ ଏକ ବଡ଼ ପ୍ରଶ୍ନ କରିଛନ୍ତି। ସେ କହିଛନ୍ତି ଯେ, ପାକିସ୍ତାନ ଭଳି ଏକ ଦାୟିତ୍ଵହୀନ ଏବଂ ଦୁଷ୍ଟ ରାଷ୍ଟ୍ର ହାତରେ ପରମାଣୁ ଅସ୍ତ୍ର କେତେ ସୁରକ୍ଷିତ ? ପାକିସ୍ତାନର ପରମାଣୁ ଅସ୍ତ୍ର ଉପରେ ଅନ୍ତରାଷ୍ଟ୍ରୀୟ ପରମାଣୁ ଉର୍ଜା ଏଜେନ୍ସି କଡ଼ା ନଜର ରଖିବା ଉଚିତ୍।
ଯବାନଙ୍କୁ ସମ୍ଵୋଧିତ କରି ରାଜନାଥ କହିଛନ୍ତି ଯେ, ଏହି ବିଷମ ପରିସ୍ଥିତିରେ ଆପଣଙ୍କ ମଧ୍ୟରେ ରହି ମୁଁ ନିଜକୁ ଗୌରବାନ୍ଵିତ ମନେ କରୁଛି। ପ୍ରଧାନମନ୍ତ୍ରୀଙ୍କ କୁଶଳ ନେତୃତ୍ଵରେ ଅପରେସନ ସିନ୍ଦୂରରେ ଆପଣମାନଙ୍କ ପରାକ୍ରମ ସାରା ଦେଶକୁ ଗୌରବାନ୍ଵିତ କରିଛି।
