ନୂଆଦିଲ୍ଲୀ,୩୦/୦୮: ପ୍ରକୃତି କୋପ । ଭୂସ୍ୱର୍ଗରୁ ନେଇ ଦେବଭୂମି ସବୁଠି ଧ୍ୱଂସଲୀଳା ରଚିଛି ପ୍ରକୃତି । ରାମବାନ-ରିଆସିରେ ପ୍ରକୃତିର ତାଣ୍ଡବ ଦେଖିବାକୁ ମିଳିଛି । ଜମ୍ମୁ କାଶ୍ମୀରର ରାମବନରେ ବାଦଲଫଟା ବର୍ଷା ହୋଇଥିବା ସୂଚନା ମିଳିଛି । ଏଥିରେ ୩ ଜଣଙ୍କର ମୃତ୍ୟୁ ହୋଇଛି । ୫ ଜଣଙ୍କର ଖୋଜ ଖବର ମିଳୁନାହିଁ । ଅନେକ ଘର କ୍ଷତିଗ୍ରସ୍ତ ହୋଇଛି । ସେହିପରି ରିଆସିରେ ଭୂସ୍ଖଳ ହୋଇ ଗୋଟିଏ ପରିବାର ୭ ଜଣଙ୍କର ମୃତ୍ୟୁ ହୋଇଛି । ଭୂସ୍ଖଳନ ଯୋଗୁଁ ଘର ଭୁଶୁଡି ପଡ଼ିବାରୁ ଅଘଟଣ ହାେଇଛି । ସ୍ଥାନୀୟ ଏଜେନ୍ସିଗୁଡ଼ିକ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । ମୃତ୍ୟୁସଂଖ୍ୟା ବୃଦ୍ଧି ପାଇବା ଆଶଙ୍କା କରାଯାଉଛି । ଗତ କିଛି ଦିନ ଧରି ଜମ୍ମୁ କାଶ୍ମୀରରେ ପ୍ରବଳ ବର୍ଷା ହେଉଛି ଫଳରେ ନଦୀ ଏବଂ ଝରଣାର ଜଳସ୍ତର ବୃଦ୍ଧ ପାଇଛି ।
ଅଧିକାରୀଙ୍କ ସୂଚନା ଅନୁସାରେ, ଆଜି (ଶନିବାର) ସକାଳୁ ଜିଲ୍ଲା ମୁଖ୍ୟାଳୟରୁ ପ୍ରାୟ ୨୫ କିଲୋମିଟର ଦୂରରେ ଅବସ୍ଥିତ ପାହାଡିଆ ଅଞ୍ଚଳ ରାଜଗଡ଼ରେ ବାଦଳ ଫଟା ବର୍ଷା ହୋଇ ହଠାତ୍ ବନ୍ୟାପାଣି ମାଡି ଆସିଥିଲା । ଉଦ୍ଧାରକାରୀମାନେ ଦୁଇ ମହିଳାଙ୍କ ସମେତ ତିନି ଜଣଙ୍କ ମୃତଦେହ ପାଇଛନ୍ତି । ନିଖୋଜ ଲୋକଙ୍କ ସନ୍ଧାନ ଜାରି ରହିଛି ।
କହି ରଖୁଛୁ କି, ଗତକାଲି (ଶୁକ୍ରବାର) ହିମାଚଳ ପ୍ରଦେଶର ଚାମ୍ବା ଜିଲ୍ଲା ଭରମୌର ଅଞ୍ଚଳରେ ପ୍ରବଳ ବର୍ଷା ଯୋଗୁ ଭୂସ୍ଖଳନରେ ୧୧ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଥିଲା । ସେମାନଙ୍କ ମଧ୍ୟରେ ଚାମ୍ବାର ୫, ପଞ୍ଜାବର ୩ ଓ ଉତ୍ତରପ୍ରଦେଶର ଜଣେ ବ୍ୟକ୍ତି ଥିଲେ । ଅନ୍ୟ ୨ ଜଣଙ୍କ ପରିଚୟ ମିଳିନାହିଁ । ଏମାନେ ସମସ୍ତେ ମଣିମହେଶ ଯାତ୍ରାରେ ସାମିଲ ଥିଲେ । ୨ ସପ୍ତାହ ତଳେ କିସ୍ତୱାଡ଼ାରେ ଭୂସ୍ଖଳନ ଘଠି ୫୨ ଜଣଙ୍କର ମୃତ୍ୟୁ ହୋଇଥିଲା । ୧୧୬ ଜଣ ଆହତ ହୋଇଥିଲେ ।
