ପୁରୀ,୨୩/୦୬: ମହାପ୍ରଭୁଙ୍କ ରଥଯାତ୍ରା ପାଇଁ ବେଶ୍ ତତ୍ପର ନିର୍ମାଣକାରୀ । ଶ୍ରୀଗୁଣ୍ଡିଚା ଯାତ୍ରାକୁ ୪ଦିନ ଥାଇ ପ୍ରସ୍ତୁତ ହେଲାଣି ରଥତ୍ରୟ । ରବିବାର ରଥତ୍ରୟରେ କଳସ ଉଠା ସରି ଅଁଳା ଓ ଓଲଟଶୁଆ ସ୍ଥାପନ ହୋଇଛି । କଳସ ଉଠାଇବା ପରେ ଭୋଇ ସେବକମାନେ ରଥ ଉପରେ ହରିବୋଲ ଡାକ ଦେଇଛନ୍ତି । ରଥ କନକମୁଣ୍ଡି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ସିଂହାସନ ବାହାର ପାଶ୍ୱର୍ରେ ଚିତ୍ରକରମାନେ ଗାଈପଲ୍ଲ ଚିତ୍ର କରୁଛନ୍ତି । ରଥରେ ଲାଗିବା ପାଇଁ ପ୍ରଭା ପ୍ରସ୍ତୁତ ହେଉଛି । ରଥ ପୃଷ୍ଠରେ ପଟା ବାଡ଼ିଆ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି।
ଶନିବାର ୨ଟି ଲେଖାଏଁ ଦୁଆରଘଡ଼ା ରଥରେ ଉଠିଥିଲା । ରବିବାର ଆଉ ଦୁଇଟି କରି ତିନି ରଥରେ ମୋଟ ୧୨ଟି ଦୁଆରଘଡ଼ା ଉଠାଗଲା। ଏହାପରେ ରଥତ୍ରୟରେ ତିନୋଟି କଳସ ଓ ୬ଟି ଓଲଟ ଶୁଆ ଲାଗିଲା । ଏବେ ନିର୍ମାଣକାରୀଙ୍କ ରଥ କାମ ସରିବା ଉପରେ । ଚିତ୍ରକର, ରୂପକାର ଓ ଦର୍ଜୀଙ୍କ କାର୍ଯ୍ୟ ଯୋରଦାର ଚାଲିଛି । ଅଶ୍ୱରେ ରଙ୍ଗ ଆରମ୍ଭ କରୁଛନ୍ତି ଚିତ୍ରକର । ନବକଳେବର ସମୟରେ ୧୨ଟି ଅଶ୍ୱ ନୂଆକରି ତିଆରି ହୋଇଥାଏ । ପ୍ରତିବର୍ଷ ରଥରେ ମରାମତି ପରେ ଚିତ୍ରକରମାନେ ଅଶ୍ୱରେ ରଙ୍ଗ ଦେଲେ ରଥ ଟଣାରେ ନିୟୋଜିତ ହେବେ। ରୂପକାରମାନେ ପ୍ରଭାରେ ଖୋଦେଇ କାର୍ଯ୍ୟ ଶେଷ କରି ଚିତ୍ରକରଙ୍କୁ ଦେବେ । ସେଥିରେ ଚିତ୍ରକର ରଙ୍ଗ ଦେବାପରେ ରଥ ସିଂହାସନ ପଛକୁ ଲଗାଯିବ । ପାଶ୍ୱର୍ଦେବଦେବୀ, ସଖୀ, ଶିଖରଡ଼ମ୍ବରୁ, ହଂସପଟା ଚିତ୍ର ସାରୁଛନ୍ତି ।
ରଥରେ କଣିଫାଉଡା ଲଗାଯାଇଛି । କଣିଫାଉଡ଼ାରେ ମଣ୍ଡଣି ବାଉଁଶ ଲଗାଯିବ । ଏହାଯୋଗୁ ରଥ ହୃଷ୍ଟପୁଷ୍ଟ ଓ ସୁନ୍ଦର ହେବ । ତିନି ରଥରେ କନାମଣ୍ଡଣି ପାଇଁ ଶ୍ରୀମନ୍ଦିର କାର୍ଯ୍ୟାଳୟରେ ଦର୍ଜି ସେବକମାନେ କନା ସିଲାଇରେ ବ୍ୟସ୍ତ ରହିଛନ୍ତି । ମଣ୍ଡଣି କନାକୁ କୋଠସୁଆଁସିଆ ସେବକମାନେ ରଥରେ ଲଗାଇବେ । ତିନି ରଥରେ ଶିଖରଡମ୍ୱରୁ ଲଗାଯିବାପରେ ୨୭ ପାଶ୍ୱର୍ ଦେବଦେବୀଙ୍କୁ ସ୍ଥାପନ କରାଯିବ । ରଥର ଚାରିପଟେ ଠେକରାବାଡ଼ ଲାଗିବ । ରଥକାମ ଶେଷ ହେବା ପୂର୍ବରୁ ପିତ୍ତଳର ଅଳଙ୍କାରମାନ ଲଗାଯିବ । ପିତ୍ତଳର କଦଳୀଗଛ, ମଗର, ରାହୁମୁଣ୍ଡ, ହଂସ ଓ ମାଛ ଆଦି ଲାଗିବ । ରଥମାନଙ୍କର କନା ମଣ୍ଡଣିକାମ ସରିବାପରେ ରଥ ରକ୍ଷକଙ୍କୁ ସ୍ଥାପନ କରାଯିବ । ୨୬ ତାରିଖ ଗୁରୁବାର ନେତ୍ରୋତ୍ସବରେ ରଥ ପ୍ରସ୍ତୁତ ହୋଇ ସିଂହଦ୍ୱାରରେ ପହଞ୍ଚିବ ।
