ରାୟଗଡ଼ା,୦୬/୦୧: ଦୀର୍ଘ ୬ ବର୍ଷର ପ୍ରତିକ୍ଷାରେ ଯବନିକା ପଡ଼ିବାକୁ ଯାଉଛି । ସୋମବାର ପୂର୍ବାହ୍ଣ ୧୧ଟାରେ ରାୟଗଡ଼ା ରେଳ ଡିଭିଜନ୍ ନିର୍ମାଣ ପାଇଁ ଆଭାସିରେ ଭିତ୍ତିପ୍ରସ୍ତର ସ୍ଥାପନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ସମୟରେ ପ୍ରଧାନମନ୍ତ୍ରୀଙ୍କ ସହ ଭିଡିଓ କନ୍ଫରେନ୍ସରେ ରହିବେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏଥିଲାଗି ସ୍ଥାନୀୟ ରେଲୱେ ପଡ଼ିଆରେ ଏକ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଛି । ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ବିଭାଗୀୟ ଅଧିକାରୀ ଏହାର ତଦାରଖ କରିଛନ୍ତି ।
ରାୟଗଡ଼ାଠାରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ ସିଧାସଳଖ ଯୋଗଦେବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ତାଙ୍କସହ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ, ରେଳ ରାଷ୍ଟ୍ରମନ୍ତ୍ରୀ ତଥା ଖାଦ୍ୟ ପ୍ରକ୍ରିୟାକରଣ ମନ୍ତ୍ରୀ ରଭନୀତ ସିଂ ବିଟ୍ଟୁ, କୋରାପୁଟ ସାଂସଦ ସପ୍ତଗିରି ଶଙ୍କର ଉଲ୍ଲାକା, ନବରଙ୍ଗପୁର ସାଂସଦ ବଳଭଦ୍ର ମାଝୀ, ରାୟଗଡ଼ା ବିଧାୟକ ଆପଲାସ୍ୱାମୀ କାଡ୍ରାକା ପ୍ରମୁଖ ଯେଗେଦେବେ । ରାଜ୍ୟପାଳ ଡ. କମ୍ଭମପତି ହରି ବାବୁ ଯୋଗଦେବେ କି ନାହିଁ ସ୍ପଷ୍ଟ ହୋଇନି ।
ରାୟଗଡ଼ାଠାରେ ପୂର୍ବତଟ ରେଳବାଇ ମହାପ୍ରବନ୍ଧକ ପରମେଶ୍ୱର ଫୁଙ୍କବାଲ ସମସ୍ତ ଆୟୋଜନର ତଦାରଖ କରିଛନ୍ତି । ଜିଲ୍ଲାପାଳ ପାରୁଲ ପଟାୱରୀ ଓ ଏସ୍ପି ସ୍ୱାତୀ ଏସ୍.କୁମାର ରେଲୱେ ପଡ଼ିଆରେ ସ୍ଥିତି ଅନୁଧ୍ୟାନ କରିଛନ୍ତି । ସୁରକ୍ଷା ପାଇଁ ବ୍ୟାପକ ପୁଲିସ୍ ମୁତୟନ ଅଛନ୍ତି । ସୁରୁଖୁରୁରେ କାର୍ଯ୍ୟକ୍ରମ ସମ୍ପାଦନ ପାଇଁ ଯୋଜନା କରାଯାଇଛି । ଆସନ୍ତା ୩ ବର୍ଷରେ ରେଳ ଡିଭିଜନ୍ କାର୍ଯ୍ୟକ୍ଷମ ନେଇ ଆଶା ଥିବା ପୂର୍ବତଟ ରେଳବାଇ ମହାପ୍ରବନ୍ଧକ ଶ୍ରୀ ଫୁଙ୍କବାଲ କହିଛନ୍ତି ।
