ନୂଆଦିଲ୍ଲୀ : ଦେଶର ଆର୍ଥିକ ସୁରକ୍ଷାକୁ ସୁଦୃଢ଼ କରିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ (RBI) ଏକ ବଡ ଏବଂ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। ଗତ ଛଅ ମାସ (ମାର୍ଚ୍ଚରୁ ସେପ୍ଟେମ୍ବର ୨୦୨୫) ମଧ୍ୟରେ ବିଦେଶରେ ଗଚ୍ଛିତ ଥିବା ୬୪ ହଜାର କିଲୋଗ୍ରାମ (୬୪ ଟନ୍) ସୁନା ଫେରାଇ ଆଣିଛି ଆରବିଆଇ । ଏହି ନିଷ୍ପତ୍ତି ଏଭଳି ଏକ ସମୟରେ ଆସିଛି, ଯେତେବେଳେ କି ବିଶ୍ୱବ୍ୟାପୀ ବଢ଼ୁଥିବା ଉତ୍ତେଜନା ବୃଦ୍ଧି ପାଇବାରେ ଲାଗିଛି ଏବଂ ଏହାକୁ ଭାରତର ଆର୍ଥିକ ସ୍ୱାଧୀନତା ଏବଂ ସମ୍ପତ୍ତିକୁ ସୁରକ୍ଷିତ ରଖିବା ପାଇଁ ଏକ ପ୍ରମୁଖ ପଦକ୍ଷେପ ଭାବରେ ବିବେଚନା କରାଯାଉଛି। ତେବେ ବିଦେଶରୁ ଏହି ସୁନା ଫେରାଇ ଆଣିବାର ମୁଖ୍ୟ କାରଣ ଗୁଡିକ କ’ଣ ହୋଇପାରେ ଏବେ ଆସନ୍ତୁ ଜାଣିବା …
ବିଶ୍ୱବ୍ୟାପୀ ବଢ଼ୁଥିବା ଭୂରାଜନୈତିକ ଉତ୍ତେଜନା ଯୋଗୁଁ, ଅନେକ ଦେଶ ସମ୍ପତ୍ତି ଫ୍ରିଜ୍ ଏବଂ ପ୍ରତିବନ୍ଧକର ସମ୍ମୁଖୀନ ହେଉଛନ୍ତି। ବର୍ତ୍ତମାନର ଟାରିଫ୍ ଯୁଦ୍ଧରେ, ସ୍ୱଦେଶରେ ସୁନା ରଖିବା ସବୁଠାରୁ ନିରାପଦ ବିକଳ୍ପ ବୋଲି ବିବେଚନା କରାଯାଉଛି। RBI ବିଶ୍ୱାସ କରେ ଯେ ଘରୋଇ ଭଣ୍ଡାରରେ ସୁନା ସଂରକ୍ଷଣ କରିବା ଦ୍ୱାରା ବିଶ୍ୱ ସଙ୍କଟ କିମ୍ବା ବାଣିଜ୍ୟ କଟକଣା ପରିସ୍ଥିତିରେ ଦେଶର ଅର୍ଥନୈତିକ ଶକ୍ତି ବଜାୟ ରହିବ। ଏହା ଆର୍ଥିକ ସ୍ବାଧିନତା ଦିଗରେ ଏକ ବଡ ପଦକ୍ଷେପ। ଏହାର ଅର୍ଥ ହେଉଛି ଦେଶର ରିଜର୍ଭ ବ୍ୟାଙ୍କ କୌଣସି ସହାୟତା ବିନା ନିଜର ଆର୍ଥିକ ନିଷ୍ପତ୍ତି ନେଇପାରିବ। ରୁଷ, ଇରାନ ଏବଂ ଭେନେଜୁଏଲା ଭଳି ଦେଶ ଉପରେ ପାଶ୍ଚାତ୍ୟ ପ୍ରତିବନ୍ଧକ ଲଗାଯିବା ପରେ, ଭାରତ ଏହାର ବିପଦ ହ୍ରାସ ଯୋଜନାର ଅଂଶ ଭାବରେ ଏହି ନିଷ୍ପତ୍ତି ନେଇଛି ବୋଲି ମଧ୍ୟ କୁହାଯାଉଛି ।
ଭାରତୀୟ ରିଜର୍ଭ ବ୍ୟାଙ୍କ ରିପୋର୍ଟ ଅନୁଯାୟୀ, ସେପ୍ଟେମ୍ବର ୨୦୨୫ ଶେଷ ସୁଦ୍ଧା, RBI ପାଖରେ ମୋଟ ୮୮୦.୮ ଟନ୍ ସୁନା ରହିଛି, ଯାହା ମଧ୍ୟରୁ ୫୭୫.୮ ଟନ୍ ବର୍ତ୍ତମାନ ଭାରତରେ ରଖାଯାଇଛି। ଏହି ସମୟରେ, ପ୍ରାୟ ୨୯୦.୩ ଟନ୍ ସୁନା ବ୍ୟାଙ୍କ ଅଫ୍ ଇଂଲଣ୍ଡ ଏବଂ ବ୍ୟାଙ୍କ ଫର ଇଣ୍ଟରନ୍ୟାସନାଲ୍ ସେଟେଲମେଣ୍ଟ୍ସ (BIS) ଭଳି ବିଦେଶୀ ସଂସ୍ଥା ପାଖରେ ରହିଛି। ୩୧ ମାର୍ଚ୍ଚ, ୨୦୨୪ ସୁଦ୍ଧା ଏହି ସଂଖ୍ୟା ୮୨୨.୧୦ ଟନ୍ ଥିଲା। ଏହାର ଅର୍ଥ ହେଉଛି ଗୋଟିଏ ବର୍ଷରେ ସୁନାର ପରିମାଣ ୫୭.୪୮ ଟନ୍ ବୃଦ୍ଧି ପାଇଛି। ମୁମ୍ବାଇ ଏବଂ ନାଗପୁରରେ ସୁରକ୍ଷିତ ଭାବରେ ସୁନା ସଂରକ୍ଷଣ ପାଇଁ RBI 'ସୁନା ଭଣ୍ଡାର' ସ୍ଥାପନ କରିଛି।
