ନୂଆଦିଲ୍ଲୀ,୨୮/୦୮: ୧୭ ବର୍ଷ ଅପେକ୍ଷା ପରେ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ୨୦୨୫ ର ଟାଇଟଲ ଜିତିଲା । ଜୁନ୍ ୩ ତାରିଖରେ ଅହମ୍ମଦାବାଦରେ ପଞ୍ଜାବ କିଙ୍ଗସକୁ ପରାସ୍ତ କରି ଆରସିବି ଚାମ୍ପିଅନ ହୋଇଥିଲା । ଏହାପରେ ଜୁନ୍‌ ୪ରେ ତାଙ୍କ ଘର ବେଙ୍ଗାଲୁରୁରେ ଉତ୍ସବ ପାଳନ କରିଥିଲା । ବିଜୟ ପରେଡ୍ ସମୟରେ ଦଳାଚକଟା ଘଟିବାରୁ ଏହି ଉତ୍ସବ ଶୋକରେ ପରିଣତ ହୋଇଥିଲା । ଏହି ଦୁର୍ଘଟଣାରେ ୧୧ଜଣ ପ୍ରାଣ ହରାଇଥିଲେ । ଏହି ଘଟଣାର ୩ ମାସ ପରେ ନୀରବତା ଭାଙ୍ଗିଛି ଆରସିବି । ସୋସିଆଲ ମିଡିଆରେ ଏକ ଭାବବିହ୍ୱଳ ପୋଷ୍ଟ କରିଛି । ସେ ଲେଖିଛି ଯେ, ଜୁନ୍ ୩ ଆମକୁ ବହୁତ ଖୁସି ଦେଇଥିଲା, କିନ୍ତୁ ଜୁନ୍ ୪ ସବୁକିଛି ବଦଳାଇ ଦେଇଥିଲା  ।

କ’ଣ ଲେଖିଛି RCB ?

RCB ତାର ସୋସିଆଲ ମିଡିଆରେ ପୋଷ୍ଟ କରି ଲେଖିଛି, "ଆମର ନୀରବତା ଅର୍ଥ ଅନୁପସ୍ଥିତି ନୁହେଁ ବରଂ ଦୁଃଖ ଥିଲା । ଯେଉଁ  ସ୍ଥାନଟି, ସ୍ମୃତି ଏବଂ ଆନନ୍ଦଦାୟକ ମୁହୂର୍ତ୍ତଗୁଡ଼ିକରେ ପରିପୂର୍ଣ୍ଣ ଥିଲା ଯାହାକୁ ଆପଣ ସବୁଠାରୁ ଅଧିକ ଉପଭୋଗ କରିଥିଲେ, କିନ୍ତୁ ଜୁନ୍ ୪ ପରେ ସବୁକିଛି ବଦଳି ଯାଇଥିଲା । ସେହି ଦିନଠାରୁ ଆମକୁ ନୀରବତା କବଜା କରି ନେଇଥିଲା । ଏହି ନୀରବତାରେ ଆମେ ଶୋକ କରିଥିଲୁ, ଶୁଣିପାରୁଥିଲୁ ଏବଂ ଶିଖୁଥିଲୁ। ଏହିପରି ଭାବେ ଧୀରେ ଧୀରେ ଆରସିବି ନିଜକୁ ଫେରି ପାଇଛି । ଆମର ପ୍ରଶଂସକମାନଙ୍କ ସହିତ ଆମେ ସର୍ବଦା ଛିଡ଼ା ହୋଇଛୁ । ଆମେ ଏବେ ଆମର ପ୍ରଶଂସକମାନଙ୍କ ସହିତ ଉତ୍ସବ ନୁହେଁ ବରଂ ଯତ୍ନର ସହିତ ଆଗକୁ ବଢ଼ୁଛୁ । ''

ଜୁନ୍ ୪ ତାରିଖରେ କ’ଣ ଘଟିଥିଲା ? ଜୁନ୍ ୩ ତାରିଖରେ ଅହମ୍ମଦାବାଦରେ ପଞ୍ଜାବ କିଙ୍ଗସ୍‍କୁ ପରାସ୍ତ କରିଥିଲା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ଆରସିବି ୧୭ ବର୍ଷ ପରେ ଆଇପିଏଲ୍ ଟାଇଟଲ୍ ଜିତିଥିଲା । ଏହାର  ପରଦିନ ଅର୍ଥାତ୍ ଜୁନ୍ ୪ ତାରିଖରେ ଆରସିବି ଟିମ୍‌ ସେମାନଙ୍କ ଘର ବେଙ୍ଗାଲୁରୁକୁ ଫେରିଥିଲା । ହୋମ୍ ଗ୍ରାଉଣ୍ଡ ଏମ୍. ଚିନ୍ନାସ୍ୱାମୀ ଷ୍ଟାଡିୟମରେ ଏକ ବିଜୟ ପରେଡ୍ ଆୟୋଜନ କରାଯାଇଥିଲା। ଏହି ସମୟରେ, ଷ୍ଟାଡିୟମ ବାହାରେ ବହୁ ସଂଖ୍ୟକ ଲୋକଙ୍କ ଭିଡ଼ ଯୋଗୁଁ ଦଳାଚକଟା ହୋଇଥିଲା । ଯେଉଁଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା । ପ୍ରାୟ ୫୦ ଜଣ ଆହତ ହୋଇଥିଲେ । ଏହି ମାମଲାରେ କର୍ଣ୍ଣାଟକ ସରକାର ଜୁଲାଇରେ ଆରସିବି ବିରୋଧରେ ମାମଲା ରୁଜୁ କରିବାକୁ ଅନୁମତି ଦେଇଥିଲେ । ପ୍ରତ୍ୟେକ ମୃତକଙ୍କୁ ୧୦ ଲକ୍ଷ ଟଙ୍କା ସହାୟତା ଦେଇଥିଲା ବେଙ୍ଗାଲୁରୁ ।