ନୂଆଦିଲ୍ଲୀ, ୦୨/୧୧ : ପାର୍ବଣରେ ୟୁପିଆଇ(ୟୁନିଫାଏଡ୍ ପେମେଣ୍ଟ୍ ଇଣ୍ଟର୍ଫେସ୍) କାରବାରରେ ନୂଆ ରେକର୍ଡ ଦେଖିବାକୁ ମିଳିଛି । ଅକ୍ଟୋବରରେ ୟୁପିଆଇ ଜରିଆରେ ୧,୬୫୮ କୋଟି ସଂଖ୍ୟକ ଟ୍ରାଞ୍ଜାକ୍ସନ ହୋଇଛି । ଆଲୋଚ୍ୟ ସମୟରେ ୨୩.୫୦ ଲକ୍ଷ କୋଟି ଟଙ୍କାର ଫଣ୍ଡ୍ ଟ୍ରାନ୍ସଫର କରାଯାଇଛି । ଗତବର୍ଷ ଅକ୍ଟୋବର ତୁଳନାରେ ଟ୍ରାଞ୍ଜାକ୍ସନ ସଂଖ୍ୟାରେ ୪୫% ବୃଦ୍ଧି ଘଟିଛି ।
୨୦୧୬ ଏପ୍ରିଲରେ ୟୁପିଆଇ ବ୍ୟବସ୍ଥାର ଆରମ୍ଭ ହୋଇଥିଲା । ସେବେଠାରୁ ବର୍ତ୍ତମାନ ପର୍ଯ୍ୟନ୍ତ କୌଣସି ମାସରେ ଏହା ହେଉଛି ସର୍ବବୃହତ୍ ଟ୍ରାଞ୍ଜାକ୍ସନ । ୨୦୨୩ ଅକ୍ଟୋବରରେ ୟୁପିଆଇ ଜରିଆରେ ୧,୧୪୧ କୋଟି ସଂଖ୍ୟକ ଟ୍ରାଞ୍ଜାକ୍ସନ ହୋଇଥିଲା ଏବଂ ଏହା ଜରିଆରେ ୧୭.୧୬ ଲକ୍ଷ କୋଟିର ଫଣ୍ଡ୍ ଟ୍ରାନ୍ସଫର କରାଯାଇଥିଲା । ବର୍ଷକରେ ୟୁପିଆଇ ଜରିଆରେ ଟ୍ରାଞ୍ଜାକ୍ସନ ରାଶିରେ ୩୭% ବୃଦ୍ଧି ଘଟିଛି । ୨୦୨୪ ଅକ୍ଟୋବରରେ ଯଦି ଦୈନିକ ହାରାହାରି କାରବାର କଥା ବିଚାରକୁ ନିଆଯାଏ ତେବେ ଏହା ୫୩ କୋଟି ୫୦ ଲକ୍ଷ ରହିଛି ଏବଂ ଦୈନିକ ହାରାହାରି ୭୫,୮୦୧ କୋଟି ଟଙ୍କାର ଫଣ୍ଡ୍ ଟ୍ରାନ୍ସଫର ହୋଇଛି । ୨୦୨୪ ସେପ୍ଟେମ୍ବର ତୁଳନାରେ ଅକ୍ଟୋବରରେ ଟ୍ରାଞ୍ଜାକ୍ସନ ସଂଖ୍ୟାରେ ୧୦.୨୩% ବୃଦ୍ଧି ଘଟିଛି । ସେହିଭଳି ଟ୍ରାନ୍ସଫର ରାଶିରେ ୧୩.୮୫% ବୃଦ୍ଧି ଦେଖିବାକୁ ମିଳିଛି ।
୨୦୨୪ ସେପ୍ଟେମ୍ବରରେ ୟୁପିଆଇ ଜରିଆରେ ୧,୫୦୪ କୋଟି ସଂଖ୍ୟକ ଟ୍ରାଞ୍ଜାକ୍ସନ ହୋଇଥିଲା ଏବଂ ଏହା ଜରିଆରେ ୨୦.୬୪ ଲକ୍ଷ କୋଟିର ଫଣ୍ଡ୍ ଟ୍ରାନ୍ସଫର କରାଯାଇଥିଲା । ୟୁପିଆଇକୁ ନିୟନ୍ତ୍ରଣ କରୁଥିବା ସଂସ୍ଥା ନ୍ୟାସ୍ନାଲ ପେମେଣ୍ଟ କର୍ପୋରେଶନ୍ ଅଫ୍ ଇଣ୍ଡିଆ(ଏନ୍ପିସିଆଇ) ପକ୍ଷରୁ ଆଜି ଜାରି ହୋଇଥିବା ତଥ୍ୟରୁ ଉପରୋକ୍ତ ସୂଚନା ମିଳିଛି । ୨୦୨୪-୨୫ ଆର୍ଥିକବର୍ଷର ପ୍ରଥମ ୫ ମାସ(ଏପ୍ରିଲ-ଅଗଷ୍ଟ)ରେ ୮,୬୫୯ କୋଟି ସଂଖ୍ୟକ ଡିଜିଟାଲ ପେମେଣ୍ଟ ହୋଇଛି ଏବଂ ଏହା ଜରିଆରେ ମୋଟ ୧,୬୬୯ ଲକ୍ଷ କୋଟିର ଫଣ୍ଡ୍ ଟ୍ରାନ୍ସଫର କରାଯାଇଛି । ୨୦୧୭-୧୮ ସମ୍ପୂର୍ଣ୍ଣ ଆର୍ଥିକବର୍ଷରେ ୨,୦୭୧ କୋଟି ସଂଖ୍ୟକ ଡିଜିଟାଲ ଟ୍ରାଞ୍ଜାକ୍ସନ ହୋଇଥିଲା ଏବଂ ଏହା ମାଧ୍ୟମରେ ୧,୯୬୨ ଲକ୍ଷ କୋଟି ଟଙ୍କାର ଫଣ୍ଡ୍ ଟ୍ରାନ୍ସଫର କରାଯାଇଥିଲା । ଉକ୍ତ ଅବଧି ତୁଳନାରେ ବର୍ତ୍ତମାନ ଟ୍ରାଞ୍ଜାକ୍ସନ ସଂଖ୍ୟାରେ ୯ ଗୁଣା ବୃଦ୍ଧି ଘଟିଛି ।
