ନୂଆଦିଲ୍ଲୀ,୪।୧୧: ଆନ୍ତର୍ଜାତୀୟ ଡ୍ରଗ୍ସ ଚାଲାଣକାରୀ ବୀରେନ୍ଦ୍ର ବାସୋୟାର ପୁଅ ରିଷଭ ବାସୋୟା ବିରୋଧରେ ରେଡ୍ କର୍ଣ୍ଣର ନୋଟିସ୍ ଜାରି । ଦିଲ୍ଲୀ ପୁଲିସ ଏହି ନୋଟିସ୍ ୧୩,୦୦୦ କୋଟି ଟଙ୍କାର ଡ୍ରଗ୍ସ ମାମଲାରେ ପଠାଯାଇଛି। ପୁଲିସ ପୂର୍ବରୁ ପଞ୍ଜାବରେ ଡ୍ରଗ୍ସ ଜବତ କରିଥିଲା ଏବଂ ସିଣ୍ଡିକେଟର ସଦସ୍ୟ ଜସିକୁ ଗିରଫ କରିଥିଲା। ସ୍ପେଶାଲ୍ ସେଲ୍ର କାର୍ଯ୍ୟାନୁଷ୍ଠାନ ପରେ ରିଷଭର SUV ରୁ ଡ୍ରଗ୍ସ ଜବତ କରାଯାଇଥିଲା। ଏହି କାର୍ଯ୍ୟାନୁଷ୍ଠାନ ପରେ ରିଷଭ ବିଦେଶ ପଳାଇ ଯାଇଥିଲା ଏବେ ମାମଲାର ତଦନ୍ତ ଚାଲିଛି।
ଏହି ନୋଟିସ୍ ହତ୍ୟା, ଚୋରି ଏବଂ ଦୁର୍ନୀତି ଭଳି ଗମ୍ଭୀର ଅପରାଧ ପାଇଁ ଜାରି କରାଯାଇଛି। ରେଡ୍ କର୍ଣ୍ଣର ନୋଟିସ୍ ଦ୍ବାରା ଯାତ୍ରା କଟକଣା, ସମ୍ପତ୍ତି ଜବତ ଏବଂ ପ୍ରତ୍ୟର୍ପଣରେ ସାହାଯ୍ୟ ମିଳିଥାଏ। ଏହା ବ୍ୟତୀତ ଚାରିଆଡୁ ରିଷଭକୁ ଘେରାବନ୍ଦୀ କରିବା ପାଇଁ ପ୍ରସ୍ତୁତି ଚାଲିଛି। ସ୍ପେଶାଲ୍ ସେଲ୍ ରିଷଭ ଅନୁପସ୍ଥିତିରେ ତା ବିରୋଧ ମାମଲା ଚଳାଇବା ପାଇଁ ମଧ୍ୟ ଆବେଦନ କରିଛି। କୋର୍ଟ ପୂର୍ବରୁ ରିଷଭକୁ ପଳାତକ ଘୋଷଣା କରିସାରିଛନ୍ତି।
ଉଲ୍ଲେଖନୀୟ ଯେ, ରିଷଭ ବାସୋୟା ଦିଲ୍ଲୀ ପିଲାଞ୍ଜି ଗାଁର ବାସିନ୍ଦା। ୨୦୨୪ରେ ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ ୧୩,୦୦୦ କୋଟି ଟଙ୍କାର ଡ୍ରଗ୍ସ ଜବତ କରିଥିଲା। ପୁଲିସ ଦାବି କରିଥିଲା ଯେ ଏହି ଡ୍ରଗ୍ସ ବିଦେଶରେ ଥିବା ବୀରେନ୍ଦ୍ର ବାସୋୟା ପଠାଇଥିଲା। ଦିଲ୍ଲୀ ପୁଲିସ ପଞ୍ଜାବର ଅଜନଲାରୁ ସେହି ସିଣ୍ଡିକେଟର ସଦସ୍ୟ ଜସିକୁ ଗିରଫ କରିଥିଲା। ରିଷଭ ନିଜର SUV କୁ ଜସିକୁ ଦେଇଥିଲା, ଯେଉଁଥିରୁ ଡ୍ରଗ୍ସ ମିଳିଥିଲ। ବର୍ତ୍ତମାନ ରିଷଭ ବିଦେଶ ପଳାଇ ଯାଇଛି। ସେ ମିଡିଲ ଇଷ୍ଟର କୌଣସି ଏକ ଦେଶରେ ଥିବାର ଅନୁମାନ କରାଯାଉଛି।
