ନୂଆଦିଲ୍ଲୀ,୧୦/୧୨: ସୁପ୍ରିମକୋର୍ଟରେ କୋଲକାତା ଆର.ଜି କର ମେଡିକାଲ କଲେଜରେ ହୋଇଥିବା ଦୁଷ୍କର୍ମ ଓ ହତ୍ୟା ମାମଲାର ଶୁଣାଣିରେ ସିବିଆଇ ଏହାର ତଦନ୍ତ ରିପୋର୍ଟ ଦାଖଲ କରିଛି। ସିବିଆଇ କୋର୍ଟଙ୍କୁ କହିଛି ଯେ ଡାକ୍ତରଖାନାରେ ପ୍ରମାଣ ନଷ୍ଟ ଏବଂ ଦୁର୍ନୀତି ହୋଇଥିବା ସନ୍ଦେହ ହେଉଛି। ସିବିଆଇ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ ଏହି ମାମଲାରେ ତିନିଟି ଶ୍ରେଣୀର ଅଭିଯୁକ୍ତଙ୍କୁ ଚିହ୍ନଟ କରାଯାଇଛି। ପ୍ରଥମଟି ଦୁଷ୍କର୍ମ ଏବଂ ହତ୍ୟା ସହ ଜଡ଼ିତ, ଦ୍ୱିତୀୟଟି ଘଟଣା ପାଇଁ ଦାୟୀ ଏବଂ ତୃତୀୟଟି ଦୁର୍ନୀତି ସହ ଜଡ଼ିତ। ସିବିଆଇ କହିଛି ଯେ ଟ୍ରାଏଲ ସୋମବାରରୁ ଗୁରୁବାର ପର୍ଯ୍ୟନ୍ତ ସିବିଆଇର ସ୍ୱତନ୍ତ୍ର ସିବିଆଇ କୋର୍ଟରେ ଏହି ଶୁଣାଣି ଚାଲିଛି ଏବଂ ଆସନ୍ତା ସପ୍ତାହ ସୁଦ୍ଧା ଏହି ଶୁଣାଣି ଶେଷ ହେବ।
କେଉଁ ପର୍ଯ୍ୟନ୍ତ ପହଞ୍ଚିଛି ମାମଲା?
ମାମଲାରେ ଓକିଲ ବୃନ୍ଦା ଗ୍ରୋଭର ପୀଡ଼ିତାଙ୍କ ବାପା ମାଆଙ୍କ ପକ୍ଷରୁ କହିଛନ୍ତି ଯେ, ସିବିଆଇ ଏକ ସପ୍ଲିମେଣ୍ଟାରୀ ଚାର୍ଜସିଟ ଦାଖଲ କରିବ ବୋଲି ଆଶା ରହିଛି, ଯାହା ଦ୍ବାରା ଏହି ଅପରାଧରେ ସମ୍ପୃକ୍ତ ସମସ୍ତ ଅପରାଧୀ ଧରା ପଡ଼ିବେ। ସେ କୋର୍ଟଙ୍କୁ କହିଛନ୍ତି ଯେ ସମୁଦାୟ ୮୧ ସାକ୍ଷୀଙ୍କ ସାକ୍ଷ୍ୟ ରେକର୍ଡ କରାଯାଇଛି, ସେଥିମଧ୍ୟରୁ ୪୩ ଜଣଙ୍କ ସାକ୍ଷ୍ୟଗ୍ରହଣ ଶେଷ ହୋଇଛି।
ପଶ୍ଚିମବଙ୍ଗ ସରକାରଙ୍କ ମଞ୍ଜୁରିକୁ ଅପେକ୍ଷା:
ସିଜେଆଇ ଜଷ୍ଟିସ୍ ଡି ଓ୍ବାଇ ଚନ୍ଦ୍ରଚୁଡ଼ ଏବଂ ଜଷ୍ଟିସ ସଞ୍ଜୟ କୁମାରଙ୍କ ଖଣ୍ଡପୀଠ ମଧ୍ୟ ସ୍ୱାସ୍ଥ୍ୟ ବିଶେଷଜ୍ଞଙ୍କ ସୁରକ୍ଷା ପାଇଁ ଗଠିତ ଏନଟିଏଫ୍ (ନ୍ୟାସନାଲ ଟାସ୍କ ଫୋର୍ସ) ର ସୁପାରିଶକୁ ଉଲ୍ଲେଖ କରିଥିଲେ। ଖଣ୍ଡପୀଠ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ଏହା ଉପରେ ପ୍ରତିକ୍ରିୟା ଦେବାକୁ କହିଛନ୍ତି। ଆସନ୍ତା ମାସ ସୁଦ୍ଧା ମାମଲାର ଶୁଣାଣି ଶେଷ ହେବାର ସମ୍ଭାବନା ରହିଛି ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି। ଆହୁରି ମଧ୍ୟ ଦୁର୍ନୀତି ସମ୍ପର୍କିତ ମାମଲାରେ ଦୁଇ ସରକାରୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପଶ୍ଚିମବଙ୍ଗ ସରକାରଙ୍କ ଅନୁମୋଦନକୁ ଅପେକ୍ଷା କରାଯାଇଛି ବୋଲି ସିବିଆଇ ସୂଚନା ଦେଇଛି।
