ମୁମ୍ବାଇ,୧୦/୪ : ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ମାମଲାରେ ରିଆ ଚକ୍ରବର୍ତ୍ତୀଙ୍କୁ କ୍ଲିନ୍ ଚିଟ୍ ଦେଇଛି ସିବିଆଇ । ଯାହା ପରେ ରିଆ ସୋସିଆଲ ମିଡିଆରେ ତାଙ୍କର ପ୍ରଥମ ପୋଷ୍ଟ କରିଛନ୍ତି। ଏହି ପୋଷ୍ଟରେ ରିଆ ତାଙ୍କ ଭାଇଙ୍କ ସହ ଏକ ହସୁଥିବା ଫଟୋ ପୋଷ୍ଟ କରିଛନ୍ତି । ଏଭଳି ଏକ କ୍ୟାପ୍ସନ ଲେଖିଛନ୍ତି ଯାହା ଲୋକଙ୍କ ଦୃଷ୍ଟି ଆକର୍ଷଣ କରୁଛି ।
ରିଆ ତାଙ୍କ ଭାଇ ଶୋୱିକ୍ ଚକ୍ରବର୍ତ୍ତୀଙ୍କ ସହ ଇନଷ୍ଟାଗ୍ରାମରେ ଏକ ଫଟୋ ସେୟାର କରିଛନ୍ତି। ଏହା ସହ ଏଥିରେ ଏକ ଗୀତ ମଧ୍ୟ ଲଗାଇଛନ୍ତି । ଏହି ଫଟୋରେ ରିଆ କ୍ୟାପ୍ସନରେ ଲେଖିଛନ୍ତି , 'ଚ୍ୟାପ୍ଟର ୨.' ଫଟୋରେ ଦୁଇ ଭାଇଭଉଣୀଙ୍କ ମଧ୍ୟରେ ସମ୍ପର୍କ ଏବଂ ଭଲପାଇବା ସ୍ପଷ୍ଟ ଭାବେ ଦେଖାଯାଉଛି । ଏହି ଫଟୋ ଉପରେ ରିଆଙ୍କ ଫ୍ୟାନ୍ସମାନେ ବହୁ ଭଲପାଇବା ବର୍ଷା କରୁଛନ୍ତି। କେତେକ ସେମାନଙ୍କୁ ସୁନ୍ଦର ଭାଇଭଉଣୀ ବୋଲି କହୁଛନ୍ତି ତ ଅନ୍ୟ କେତେକ ସେମାନଙ୍କ ଭବିଷ୍ୟତ ଜୀବନରେ ସୁଖ ଏବଂ ସଫଳତା କାମନା କରୁଛନ୍ତି।
କିଛି ଦିନ ପୂର୍ବରୁ ଦିଆ ମିର୍ଜା, ରିଆଙ୍କ ସମର୍ଥନରେ ଆସିଥିଲେ । ଦିଆ ମିଡିଆ ଟ୍ରାଏଲ୍ ପାଇଁ ଅଭିନେତ୍ରୀଙ୍କଠାରୁ କ୍ଷମା ମାଗିବାକୁ ଦାବି କରିଥିଲେ । ପ୍ରକାଶ ଯେ, ସୁଶାନ୍ତ ସିଂହଙ୍କ ମୃତ୍ୟୁ ମାମଲାରେ ରିଆ ଚକ୍ରବର୍ତ୍ତୀଙ୍କୁ ସେପ୍ଟେମ୍ବର ୨୦୨୦ରେ ଗିରଫ କରାଯାଇଥିଲା। ଅଭିନେତ୍ରୀଙ୍କ ଉପରେ ସୁଶାନ୍ତଙ୍କୁ ଡ୍ରଗ୍ସ ଦେବାର ଅଭିଯୋଗ ଆସିଥିଲା । ରିଆଙ୍କୁ ନେଇ ସେହି ସମୟରେ କେତେକ କଥା ସାମ୍ନାକୁ ଆସିଥିଲା । ତେବେ, ୨୮ଦିନ ପରେ ରିଆଙ୍କୁ ବେଲ୍ ମିଳିଯାଇଥିଲା ।
