ଇଂଲଣ୍ଡ: ଯୁକ୍ତରାଜ୍ୟର ରୟାଲ ନେଭି ଇଣ୍ଡୋ-ପାସିଫିକ ଅଞ୍ଚଳରେ ସୁରକ୍ଷା ମଜବୁତ କରିବା ଲାଗି ଦକ୍ଷିଣ କୋରିଆରେ ଯୁଦ୍ଧଜାହାଜ ମୁତୟନ କରିଛି। ଏହି ପଦକ୍ଷେପ ମୁକ୍ତ ଓ ନିୟମ ଆଧାରିତ ଆନ୍ତର୍ଜାତିକ ବ୍ୟବସ୍ଥାକୁ ସମର୍ଥନ କରିବା ଏବଂ ଅଞ୍ଚଳରେ ସ୍ଥିରତା ବଜାୟ ରଖିବା ପାଇଁ ଯୁକ୍ତରାଜ୍ୟର ପ୍ରତିବଦ୍ଧତାର ଅଂଶ ବୋଲି କୁହାଯାଇଛି।

ରୟାଲ ନେଭିର ଫ୍ଲାଗସିପ ଏଚଏମଏସ ପ୍ରିନ୍ସ ଅଫ ଓ୍ୱେଲ୍ସ (HMS Prince of Wales) ନେତୃତ୍ୱରେ କ୍ୟାରିଅର ଷ୍ଟ୍ରାଇକ ଗ୍ରୁପ (CSG25) ଫିଲିପାଇନ୍ସ ସାଗରରେ ୯ ଦିନିଆ ଏକ ମିଳିତ ଅଭ୍ୟାସ ପରେ ଜାପାନ ଓ ଦକ୍ଷିଣ କୋରିଆ ଗସ୍ତ କରୁଛି। ଏହି ଅଭ୍ୟାସରେ ଯୁକ୍ତରାଷ୍ଟ୍ର ଓ ଜାପାନର ନୌସେନା ମଧ୍ୟ ଅଂଶଗ୍ରହଣ କରିଥିଲେ। ଯାହା ମେଣ୍ଟଶକ୍ତି ଓ ଆନ୍ତର୍ଜାତିକ ସହଯୋଗର ଏକ ପ୍ରଦର୍ଶନ ଥିଲା। ଏହି ଗ୍ରୁପରେ ଅନ୍ୟାନ୍ୟ ଯୁଦ୍ଧଜାହାଜ ସହିତ ଆରଏଫଏ ଟାଇଡସ୍ପ୍ରିଙ୍ଗ (RFA Tidespring) ଏବଂ ଯୁକ୍ତରାଷ୍ଟ୍ରର ଇଉଏସଏନଏସ ଓ୍ୱାଲି ସ୍କିରା (USNS Wally Schirra) ମଧ୍ୟ ସାମିଲ ଥିଲେ। ଯେଉଁମାନେ ଅଭ୍ୟାସ ସମୟରେ ଜାହାଜମାନଙ୍କୁ ଇନ୍ଧନ ଓ ଅନ୍ୟାନ୍ୟ ଆବଶ୍ୟକ ସାମଗ୍ରୀ ଯୋଗାଇଥିଲେ।

ଏହି ମୁତୟନ ଇଣ୍ଡୋ-ପାସିଫିକ ଅଞ୍ଚଳରେ ଯୁକ୍ତରାଜ୍ୟର ବର୍ଦ୍ଧିତ ନୌସେନା ଉପସ୍ଥିତିର ଏକ ଅଂଶ। ଯାହା ଚୀନର ବୃଦ୍ଧିପ୍ରାପ୍ତ ସାମରିକ ଶକ୍ତି ଏବଂ ଦକ୍ଷିଣ ଚୀନ ସାଗରରେ ତାର କାର୍ଯ୍ୟକଳାପକୁ ମୁକାବିଲା କରିବା ପାଇଁ ରଣନୈତିକ ପଦକ୍ଷେପ ଅଟେ। ଚୀନ ଏହି ଅଞ୍ଚଳରେ ୩,୨୦୦ ହେକ୍ଟରରେ ସାମରିକ ଘାଟି, ୩,୦୦୦ ମିଟର ବିମାନ ଚଳାଚଳ ପଥ, ୭୨ରୁ ଅଧିକ ଯୁଦ୍ଧ ବିମାନ ହ୍ୟାଙ୍ଗାର, ଏସଏଏମ (ସରଫେସ-ଟୁ-ଏୟାର ମିସାଇଲ) ଏବଂ ଜାହାଜ ଧ୍ୱଂସକାରୀ ମିସାଇଲ ମୁତୟନ କରିଛି, ଯାହା ଏହି ଅଞ୍ଚଳରେ ଉତ୍ତେଜନା ସୃଷ୍ଟି କରିଛି।

ରୟାଲ ନେଭିର ଏହି କାର୍ଯ୍ୟକଳାପ ଯୁକ୍ତରାଷ୍ଟ୍ର, ଜାପାନ ଏବଂ ଅନ୍ୟାନ୍ୟ ମେଣ୍ଟ ଦେଶମାନଙ୍କ ସହ ମିଳିତ ମିଶନରେ ଅଂଶଗ୍ରହଣକୁ ଗୁରୁତ୍ୱ ଦେଇଛି। CSG25ର ୧୦୦ ଦିନର ଅଭିଯାନ ଆନ୍ତର୍ଜାତିକ ସହଯୋଗ ଓ ସମୁଦ୍ର ସୁରକ୍ଷା ପାଇଁ ମେଣ୍ଟ ଶକ୍ତିର ଏକ ପ୍ରଦର୍ଶନ ବୋଲି ରୟାଲ ନେଭି ଏକ୍ସରେ ପୋଷ୍ଟ କରିଛି। ଏହା ଅଞ୍ଚଳରେ ମୁକ୍ତ ନୌଚଳାଚଳ ଏବଂ ସ୍ଥିରତା ନିଶ୍ଚିତ କରିବା ଲାଗି ଯୁକ୍ତରାଜ୍ୟର ପ୍ରତିବଦ୍ଧତାକୁ ଦର୍ଶାଇଛି।

ଏହି ମୁତୟନ ଦକ୍ଷିଣ କୋରିଆ ଓ ଜାପାନ ସହ ଯୁକ୍ତରାଜ୍ୟର ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ସହିତ ଇଣ୍ଡୋ-ପାସିଫିକରେ ଚୀନର ସାମରିକ ବିସ୍ତାରକୁ ମୁକାବିଲା କରିବା ପାଇଁ ଏକ ରଣନୈତିକ ସଙ୍କେତ ବୋଲି ବିବେଚନା କରାଯାଉଛି। ଏହା ଅଞ୍ଚଳରେ ଶାନ୍ତି ଓ ସ୍ଥିରତା ପାଇଁ ଆନ୍ତର୍ଜାତିକ ସହଯୋଗର ଗୁରୁତ୍ୱକୁ ଆହୁରି ଜୋରଦାର କରୁଛି।