ଭୁବନେଶ୍ୱର,୧୬/୧୧: କିମ୍ବଦନ୍ତୀ ସଚିନ ତେନ୍ଦୁଲକର ଅନ୍ତର୍ଜାତୀୟ କ୍ରିକେଟ୍ ଛାଡ଼ିବା ଏକ ଦଶନ୍ଧିରୁ ଊର୍ଦ୍ଧ୍ବ ସମୟ ହେଲାଣି । ଏବେବି ତାଙ୍କ ଲୋକପ୍ରିୟତା ଅତୁଟ ରହିଛି । ଟି-ଟ୍ୱେଣ୍ଟି କ୍ରିକେଟର ଦ୍ରୁତ ଆଦର ସତ୍ତେ୍ୱ ତାଙ୍କୁ ଅନୁକରଣ କରୁଛନ୍ତି ଯୁବ ଖେଳାଳି । ସେଭଳି ଜଣେ ଯୁବ ବ୍ୟାଟର ହେଲେ ମହାରାଷ୍ଟ୍ରର ସଚିନ ଧାସ୍ ।
ମାତ୍ର ୧୯ ବର୍ଷ ବୟସରେ ଧାସ୍ ରଣଜୀ ଟ୍ରଫି ପଦାର୍ପଣ କରିବାର ସୁଯୋଗ ପାଇଛନ୍ତି । ଓଡ଼ିଶା ବିପକ୍ଷରେ ରଣଜୀ ଟ୍ରଫିର ପଞ୍ଚମ ରାଉଣ୍ଡ ମ୍ୟାଚ୍ ଖେଳିବା ପାଇଁ ବାରବାଟୀ ଷ୍ଟାଡିୟମ ଆସିଥିଲେ । ଉଭୟ ଇନିଂସରେ ଧାସ୍ ଓପନ (୨୦, ୩୮) କରିଥିଲେ । ସେମିତି ବଡ଼ ଇନିଂସ ଖେଳିପାରି ନଥିଲେ ବି ତାଙ୍କ ଖେଳ ସମସ୍ତଙ୍କୁ ଆକୃଷ୍ଟ କରିଥିଲା ।
ସଚିନ ତେନ୍ଦୁଲକରଙ୍କର ବଡ଼ ପ୍ରଶଂସକ ହେଉଛନ୍ତି ଧାସ୍ । ତେନ୍ଦୁଲକରଙ୍କ ଜର୍ସି ନମ୍ବର ୧୦ ଥିଲା । ଧାସ୍ଙ୍କ ଜର୍ସି ନମ୍ବର ମଧ୍ୟ ୧୦ । ପିଲାଟି ଦିନରୁ ସଚିନଙ୍କ ଖେଳ ଦେଖି ବଢ଼ିଥିଲେ । ତାଙ୍କ ଭଳି ଖେଳିବାକୁ ଲକ୍ଷ୍ୟ ରଖିଥିବା ଧାସ୍ ଗଣମାଧ୍ୟମକୁ କହିଛନ୍ତି ।
ଚଳିତ ବର୍ଷ ୧୯ ବର୍ଷରୁ କମ୍ ବିଶ୍ୱକପ୍ ଦଳର ସଦସ୍ୟ ଥିଲେ ଧାସ୍ । ମଧ୍ୟଭାଗରେ ସେ ବ୍ୟାଟିଂ କରୁଥିଲେ । ୭ଟି ମ୍ୟାଚ୍ରୁ ସେ ୩୦୩ ରନ୍ କରିଥିଲେ । ଯେଉଁଥିରେ ଗୋଟିଏ ଶତକ (୧୧୧) ସାମିଲ ରହିଥିଲା । ଯାହା ସେ ନେପାଳ ବିପକ୍ଷରେ ହାସଲ କରିଥିଲେ । ସେମିତି ଦକ୍ଷିଣ ଆଫ୍ରିକା ବିପକ୍ଷରେ (୯୬) ଅଳ୍ପକେ ଶତକରୁ ବଞ୍ଚିତ ହୋଇଥିଲେ ।
ଭାରତ ଫାଇନାଲ ଖେଳିଥିଲା । ମାତ୍ର ଅଷ୍ଟ୍ରେଲିଆ ଠାରୁ ୭୯ ରନ୍ରେ ପରାସ୍ତ ହୋଇ ଟ୍ରଫି ହାତଛଡ଼ା କରିଥିଲା । ଜୁନିୟର କ୍ରିକେଟରେ ଉନ୍ନତ ପ୍ରଦର୍ଶନ କରିବା ପରେ ମହାରାଷ୍ଟ୍ର ରଣଜୀ ଦଳରେ ୨୦୨୩-୨୪ ସିଜନରେ ତାଙ୍କୁ ସୁଯୋଗ ମିଳିଥିଲା । ଚଳିତ ବର୍ଷ ଫେବ୍ରୁଆରୀ ୧୬ ତାରିଖରେ ସର୍ଭିସେସ୍ ବିପକ୍ଷରେ ପ୍ରଥମ ଶ୍ରେଣୀ କ୍ରିକେଟ୍ ପଦାର୍ପଣ କରିଥିଲେ ।
ଏ ପର୍ଯ୍ୟନ୍ତ ଧାସ୍ ୬ଟି ମ୍ୟାଚ୍ ଖେଳି ୨୬୭ ରନ୍ କରିଛନ୍ତି । ଯେଉଁଥିରେ ଗୋଟିଏ ଅର୍ଦ୍ଧଶତକ ସାମିଲ ରହିଛି । ଗତ ମୁମ୍ବାଇ ବିପକ୍ଷ ମ୍ୟାଚ୍ରେ ସେ ସର୍ବାଧିକ ୯୮ ରନ୍ କରିଥିଲେ । ଧାସ୍ଙ୍କର ଏବେ ପ୍ରଥମ ଶ୍ରେଣୀ କ୍ୟାରିୟର ଆରମ୍ଭ ହୋଇଛି । କଠିନ ପରିଶ୍ରମ ଏବଂ ଖେଳ ଉପରେ ଦୃଢ଼ ଏକାଗ୍ରତା ରଖିଲେ ସେ ନିଶ୍ଚିତ ବହୁ ଆଗକୁ ଯିବେ ।
