ସମ୍ବଲପୁର,୩୦/୦୧: ସମ୍ବଲପୁର ଧନୁପାଲି ଛକ ନିକଟ ନେତାଜୀ ନଗର ‘ସମର୍ଥ’ ଅନୁଷ୍ଠାନରେ ଅନ୍ତେବାସୀଙ୍କୁ ନିର୍ଯାତନା ଘଟଣାରେ ଯୋଡ଼ି ହେଲା ଆଉ ଏକ ସାଂଘାତିକ ଅଭିଯୋଗ । ସମ୍ପାଦକ ହରିଶଚନ୍ଦ୍ର ଦାସଙ୍କ ବିରୋଧରେ ଜଣେ ଅନ୍ତେବାସିନୀ ବଳାତ୍କାର ଓ ଯୌନ ଶୋଷଣ ଅଭିଯୋଗ ଆଣିଛନ୍ତି । ଏନେଇ ବୁଧବାର ଧନୁପାଲି ଥାନାରେ ଏତଲା ହୋଇଛି । ପୀଡ଼ିତାଙ୍କ ଡାକ୍ତରୀମାଇନା କରାଯାଇଛି । ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ଛାନଭିନ୍ କରିଛି ।
ଅପରପକ୍ଷେ ଅନ୍ତେବାସୀ ନିର୍ଯାତନା ଘଟଣାରେ ଗିରଫଙ୍କ ସଂଖ୍ୟା ୪କୁ ବୃଦ୍ଧି ପାଇଛି । ହରିଶର ପୁଅ ଶୁଭ୍ରଜିତ ଦାସ ଓ କେୟାରଟେକର ଶୁଭମ ବେହେରାକୁ ପୁଲିସ୍ ବାନ୍ଧିଛି । ଏହି ୨ ଜଣ ଅନ୍ତେବାସୀଙ୍କୁ ଅମାନୁଷିକ ଭାବେ ମାଡ଼ ମାରୁଥିବା ଅଭିଯୋଗ ହୋଇଥିଲା । ଅନ୍ତେବାସୀଙ୍କ ବୟାନ ଆଧାରରେ ସମ୍ପୃକ୍ତ ଦୁଇ ଜଣଙ୍କୁ ଗିରଫ କରାଯାଇଥିବା ପୁଲିସ୍ କହିଛି । ଗତ ମଙ୍ଗଳବାର ସମ୍ପାଦକ ହରିଶ ଦାସ ଓ ସହାୟିକା ସ୍ୱାଗତିକା ପ୍ରଧାନକୁ ଗିରଫ କରାଯାଇଥିଲା । ସେପଟେ ଗତ ବର୍ଷକ ମଧ୍ୟରେ ପ୍ରାଣ ହରାଇଥିବା ୬ ଜଣଙ୍କ ମୃତ୍ୟୁ ରହସ୍ୟ ଉନ୍ମୋଚନ କରିବାକୁ ଖୋଳତାଡ଼ ଆରମ୍ଭ ହୋଇଛି ।
ବୁଧବାର ସକାଳେ ପୁଲିସ୍, ସାଇଣ୍ଟିଫିକ୍ ଟିମ୍ ଏବଂ ଜିଲ୍ଲା ପ୍ରାଶାସନର ତଦନ୍ତକାରୀ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । କିଭଳି ଅତ୍ୟାଚାର ହେଉଥିଲା ତଦନ୍ତକାରୀଙ୍କୁ ସମସ୍ତ ଲୋମଟାଙ୍କୁରା କାହାଣୀ ବଖାଣିଥିଲେ ଅନ୍ତେବାସୀ । ଖାଇବାକୁ ନ ଦେଇ ବାଡ଼ି ଓ ଲାଠିରେ ନିର୍ଘାତ ପ୍ରହାର ହେଉଥିଲା । ସାମାନ୍ୟ ଅଭିଯୋଗ କଲେ ସମସ୍ତେ ମିଶି ଅକଥନୀୟ ନିର୍ଯାତନା ଦେଉଥିଲେ ବୋଲି ଖୋଲାଖୋଲି କହିଥିଲେ ଅନ୍ତେବାସୀ । ଏ ନେଇ ତଦନ୍ତ କରୁଥିବା ସମ୍ବଲପୁର ଉପଜିଲ୍ଲାପାଳ ପୁଷ୍ପାଞ୍ଜଳି ପଣ୍ଡା କହିଛନ୍ତି, ତଦନ୍ତ ରିପୋର୍ଟ ଜିଲ୍ଲାପାଳଙ୍କୁ ଦିଆଯାଇଛି। ସଂସ୍ଥାକୁ ବ୍ଲାକଲିଷ୍ଟ୍ କରାଯିବା ପାଇଁ ସୁପାରିସ୍ ହୋଇଛି । ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଥବୀର ମହାନନ୍ଦ କହିଛନ୍ତି, ଶନିବାର ସମସ୍ତ ଅନ୍ତେବାସୀଙ୍କୁ ବୈଜାମୁଣ୍ଡାକୁ ସ୍ଥାନାନ୍ତର କରାଯିବ । ପିପୁଲ୍ସ ଫୋରମ୍ ନାମକ ଏନ୍ଜିଓକୁ ଏହି ଦାୟିତ୍ୱ ଦିଆଯାଇଛି।
