ବୁର୍ଲା,୦୪/୦୮: ‘ଆଜି ମିଟିଂ ହେବ ଠିକ୍ ରାତି ୧୦ଟା ୧୫ ମିନିଟରେ । ସବୁ କନିଷ୍ଠ ଓ ବରିଷ୍ଠ ଉପସ୍ଥିତ ରହିବ । ଆଉ ଯେଉଁ କନିଷ୍ଠ ଉପସ୍ଥିତ ନ ରହିବ ତାକୁ ତା’ କୋଠରିରୁ ଘୋଷାଡ଼ି ଆଣିବି । ଭଲରେ କହିଦେଉଛି । ଯେତେ ଯାହାର ଅସୁବିଧା ଥିଲେ ବି ସମସ୍ତ ଜୁନିୟର ଉପସ୍ଥିତ ରହିବାକୁ ବାଧ୍ୟ । ଆଉ ସିନିୟର ବି ଆସିବେ । ସବୁ ଅସୁବିଧା କହିବେ’ । ସମ୍ବଲପୁର ବିଶ୍ୱବିଦ୍ୟାଳୟର ବ୍ରାହ୍ମଣୀ ଛାତ୍ରୀ ନିବାସର ହ୍ୱାଟସଆପ୍ ଗ୍ରୁପ୍ରେ ଏଭଳି ଧମକପୂର୍ଣ୍ଣ ବାର୍ତ୍ତା ଦେଇଛନ୍ତି ସ୍ନାତକୋତ୍ତର ଦ୍ୱିତୀୟ ବର୍ଷର ଛାତ୍ରୀ । ପୂର୍ବରୁ ଜୁନିୟର ଛାତ୍ରୀଙ୍କୁ ର୍ୟାଗିଂ ଘଟଣାର ସମାଧାନ କରିବା ଆଳରେ ଶନିବାର ରାତିରେ ଡାକି ପୁଣି ର୍ୟାଗିଂ କରାଯାଇଥିବା ଅଭିଯୋଗ ହୋଇଛି ।
ବ୍ରାହ୍ମଣୀ ଛାତ୍ରୀ ନିବାସରେ ରହୁଥିବା ସମସ୍ତ କନିଷ୍ଠ ଓ ବରିଷ୍ଠ ଛାତ୍ରୀଙ୍କୁ ନେଇ ବ୍ରାହ୍ମଣୀ ଲେଡିଜ୍ ହଷ୍ଟେଲ ନାମରେ ଏକ ହ୍ୱାଟସ୍ଆପ୍ ଗ୍ରୁପ୍ ଖୋଲା ହୋଇଛି । ଶନିବାର ସନ୍ଧ୍ୟା ୬.୫୧ରେ ଏହି ଗ୍ରୁପରେ ଧମକପୂର୍ଣ୍ଣ ମେସେଜ କରିଥିଲେ ଜଣେ ସ୍ନାତକୋତ୍ତର ଦ୍ୱିତୀୟ ବର୍ଷର ଛାତ୍ରୀ। ରାତିଅଧରେ ସମସ୍ତ କନିଷ୍ଠ ଛାତ୍ରୀଙ୍କୁ ନେଇ ବୈଠକ ବସିଥିଲା । ବୈଠକ ପୂର୍ବରୁ ସମସ୍ତଙ୍କର ମୋବାଇଲ୍ ଛଡ଼ାଇ ନେଇଥିଲେ । ଯେଭଳି କୌଣସି ରେକର୍ଡିଂ ହୋଇପାରିବ ନାହିଁ ସେନେଇ ଆଗୁଆ ଯୋଜନା ହୋଇଥିଲା । ଏହାପରେ ଆରମ୍ଭ ହୋଇଥିଲା ମାନସିକ ନିର୍ଯାତନା । କନିଷ୍ଠ ଛାତ୍ରୀଙ୍କୁ ବିଭିନ୍ନ ଆଳରେ ଭୟଭୀତ କରାଇ ମାନସିକ ନିର୍ଯାତନା ଦିଆଯାଇଥିଲା । ଧମକପୂର୍ଣ୍ଣ ମେସେଜର ସ୍କ୍ରିନ୍ସଟ୍ ଭାଇରାଲ୍ ହେବା ପରେ ଏହାକୁ ନେଇ ଆଲୋଡ଼ନ ସୃଷ୍ଟି ହୋଇଛି ।
ଏନେଇ ହଷ୍ଟେଲ୍ ୱାର୍ଡେନ୍ ପ୍ରଫେସର୍ ଏନ୍. କେ. ସେଠୀ କହିଛନ୍ତି, ସୋମବାର ଛାତ୍ରୀ ନିବାସ ଯାଇ ତଦନ୍ତ କରିବେ । ଆବଶ୍ୟକ ପଡ଼ିଲେ ଘଟଣାକୁ ଆଣ୍ଟି ର୍ୟାଗିଂ ସେଲ୍କୁ ହସ୍ତାନ୍ତର କରାଯିବ । ଦୋଷୀସାବ୍ୟସ୍ତ ହେଲେ ସମ୍ପୃକ୍ତ ଛାତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।
