ଚେନ୍ନାଇ,୦୫/୦୭: ଆଗାମୀ ଆଇପିଏଲ୍ ଡ୍ରାଫ୍ଟ ପାଇଁ ସବୁ ଫ୍ରାଞ୍ଚାଇଜ୍ ପ୍ରସ୍ତୁତି ଆରମ୍ଭ କରିଛନ୍ତି । ମିନି ନିଲାମ ପୂର୍ବରୁ ଖେଳାଳି ଅଦଳ ବଦଳ ହେବ । ବର୍ତ୍ତମାନ ସବୁ ଫ୍ରାଞ୍ଚାଇଜଙ୍କ ନଜର ରାଜସ୍ଥାନ ରୟାଲ୍ସ ଉପରେ ରହିଛି । ଅତି କମ୍ରେ ୬ଜଣ ରାଜସ୍ଥାନ ରୟାଲ୍ସ ଖେଳାଳିଙ୍କ ପ୍ରତି ବାକି ଫ୍ରାଞ୍ଚାଇଜ ଆଗ୍ରହ ଦେଖାଇଛନ୍ତି । ଅଧିନାୟକ ସଞ୍ଜୁ ସାମସନଙ୍କୁ ନେବା ପାଇଁ ଚେନ୍ନାଇ ସୁପରକିଙ୍ଗ୍ସ ଆଗ୍ରହୀ ଥିବା ପୂର୍ବରୁ ପ୍ରକାଶ କରିସାରିଛି । ପ୍ରାଥମିକ ପର୍ଯ୍ୟାୟରୁ ଯାହା ଜଣା ପଡ଼ୁଛି, ରାଜସ୍ଥାନ ରୟାଲ୍ସ ମଧ୍ୟ ଚେନ୍ନାଇ ସୁପରକିଙ୍ଗ୍ସ ଖେଳାଳି ରବିନ୍ଦ୍ର ଜାଡ଼େଜାଙ୍କ ପ୍ରତି ଆଗ୍ରହୀ ରହିଛି । ଉଭୟ ଫ୍ରାଞ୍ଚାଇଜ ଆପୋଶ ବୁଝାମଣା କରି ଉଭୟ ଖେଳାଳିଙ୍କୁ ଅଦଳ ବଦଳ କରିପାରନ୍ତି । ମାତ୍ର ଏ ପ୍ରସଙ୍ଗରେ ଉଭୟ ଫ୍ରାଞ୍ଚାଇଜ୍ ଚୁପ୍ ରହିଛନ୍ତି ।
ସୂଚନାଯୋଗ୍ୟ, ମହେନ୍ଦ୍ର ସିଂହ ଧୋନିଙ୍କ ବଦଳରେ ସୁପରକିଙ୍ଗ୍ସ ଜଣେ ଦକ୍ଷ ୱିକେଟ୍ କିପର ଓ ବ୍ୟାଟର ଚାହୁଁଛି । ଯିଏକି ଦଳର ନେତୃତ୍ୱ ନେଇ ପାରିବେ । ସାମସନ ଏଥିପାଇଁ ଉପଯୁକ୍ତ ପ୍ରାର୍ଥୀ । କୋଲକାତା ନାଇଟ ରାଇଡର୍ସ ମଧ୍ୟ ସାମସନଙ୍କୁ ନେବା ପାଇଁ ଯୋଜନା ଚଳାଇଛି।
